മഹാരാജാസ് ഹോസ്റ്റലിൽ കട്ടിൽ മോഷണം; 8 കട്ടിലുകൾ കടത്താൻ ശ്രമിച്ച മുൻ വിദ്യാർഥി കസ്റ്റഡിയിൽ

കൊച്ചി: മഹാരാജാസ് കോളേജ് മെൻസ് ഹോസ്റ്റലിൽ നിന്ന് കട്ടിലുകൾ മോഷ്ടിക്കാൻ ശ്രമിച്ച മുൻ വിദ്യാർഥി പിടിയിൽ. അങ്കമാലി സ്വദേശിയായ ആൻസ്റ്റനെയാണ് സെൻട്രൽ പോലീസ് കസ്റ്റഡിയിലെടുത്തത്. പുലർച്ചെ ഓൺലൈൻ പോർട്ടർ സർവീസ് വഴി വാഹനം ബുക്ക് ചെയ്തെത്തി എട്ട് കട്ടിലുകൾ കടത്താനായിരുന്നു ഇയാളുടെ ശ്രമം.

കട്ടിലുകൾ വാഹനത്തിൽ കയറ്റുന്നത് ശ്രദ്ധയിൽപ്പെട്ട ഹോസ്റ്റൽ വാർഡൻ ചോദ്യം ചെയ്തപ്പോൾ, മൂട്ടശല്യം ഒഴിവാക്കാൻ കെമിക്കൽ അടിക്കാൻ കൊണ്ടുപോവുകയാണെന്നാണ് ഇയാൾ മറുപടി നൽകിയത്. എന്നാൽ സംശയം തോന്നിയ വാർഡൻ ഉടൻ തന്നെ പോലീസിൽ വിവരമറിയിക്കുകയായിരുന്നു. തുടർന്ന് സ്ഥലത്തെത്തിയ പോലീസ് പ്രതിയെ കസ്റ്റഡിയിലെടുത്തു.