‘കേരളത്തില് നിയമസഭാ തെരഞ്ഞെടുപ്പിന് മുമ്പ് എസ്.ഐ.ആര് വേണ്ട’; എം.വി ഗോവിന്ദന് സുപ്രീം കോടതിയില്
ന്യൂഡല്ഹി: കേരളത്തിലെ വോട്ടര്പട്ടികയ്ക്ക് ഉയര്ന്ന വിശ്വാസ്യതയുണ്ടെന്നും അതിനാല് നിയമസഭാ തെരഞ്ഞെടുപ്പിന് മുമ്പ് വോട്ടര്പട്ടികയുടെ ‘തീവ്ര പരിശോധന’ (എസ്.ഐ.ആര്) നടപ്പാക്കേണ്ടതില്ലെന്നും സി.പി.എം സംസ്ഥാന സെക്രട്ടറി എം.വി ഗോവിന്ദന് സുപ്രീം കോടതിയില്. എസ്.ഐ.ആര് നടപടികള്ക്കെതിരെ സി.പി.എം സുപ്രീം കോടതിയില് നല്കിയ ഹരജിയിലാണ് അദ്ദേഹം ഇക്കാര്യം ആവശ്യപ്പെട്ടത്.
അഭിഭാഷകന് ജി. പ്രകാശ് മുഖേനെയാണ് ഹരജി സുപ്രീം കോടതിയില് ഫയല് ചെയ്തത്. വ്യക്തമായ കാരണങ്ങള് ഉണ്ടെങ്കില് മാത്രമേ തീവ്ര വോട്ടര്പട്ടിക പരിഷ്കരണം നടത്തേണ്ടതുള്ളൂ എന്നാണ് നിയമത്തില് വ്യവസ്ഥ ചെയ്തിരിക്കുന്നത്. എന്നാല്, കേരളം ഉള്പ്പടെ രാജ്യവ്യാപകമായി തീവ്ര വോട്ടര് പട്ടിക പരിഷ്കരണം നടത്താനുള്ള നിര്ദേശത്തില് അതിനുള്ള കാരണം രേഖാമൂലം വിശദീകരിച്ചിട്ടില്ല. അതിനാല് കേരളത്തില് ഇപ്പോള് നടക്കുന്ന എസ്.ഐ.ആര് നിയമപരമായി നിലനില്ക്കുന്നതല്ലെന്നും എം.വി ഗോവിന്ദന് ചൂണ്ടിക്കാട്ടി.
നേരത്തെ, എസ്ഐആര് തദ്ദേശ തെരഞ്ഞെടുപ്പ് കഴിയും വരെ നിര്ത്തിവയ്ക്കണമെന്ന് ആവശ്യപ്പെട്ട് സംസ്ഥാന സര്ക്കാരും സുപ്രീം കോടതിയെ സമീപിച്ചിരുന്നു. ചീഫ് സെക്രട്ടറിയാണ് ഹരജി സമര്പ്പിച്ചത്. കെപിസിസിയും മുസ്ലിം ലീഗും ഇതേ വിഷയത്തില് കോടതിയെ സമീപിച്ചിട്ടുണ്ട്.
