‘പ്രേമലു 2 ഉപേക്ഷിക്കാൻ കാരണം നസ്ലിന്റെ പ്രതിഫല തർക്കം; ചോദിച്ച തുക കേട്ട് അമ്പരന്ന് സംവിധായകനും നിർമാതാക്കളും’: ആലപ്പി അഷ്റഫ്
വൻ ബോക്സ് ഓഫീസ് വിജയം നേടിയ ‘പ്രേമലു’ എന്ന ചിത്രത്തിന്റെ രണ്ടാം ഭാഗം ഉപേക്ഷിച്ചതിന് പിന്നിൽ നടൻ നസ്ലിൻ ഗഫൂർ ആവശ്യപ്പെട്ട ഭീമമായ പ്രതിഫലമാണെന്ന വെളിപ്പെടുത്തലുമായി സംവിധായകനും ചലച്ചിത്ര നിരൂപകനുമായ ആലപ്പി അഷ്റഫ്. തന്റെ യൂട്യൂബ് ചാനലിലൂടെ പങ്കുവെച്ച വീഡിയോയിലാണ് സിനിമാ മേഖലയിലുള്ളവർക്കിടയിൽ ചർച്ചയായ നിർണായക വിവരങ്ങൾ ആലപ്പി അഷ്റഫ് പുറത്തുവിട്ടത്.
സംവിധായകൻ ഗിരീഷ് എ.ഡിയും നസ്ലിനും തമ്മിലുള്ള അഭിപ്രായവ്യത്യാസങ്ങളോ സ്ക്രിപ്റ്റിലെ അതൃപ്തിയോ ആണ് സിനിമ ഉപേക്ഷിക്കാൻ കാരണമെന്ന തരത്തിൽ സോഷ്യൽ മീഡിയയിൽ പ്രചരിച്ചിരുന്ന വാർത്തകളെ അദ്ദേഹം പൂർണമായും തള്ളിക്കളഞ്ഞു. ഗിരീഷിന്റെ തിരക്കഥയിൽ അഭിനയിക്കാൻ നസ്ലിൻ തയ്യാറായിരുന്നു. എന്നാൽ, ചിത്രത്തിനായി താരം ആവശ്യപ്പെട്ട ഉയർന്ന തുക കേട്ട് നിർമാതാക്കളും സംവിധായകനും അമ്പരക്കുകയായിരുന്നുവെന്ന് അണിയറപ്രവർത്തകരെ ഉദ്ധരിച്ച് അദ്ദേഹം പറഞ്ഞു.
“ചിലർക്ക് അവരുടെ കാര്യങ്ങളാണ് നടക്കേണ്ടത്, അതിനായി അവർ വേറെ വഴി നോക്കട്ടെ” എന്ന് സംവിധായകൻ ഗിരീഷ് എ.ഡി അടുത്തിടെ പ്രതികരിച്ചത് ഈ പ്രതിഫല തർക്കത്തിന്റെ പശ്ചാത്തലത്തിലാണെന്ന് ആലപ്പി അഷ്റഫ് ചൂണ്ടിക്കാണിക്കുന്നു. തങ്ങളെ കൈപിടിച്ചുയർത്തിയ നിർമാണ കമ്പനികളോടും സംവിധായകരോടും അഭിനേതാക്കൾ കാട്ടേണ്ട പ്രതിബദ്ധത നസ്ലിന്റെ ഭാഗത്തുനിന്ന് ഉണ്ടായില്ലെന്ന വിമർശനവും അദ്ദേഹം ഉയർത്തുന്നുണ്ട്.
തന്റെ കരിയറിൽ 2019-ൽ ‘മധുരരാജ’യിൽ ജൂനിയർ ആർട്ടിസ്റ്റായി തുടക്കം കുറിച്ച നസ്ലിൻ, പിന്നീട് എൻജിനീയറിങ് വിദ്യാഭ്യാസം ഉപേക്ഷിച്ചാണ് അഭിനയത്തിൽ സജീവമായത്. ‘പ്രേമലു’ ആഗോളതലത്തിൽ 100 കോടി കടന്ന് 150 കോടിയോളമാണ് കളക്ട് ചെയ്തത്. ഭാവനാ സ്റ്റുഡിയോസ് നിർമിച്ച ഈ ചിത്രം തമിഴിലും തെലുങ്കിലും തരംഗമായിരുന്നു. പിന്നീട് വന്ന ‘അയാം കാതലൻ’, ‘മോളിവുഡ് ടൈംസ്’ എന്നിവ വേണ്ടത്ര ശ്രദ്ധിക്കപ്പെട്ടില്ലെങ്കിലും ‘ആലപ്പുഴ ജിംഖാന’, കല്യാണി പ്രിയദർശനോടൊപ്പമുള്ള ‘ലോക’ (300 കോടി ക്ലബ്ബിൽ കയറിയ ചിത്രം) എന്നിവയിലൂടെ നസ്ലിൻ മുന്നേറി. ‘ബെത്ലഹേം കുടുംബ യൂണിറ്റ്’ എന്ന ചിത്രവും തിയേറ്ററുകളിൽ വിജയകരമായി ഓടുമ്പോഴാണ് ഈ തർക്കം പുറത്തുവരുന്നത്.
കലാകാരന്മാർക്ക് സിനിമയോടുള്ള കമ്മിറ്റ്മെന്റ് വ്യക്തമാക്കാൻ ‘ഇൻ ഹരിഹർ നഗർ’ രണ്ടാം ഭാഗത്തിന്റെ ചിത്രീകരണ സമയത്ത് മുകേഷും സിദ്ധീഖ്-ലാൽ കൂട്ടുകെട്ടും തമ്മിലുണ്ടായിരുന്ന മാനസിക അകൽച്ചകൾ മാറ്റിവെച്ച് മുകേഷ് സഹകരിച്ച പഴയ സംഭവവും ആലപ്പി അഷ്റഫ് ഓർമ്മിപ്പിച്ചു.
പ്രേമലു 2-വിനെക്കുറിച്ച് വലിയ പ്രതീക്ഷ വെച്ചുപുലർത്തിയ സംവിധായകൻ ഗിരീഷ് എ.ഡിയുടെ സ്വപ്നങ്ങൾക്ക് നിറം പകരാൻ നസ്ലിൻ കുറച്ച് വിട്ടുവീഴ്ചകൾക്ക് തയ്യാറാകണമെന്ന് ആലപ്പി അഷ്റഫ് അഭ്യർത്ഥിച്ചു. നടൻ ഒരു പുനർചിന്തനത്തിന് തയ്യാറായാൽ പ്രേക്ഷകർക്ക് നല്ലൊരു കലാസൃഷ്ടി ആസ്വദിക്കാൻ സാധിക്കുമെന്നും, അത് വ്യക്തിബന്ധങ്ങൾ കൂടുതൽ ദൃഢമാക്കാനും പ്രേക്ഷകരുടെ സ്നേഹം വർധിക്കാനും കാരണമാകുമെന്നും അദ്ദേഹം കൂട്ടിച്ചേർത്തു.
