എഎപിയുടെ കത്ത് തള്ളി; എംപിമാരുടെ കൂറുമാറ്റം അംഗീകരിച്ച് രാജ്യസഭ ചെയര്മാന്
ന്യൂഡല്ഹി: ആം ആദ്മി പാര്ട്ടിയില് നിന്നും ബിജെപിയിലേക്ക് ഏഴ് എം.പിമാരുടെ കൂറുമാറ്റം അംഗീകരിച്ച് രാജ്യസഭ ചെയര്മാന് സി.പി. രാധാകൃഷ്ണൻ. ഇതോടെ രാജ്യസഭയില് ബിജെപി എംപിമാരുടെ എണ്ണം 106 ല് നിന്നും 113 ആയി ഉയര്ന്നു.
പാര്ട്ടി അച്ചടക്ക നടപടി നേരിട്ട രാഘവ് ഛദ്ദയുടെ നേതൃത്വത്തില് എംപിമാരായ അശോക് മിത്തല്, സന്ദീപ് പഥക്, ഹര്ഭജന് സിംഗ്, രാജേന്ദ്ര ഗുപ്ത, വിക്രം സാഹ്നി, സ്വാതി മാലിവാള് എന്നിവരാണ് എഎപിയില് നിന്ന് രാജിവെച്ച് ബിജെപിയില് ചേർന്നത്. കൂറുമാറിയവരെ അയോഗ്യരാക്കണമെന്ന് ആവശ്യപ്പെട്ട് എഎപി നേതാവ് സഞ്ജയ് സിങ് രാജ്യസഭാ ചെയര്മാന് സി പി രാധാകൃഷ്ണന് കത്തു നല്കിയിരുന്നു. രാജ്യസഭ സെക്രട്ടേറിയറ്റിന്റെ പുതിയ വിജ്ഞാപനത്തിൽ എഎപിക്ക് മൂന്ന് എംപിമാർ മാത്രമാണുള്ളത്. കൂറുമാറിയ 7 പേരെ ബിജെപി പട്ടികയിലാണ് ഉൾപ്പെടുത്തിയിട്ടുള്ളത്.
