അയോധ്യ രാമക്ഷേത്ര ഫണ്ട് തട്ടിപ്പ്: ട്രസ്റ്റ് ജനറൽ സെക്രട്ടറിയും വി.എച്ച്.പി നേതാവുമായ ചമ്പത് റായിയും അനിൽ മിശ്രയും രാജിവെച്ചു
അയോധ്യ: അയോധ്യയിലെ രാമക്ഷേത്ര നിർമ്മാണവുമായി ബന്ധപ്പെട്ട് ഉയർന്ന സംഭാവന തട്ടിപ്പ് വിവാദങ്ങളിൽ ഉത്തർപ്രദേശ് സർക്കാർ നടപടികൾ കർശനമാക്കിയതിന് പിന്നാലെ ക്ഷേത്ര ട്രസ്റ്റ് ഭാരവാഹികൾ രാജിവെച്ചു. തട്ടിപ്പിൽ ആരോപണവിധേയനായ വിഎച്ച്പി ഉപാധ്യക്ഷനും രാമജന്മഭൂമി തീർത്ഥക്ഷേത്ര ട്രസ്റ്റ് ജനറൽ സെക്രട്ടറിയുമായ ചമ്പത് റായ്, ട്രസ്റ്റ് അംഗമായ അനിൽ മിശ്ര എന്നിവരാണ് തങ്ങളുടെ സ്ഥാനങ്ങൾ ഒഴിഞ്ഞത്. കനത്ത സമ്മർദ്ദത്തെത്തുടർന്ന് ചമ്പത് റായിക്കെതിരെ നടപടിയെടുക്കാൻ സർക്കാർ തീരുമാനിച്ചതിന് പിന്നാലെയാണ് ഈ രാജി. വിവാദങ്ങളുടെ പശ്ചാത്തലത്തിൽ അയോധ്യ ക്ഷേത്രത്തിന്റെ ഭരണച്ചുമതല നിലവിൽ ജില്ലാ മജിസ്ട്രേറ്റിന് കൈമാറിയിരിക്കുകയാണ്.
രാമക്ഷേത്ര നിർമ്മാണത്തിനുള്ള ഫണ്ടുമായി ബന്ധപ്പെട്ട തട്ടിപ്പിൽ എട്ട് പേരെ പൊലീസ് അറസ്റ്റ് ചെയ്തിരുന്നു. ഇതിന് പിന്നാലെ മുതിർന്ന ഉദ്യോഗസ്ഥരടങ്ങിയ പ്രത്യേക അന്വേഷണ സംഘം (എസ്ഐടി) തങ്ങളുടെ പ്രാഥമിക കണ്ടെത്തലുകൾ സർക്കാരിന് സമർപ്പിച്ചതോടെയാണ് അടിയന്തര നടപടികളിലേക്ക് കടന്നത്. എസ്ഐടിയുടെ ശുപാർശകൾ പ്രകാരമായിരിക്കും സർക്കാർ ഇനി കേസിൽ തുടർനടപടികളുമായി മുന്നോട്ട് പോവുക.
സനാതന മൂല്യങ്ങളെയും പൊതുജന വിശ്വാസത്തെയും ചൂഷണം ചെയ്യാൻ ശ്രമിക്കുന്ന ആരോടും ഒരു വിട്ടുവീഴ്ചയും ഇല്ലാത്ത സമീപനമാണ് ഉത്തർപ്രദേശ് സർക്കാർ സ്വീകരിച്ചിരിക്കുന്നതെന്ന് മുഖ്യമന്ത്രി യോഗി ആദിത്യനാഥ് വ്യക്തമാക്കി. അയോധ്യയിൽ ഇപ്പോൾ നടക്കുന്നത് അപവാദ പ്രചരണങ്ങളാണെന്നും, തട്ടിപ്പ് സംബന്ധിച്ച് തെളിവുള്ളവർ അത് എസ്ഐടിക്ക് കൈമാറുകയാണ് വേണ്ടതെന്നും അദ്ദേഹം പറഞ്ഞു. വസ്തുതകളോ തെളിവുകളോ ഇല്ലാതെയുള്ള ആരോപണ പ്രത്യാരോപണങ്ങളും രാഷ്ട്രീയ പ്രസ്താവനകളും എല്ലാവരും അവസാനിപ്പിക്കണമെന്നും, അയോധ്യയുമായി ബന്ധപ്പെട്ട കാര്യങ്ങളിൽ ഒരു വിട്ടുവീഴ്ചയും ഉണ്ടാകില്ലെന്നും മുഖ്യമന്ത്രി ജനങ്ങൾക്ക് ഉറപ്പ് നൽകി.
