കൂടത്തായി സയനൈഡ് കൊലപാതക പരമ്പരയിലെ മുഖ്യപ്രതി ജോളി ജോസഫ് ജയിലിൽ ബിരുദപഠനത്തിൽ; ലക്ഷ്യം ബി.എ ഹിസ്റ്ററി
കണ്ണൂർ: കേരളത്തെ ഒന്നാകെ ഞെട്ടിച്ച കൂടത്തായി സയനൈഡ് കൊലപാതക പരമ്പരയിലെ മുഖ്യപ്രതി ജോളി ജോസഫ് ജയിലിൽ ചരിത്രത്തിൽ ബിരുദം നേടാനുള്ള തയ്യാറെടുപ്പിലാണ്. ഇന്ദിരാഗാന്ധി നാഷണൽ ഓപ്പൺ യൂണിവേഴ്സിറ്റി (ഇഗ്നോ) വഴി ബി.എ ഹിസ്റ്ററി രണ്ടാം വർഷ പരീക്ഷയാണ് ജോളി ഇപ്പോൾ എഴുതുന്നത്. ഒന്നാം വർഷ പരീക്ഷയിലെ എല്ലാ പേപ്പറുകളും വിജയിച്ച ഇവർക്ക്, രണ്ടാം വർഷത്തെ എട്ട് പേപ്പറുകളിൽ ഇനി ഒരു പരീക്ഷ മാത്രമാണ് പൂർത്തിയാക്കാനുള്ളത്. ഈ പരീക്ഷയിലും മികച്ച മാർക്ക് നേടാനായി കഠിനമായ പഠനത്തിലാണ് ജോളി. കോഴിക്കോട് സബ് ജയിലിൽ വിചാരണത്തടവിൽ കഴിയുന്ന ഇവരെ ബിരുദ പരീക്ഷ എഴുതുന്നതിനായി കഴിഞ്ഞ ആഴ്ച പ്രത്യേക സുരക്ഷയോടെ കണ്ണൂർ വനിതാ ജയിലിലേക്ക് മാറ്റിയിരുന്നു. പരീക്ഷകൾ അവസാനിക്കുന്നത് വരെ ജോളി അവിടെ തുടരും. ഇതിനുപുറമെ, വിഷാദരോഗം ബാധിച്ചിട്ടുള്ളതിനാൽ ഇവർക്ക് ജയിലിൽ പ്രത്യേക കൗൺസലിങ്ങും അധികൃതർ നൽകുന്നുണ്ട്.
ജോളിയെ കൂടാതെ സെൻട്രൽ ജയിലിലെ മറ്റൊരു തടവുകാരനും ബി.എ ഹിസ്റ്ററി പരീക്ഷ എഴുതുന്നുണ്ട്. ഇതിനുപുറമെ 35 തടവുകാർ തുല്യതാ പരീക്ഷയും എഴുതുന്നുണ്ട്. തടവുകാരിൽ മാനസിക പരിവർത്തനം കൊണ്ടുവരുന്നതിന് വിദ്യാഭ്യാസം അനിവാര്യമാണെന്ന ഹൈക്കോടതി നിർദ്ദേശത്തെ തുടർന്നാണ് ജയിലുകളിൽ കൂടുതൽ അന്തേവാസികൾ ഉപരിപഠനം നടത്തുന്നത്. പഠിക്കാൻ സന്നദ്ധതയുള്ള തടവുകാർക്ക് തികച്ചും സൗജന്യമായാണ് അധ്യാപകരുടെയും പുസ്തകങ്ങളുടെയും സേവനം ലഭ്യമാക്കുന്നത്. ബിരുദാനന്തര ബിരുദം ചെയ്യുന്നവർക്ക് അസൈൻമെന്റുകൾ ചെയ്യുന്നതിനായി ജയിൽ വാർഡന്മാരുടെ സാന്നിധ്യത്തിൽ ഇന്റർനെറ്റ് ഉപയോഗിക്കാനുള്ള സൗകര്യവും ഒരുക്കിയിട്ടുണ്ട്. ജയിൽ സൂപ്രണ്ട് കെ. വേണു, വെൽഫെയർ ഓഫീസർ കെ. രാജേഷ് കുമാർ, പേഴ്സണാലിറ്റി ഡെവലപ്മെന്റ് അധ്യാപകൻ എം. രാജേഷ് എന്നിവരുടെ നേതൃത്വത്തിലാണ് പരീക്ഷാ നടത്തിപ്പും മറ്റു പഠന സൗകര്യങ്ങളും ഏകോപിപ്പിക്കുന്നത്.
2002 മുതൽ 2016 വരെയുള്ള കാലയളവിൽ കോഴിക്കോട് കൂടത്തായിയിൽ ഒരു കുടുംബത്തിലെ ആറുപേരെ ഭക്ഷണത്തിൽ സയനൈഡ് കലർത്തി നൽകി കൊലപ്പെടുത്തിയെന്ന കേസിലാണ് ജോളി ജോസഫ് ജയിലിലായത്. കേവലം പ്രീഡിഗ്രി വിദ്യാഭ്യാസ യോഗ്യത മാത്രമുള്ള ഇവർ കോഴിക്കോട് എൻ.ഐ.ടി പ്രൊഫസറാണെന്ന് വ്യാജേന വർഷങ്ങളോളം വീട്ടുകാരെയും നാട്ടുകാരെയും കബളിപ്പിച്ചതും, സ്വത്തുക്കൾ കൈക്കലാക്കാൻ സ്വന്തം ഭർത്താവിനെയും ബന്ധുക്കളെയും അതിദാരുണമായി കൊലപ്പെടുത്തിയതും കേരളം വലിയ നടുക്കത്തോടെയാണ് കേട്ടത്. തുടർന്ന് നടന്ന അന്വേഷണത്തിൽ 2019 ഒക്ടോബർ അഞ്ചിനാണ് ജോളി പോലീസിന്റെ പിടിയിലാകുന്നത്.
