ഇന്ത്യ അടുത്ത സൂപ്പർ പവർ, യു.എൻ രക്ഷാസമിതിയില് സ്ഥിരാംഗത്വം അനിവാര്യം-ഫിന്നിഷ് പ്രസിഡൻ്റ് സ്റ്റബ്
ഹെൽസിങ്കി: അമേരിക്കയ്ക്കും ചൈനയ്ക്കും ഒപ്പം ലോകത്തിലെ അടുത്ത സൂപ്പർ പവർ ഇന്ത്യയായിരിക്കുമെന്ന് ഫിൻലന്ഡ് പ്രസിഡൻ്റ് അലക്സാണ്ടർ സ്റ്റബ്. ഐക്യരാഷ്ട്രസഭയുടെ രക്ഷാസമിതിയില് (യു.എൻ.എസ്.സി) ഇന്ത്യ സ്ഥിരാംഗമാകേണ്ടത് അത്യന്താപേക്ഷിതമാണെന്നും അദ്ദേഹം പറഞ്ഞു. ഫിൻലാൻ്റ് തലസ്ഥാനമായ ഹെൽസിങ്കിയിൽ ഒരു ദേശീയ മാധ്യമത്തിന് നല്കിയ അഭിമുഖത്തിലാണ് സ്റ്റബിന്റെ അഭിപ്രായ പ്രകടനം..
യു.എൻ രക്ഷാ കൗൺസിലിൽ ഇന്ത്യ സ്ഥിരാംഗമായി ഉണ്ടാകേണ്ടത് അത്യന്താപേക്ഷിതമാണ്. ഇന്ത്യയെപ്പോലുള്ള രാജ്യങ്ങൾ ഇല്ലെങ്കിൽ, യു.എൻ ദുർബലമായിക്കൊണ്ടിരിക്കുമെന്നും അദ്ദേഹം മുന്നറിയിപ്പ് നൽകി. രക്ഷാസമിതിയുടെ ഘടന പുനഃസംഘടിപ്പിക്കേണ്ട സമയം അതിക്രമിച്ചുകഴിഞ്ഞു. കൗൺസിലിൻ്റെ അംഗസംഖ്യ കുറഞ്ഞത് ഇരട്ടിയെങ്കിലും ആക്കണമെന്നും സ്റ്റബ് അഭിപ്രായപ്പെട്ടു.
ലാറ്റിനമേരിക്കയിൽ നിന്ന് ഒരു അംഗം, ആഫ്രിക്കയിൽ നിന്ന് രണ്ട്, ഏഷ്യയിൽ നിന്ന് രണ്ട് എന്നിങ്ങനെ രാജ്യങ്ങളെ കൗൺസിലിൽ ചേർക്കണമെന്ന് താൻ നിർദ്ദേശിച്ചിട്ടുണ്ടെന്നും സ്റ്റബ് വ്യക്തമാക്കി. ഇന്ത്യ പോലുള്ള രാജ്യങ്ങൾ കൗൺസിലിൽ ഇല്ലാത്തത് തെറ്റാണെന്നും അദ്ദേഹം പറഞ്ഞു.
“ഞാൻ ഇന്ത്യയുടെ വലിയ ആരാധകനാണ്. അമേരിക്കയുമായും ചൈനയുമായും ചേർന്ന് ഇന്ത്യ നമ്മുടെ അടുത്ത സൂപ്പർ പവർ ആയിരിക്കുമെന്ന് ഞാൻ കരുതുന്നു. സുരക്ഷാ, രാഷ്ട്രീയ രംഗങ്ങളിൽ പ്രധാനമന്ത്രി നരേന്ദ്ര മോദിയും വിദേശകാര്യ മന്ത്രി എസ്. ജയശങ്കറും സ്വീകരിക്കുന്നത് തന്ത്രപരമായ നിലപാടുകളാണ്”-അലെക്സാണ്ടര് സ്റ്റബ് കൂട്ടിച്ചേര്ത്തു.
