വിശന്നുറങ്ങിയ രാത്രികളിൽ നിന്ന് 14 കോടിയുടെ തിളക്കത്തിലേക്ക്; കാർത്തിക് ശർമ ഒരു പോരാളിയാണ്
ജയ്പ്പൂര്: ഇന്ത്യൻ പ്രീമിയർ ലീഗിലെ (ഐപിഎല്) പുത്തന് താരോദയമായി മാറിയിരിക്കുകയാണ് 19-കാരനായ കാർത്തിക് ശർമ. 14.20 കോടി രൂപയുടെ ഈ മഹാനേട്ടത്തിന് പിന്നിൽ ഒരു കുടുംബത്തിന്റെ വിയർപ്പിന്റെയും കണ്ണീരിന്റെയും വലിയൊരു കഥയുണ്ട്. കൊടിയ ദാരിദ്ര്യത്തോടും പട്ടിണിയോടും പടവെട്ടിയാണ് ഈ ഇടങ്കയ്യൻ ബാറ്റർ ഇന്ന് ഇന്ത്യയിലെ ഏറ്റവും വിലയേറിയ യുവതാരങ്ങളിൽ ഒരാളായി മാറിയത്.
അമ്മയുടെ ആഭരണങ്ങളും അച്ഛന്റെ സ്വപ്നവും
കാർത്തിക്കിന്റെ അച്ഛൻ മനോജ് ശർമയുടെ പാതിവഴിയിൽ നിലച്ചുപോയ സ്വപ്നമായിരുന്നു ക്രിക്കറ്റ്. തന്റെ ദാരിദ്ര്യം മകന്റെ കരിയറിന് തടസ്സമാകരുതെന്ന് അദ്ദേഹം ഉറപ്പിച്ചിരുന്നു. മകന് മികച്ച പരിശീലനം നൽകാനായി കുടുംബത്തിന്റെ ഏക വരുമാനമായ കൃഷിഭൂമിയും അമ്മ രാധയുടെ സ്വർണാഭരണങ്ങളും അവർക്ക് വിൽക്കേണ്ടി വന്നു.
പട്ടിണി കിടന്നുറങ്ങിയ ഗ്വാളിയോർ രാത്രികൾ
ഏറ്റവും പ്രയാസമേറിയ നാളുകളെക്കുറിച്ച് മനോജ് ശർമ ഓർത്തെടുക്കുന്നത് ഇങ്ങനെ: “ഗ്വാളിയോറിൽ ഒരു ടൂർണമെന്റിന് പോയപ്പോൾ കൈയ്യിൽ പണമില്ലാതെ ഞങ്ങൾക്ക് രാത്രി ഷെൽട്ടറിൽ പട്ടിണി കിടന്നുറങ്ങേണ്ടി വന്നിട്ടുണ്ട്. ഫൈനൽ ജയിച്ച് കിട്ടിയ സമ്മാനത്തുക കൊണ്ടാണ് അന്ന് ഞങ്ങൾക്ക് നാട്ടിലേക്ക് മടങ്ങാൻ കഴിഞ്ഞത്.”
ലേലത്തിലെ ആ കണ്ണീർ നിമിഷം
തന്റെ പേര് ലേലത്തിൽ ഉയർന്നപ്പോൾ ഉണ്ടായ വികാരം കാർത്തിക് പങ്കുവെച്ചു: “തുക ഉയരുന്നത് കണ്ടപ്പോൾ എനിക്ക് കരച്ചിൽ നിയന്ത്രിക്കാനായില്ല. ലേലം കഴിഞ്ഞിട്ടും ആ സന്തോഷം കൊണ്ട് ഞാൻ ഒരുപാട് കരഞ്ഞു.” ചെന്നൈ സൂപ്പർ കിങ്സിൽ എം.എസ് ധോണിക്കൊപ്പം കളിക്കാൻ കഴിയുന്നതിന്റെ ആവേശത്തിലാണ് ഈ യുവ വിക്കറ്റ് കീപ്പർ ബാറ്റർ.
മണ്ണിൽ ചവിട്ടി നിൽക്കുന്ന വിജയം
പെട്ടെന്നുണ്ടായ പ്രശസ്തിക്കിടയിലും തന്റെ പഠനം ഉപേക്ഷിക്കില്ലെന്ന് കാർത്തിക് പറയുന്നു. ക്രിക്കറ്റിനൊപ്പം ബിരുദ പഠനവും പൂർത്തിയാക്കണമെന്നത് താരത്തിന് നിർബന്ധമാണ്. ഒരു സാധാരണ കുടുംബം നടത്തിയ വലിയ ത്യാഗങ്ങളുടെയും അചഞ്ചലമായ വിശ്വാസത്തിന്റെയും വിജയമായി കാർത്തിക് ശർമ ഇന്ന് ഇന്ത്യൻ ക്രിക്കറ്റിൽ തിളങ്ങി നിൽക്കുന്നു.
