‘വീട്ടിൽ പഴയ നോട്ടുകളും നാണയങ്ങളും ഉണ്ടോ? ലക്ഷങ്ങൾ സമ്പാദിക്കാം’-വൈറൽ വീഡിയോയുടെ യാഥാർഥ്യം വിശദീകരിച്ച് പിഐബി | Old Currency Coins Exchange PIB Fact Check

ന്യൂഡൽഹി: പഴയതും അപൂർവവുമായ കറൻസി നോട്ടുകളും നാണയങ്ങളും കൈവശമുള്ളവർക്ക് ലക്ഷങ്ങൾ സമ്പാദിക്കാമെന്ന പേരിൽ ഒരു വീഡിയോ കുറച്ചായി സോഷ്യൽ മീഡിയയിൽ പ്രചരിക്കുന്നുണ്ട്(Old Currency Coins Exchange PIB Fact Check). ആ പഴയ നോട്ടുകലും നാണയങ്ങളും കേന്ദ്ര സർക്കാർ സ്വീകരിക്കുന്നുവെന്നും പകരം വൻ തുക സ്വന്തമാക്കാമെന്നുമാണ് വീഡിയോയിൽ അവകാശപ്പെടുന്നത്. ഇപ്പോഴിതാ ആ വൈറൽ വീഡിയോയിൽ വിശദീകരണവുമായി രംഗത്തെത്തിയിരിക്കുകയാണ് പ്രസ് ഇൻഫർമേഷൻ ബ്യൂറോ (പിഐബി).

പ്രധാനമന്ത്രി നരേന്ദ്ര മോദിയുടെ പേരിലാണ് ഇത്തരം പ്രചാരണം നടക്കുന്നത്. പഴയ ഒരു രൂപ നോട്ട്, ട്രാക്ടർ ചിത്രമുള്ള അഞ്ച് രൂപ നോട്ട്, പഴയ പത്ത് പൈസ ഉൾപ്പെടെ നൽകി ലക്ഷങ്ങൾ സമ്പാദിക്കാമെന്നാണ് വീഡിയോയിൽ പറയുന്നത്.

സമൂഹമാധ്യമങ്ങളിലെ പ്രചാരണം ഇങ്ങനെ | Old Currency Coins Exchange PIB Fact Check

ഫേസ്ബുക്ക്, യൂട്യൂബ് അടക്കമുള്ള വിവിധ സമൂഹമാധ്യമ, നവമാധ്യമ പ്ലാറ്റ്ഫോമുകളിലാണ് പ്രധാനമന്ത്രി നേരിട്ട് ഒരു പുതിയ പദ്ധതി പ്രഖ്യാപിക്കുന്നു എന്ന രീതിയിലുള്ള വിഡിയോകൾ വ്യാപകമായി പങ്കുവയ്ക്കപ്പെട്ടത്. ‘കിഷൻ കുമാർ’ എന്ന ഫേസ്ബുക്ക് പേജ് വഴിയാണ് ഇത്തരം ഉള്ളടക്കങ്ങൾ പ്രധാനമായും പ്രചരിച്ചത്.

പഴയ ഒരു രൂപ നോട്ട്, ട്രാക്ടർ ചിത്രമുള്ള അഞ്ച് രൂപ നോട്ട്, വൈഷ്‌ണോദേവിയുടെ ചിത്രം പതിപ്പിച്ച നാണയം, പഴയ പത്ത് പൈസ, 20 പൈസ നാണയങ്ങൾ എന്നിവ കൈവശമുള്ളവർക്ക് അത് കേന്ദ്ര സർക്കാരിന്റെ പ്രത്യേക പോർട്ടലിലൂടെ നൽകി ലക്ഷക്കണക്കിന് രൂപ അക്കൗണ്ടിലേക്ക് നേടാമെന്നായിരുന്നു പ്രചാരണത്തിലെ പ്രധാന വാദം. പ്രധാനമന്ത്രിയുടെ ശബ്ദവും ചുണ്ടനക്കങ്ങളും കൃത്രിമമായി മാറ്റിയാണ് തട്ടിപ്പ് സംഘങ്ങൾ സാധാരണക്കാരെ കബളിപ്പിക്കാൻ വിഡിയോ നിർമിച്ചത്.

പിഐബി ഫാക്ട് ചെക്ക് നൽകുന്ന വിശദീകരണം | Old Currency Coins Exchange PIB Fact Check

വിഷയം ശ്രദ്ധയിൽപ്പെട്ടതോടെ കേന്ദ്ര വാർത്താവിതരണ മന്ത്രാലയത്തിന് കീഴിലുള്ള പിഐബി ഫാക്ട് ചെക്ക് യൂണിറ്റ് പരിശോധന നടത്തുകയും കൃത്യമായ മുന്നറിയിപ്പ് നൽകുകയും ചെയ്തു. പ്രധാനമന്ത്രിയുടെ പ്രഖ്യാപനം വ്യാജമാണെന്ന് പിഐബി വൃത്തങ്ങൾ വ്യക്തമാക്കുന്നു. പ്രധാനമന്ത്രി നരേന്ദ്ര മോദിയോ കേന്ദ്ര സർക്കാരോ ഇത്തരത്തിൽ യാതൊരു സാമ്പത്തിക ഇടപാടോ വാങ്ങൽ പദ്ധതികളോ പ്രഖ്യാപിച്ചിട്ടില്ല. എഐ സാങ്കേതികവിദ്യയും ഡീപ്‌ഫേക്കും ഉപയോഗിച്ച് കൃത്രിമമായി നിർമിച്ച വിഡിയോകളാണ് ഇത്തരത്തിൽ തെറ്റിദ്ധാരണ പടർത്താൻ ഉപയോഗിക്കുന്നത്. പഴയ നാണയങ്ങളോ നോട്ടുകളോ വാങ്ങാൻ കേന്ദ്ര സർക്കാരോ റിസർവ് ബാങ്ക് ഓഫ് ഇന്ത്യയോ (ആർബിഐ) യാതൊരു പദ്ധതിയും ആരംഭിച്ചിട്ടില്ലെന്നും പിഐബി അധികൃതർ മുന്നറിയിപ്പ് നൽകി.

ഇത്തരം ആകർഷകമായ വാഗ്ദാനങ്ങൾ നൽകുന്ന ലിങ്കുകളിലോ ഫോമുകളിലോ വിവരങ്ങൾ കൈമാറരുതെന്നും സംശയാസ്പദമായ സന്ദേശങ്ങൾ ഫോർവേഡ് ചെയ്യരുതെന്നും പിഐബി വ്യക്തമാക്കി(Old Currency Coins Exchange PIB Fact Check). സാധാരണക്കാരെ കബളിപ്പിക്കാൻ എഐ സാങ്കേതികവിദ്യ ദുരുപയോഗം ചെയ്യുന്ന പ്രവണത വർധിച്ചുവരികയാണ്. ഭരണാധികാരികളുടെയോ ഔദ്യോഗിക ഏജൻസികളുടെയോ പേരിൽ വരുന്ന അവിശ്വസനീയമായ ഓഫറുകൾ പരിശോധിച്ച് ഉറപ്പുവരുത്താതെ വിശ്വസിക്കരുതെന്നും പിഐബി ഫാക്ട് ചെക്ക് യൂണിറ്റ് അറിയിച്ചു.

തട്ടിപ്പ് സംഘങ്ങളുടെ പ്രവർത്തനരീതി | Old Currency Coins Exchange PIB Fact Check

പഴയ നാണയങ്ങളും നോട്ടുകളും ശേഖരിക്കുന്നവരെയും സാമ്പത്തിക ലാഭം ആഗ്രഹിക്കുന്ന സാധാരണക്കാരെയും ലക്ഷ്യമിട്ട് രാജ്യത്ത് സജീവമായി പ്രവർത്തിക്കുന്ന ഒരു തട്ടിപ്പ് ശൃംഖലയുടെ പുതിയ രൂപമാണിത്. ഇവർ അവലംബിക്കുന്ന സ്ഥിരം തട്ടിപ്പുരീതി ഇങ്ങനെയാണ്:

1. ആകർഷകമായ വാഗ്ദാനങ്ങൾ: അപൂർവ നാണയങ്ങൾക്ക് വിപണിയിൽ ലക്ഷങ്ങളുടെ മൂല്യമുണ്ടെന്ന് അവകാശപ്പെടുകയും സർക്കാർ തന്നെ ഇത് വാങ്ങുന്നുവെന്ന് വരുത്തിതീർക്കുകയും ചെയ്യുന്നു.
2. പ്രോസസിങ് ഫീസ് തട്ടിപ്പ്: നാണയങ്ങൾ വിൽക്കാനായി ബന്ധപ്പെടുന്നവരോട് ജിഎസ്ടി ചാർജ്, ആർബിഐ ക്ലിയറൻസ് സർട്ടിഫിക്കറ്റ്, രജിസ്‌ട്രേഷൻ ഫീസ് എന്നീ പേരുകളിൽ മുൻകൂറായി ചെറിയ തുകകൾ (ഉദാഹരണത്തിന് 2,000 രൂപ മുതൽ 10,000 രൂപ വരെ) ആവശ്യപ്പെടുന്നു.
3. ബാങ്ക് വിവരങ്ങൾ ചോർത്തൽ: തുക അക്കൗണ്ടിൽ ലഭ്യമാക്കാനെന്ന പേരിൽ ബാങ്ക് അക്കൗണ്ട് വിവരങ്ങൾ, യുപിഐ പിൻ, ഒടിപി എന്നിവ കൈക്കലാക്കി വലിയ തുക തട്ടിയെടുക്കുന്നു.
4. വിശ്വാസ്യതയ്ക്കായി എഐ: ആളുകളിൽ പൂർണ വിശ്വാസം ഉണ്ടാക്കാനാണ് പ്രധാനമന്ത്രിയുടെയും കേന്ദ്ര മന്ത്രിമാരുടെയും വ്യാജ ഡീപ്‌ഫേക്ക് വിഡിയോകൾ നിർമിക്കുന്നത്.

ആർബിഐയുടെയും നിയമ വിദഗ്ധരുടെയും മുന്നറിയിപ്പ് | Old Currency Coins Exchange PIB Fact Check

പഴയ നോട്ടുകളും നാണയങ്ങളും വിൽക്കുന്നതിനോ വാങ്ങുന്നതിനോ റിസർവ് ബാങ്ക് ഓഫ് ഇന്ത്യ ആർക്കും കമ്മീഷനോ ഫീസോ ഈടാക്കാൻ അനുമതി നൽകിയിട്ടില്ലെന്ന് ആർബിഐ നേരത്തെ തന്നെ സർക്കുലർ വഴി വ്യക്തമാക്കിയിട്ടുണ്ട്. ആർബിഐയുടെ പേരോ ചിഹ്നമോ ഉപയോഗിച്ച് ഇത്തരം തട്ടിപ്പ് നടത്തുന്നവർക്കെതിരെ കർശന നിയമനടപടികൾ സ്വീകരിക്കും.

സൈബർ നിയമങ്ങൾ പ്രകാരം, ഐടി നിയമത്തിലെ സെക്ഷൻ 66ഡി (ആൾമാറാട്ടം വഴി വഞ്ചന), ഭാരതീയ ന്യായ സംഹിതയിലെ വഞ്ചനാക്കുറ്റങ്ങൾ എന്നിവ ചുമത്തി ഇത്തരം സംഘങ്ങൾക്കെതിരെ കേസെടുക്കാൻ വ്യവസ്ഥയുണ്ട്.

പൊതുജനങ്ങൾ സ്വീകരിക്കേണ്ട മുൻകരുതലുകൾ | Old Currency Coins Exchange PIB Fact Check

ഔദ്യോഗിക അറിയിപ്പുകൾ പരിശോധിക്കുക: കേന്ദ്ര സർക്കാരിന്റെയോ ആർബിഐയുടെയോ ഔദ്യോഗിക വെബ്സൈറ്റുകളിൽ(pib.gov.in, rbi.org.in) വരാത്ത ഇത്തരം പദ്ധതികളെല്ലാം വ്യാജമാണ്.
മുൻകൂർ പണം നൽകരുത്: സർക്കാർ ഏജൻസികളോ ബാങ്കുകളോ സേവനങ്ങൾക്കായി വ്യക്തിഗത യുപിഐ ഐഡികളിലേക്ക് പണം ആവശ്യപ്പെടില്ല.
ഡീപ്‌ഫേക്ക് വിഡിയോകൾ തിരിച്ചറിയുക: അസ്വാഭാവികമായ ശബ്ദ വ്യതിയാനങ്ങൾ, ചുണ്ടുകളുടെ കൃത്യതയില്ലാത്ത ചലനം, കണ്ണുകളുടെ ചലനത്തിലെ അസ്വാഭാവികത എന്നിവ ശ്രദ്ധിച്ചാൽ ഒരുപരിധി വരെ ഡീപ്‌ഫേക്ക് വിഡിയോകൾ തിരിച്ചറിയാൻ സാധിക്കും.
പരാതിപ്പെടുക: ഇത്തരം സൈബർ സാമ്പത്തിക തട്ടിപ്പുകൾക്ക് ഇരയായാൽ ഉടൻ തന്നെ 1930 എന്ന ടോൾ ഫ്രീ നമ്പറിലോ cybercrime.gov.in എന്ന ദേശീയ സൈബർ ക്രൈം പോർട്ടലിലോ പരാതി നൽകുക(Old Currency Coins Exchange PIB Fact Check).