രുചിയിൽ മാത്രമല്ല, ഗുണത്തിലും ‘രാജാവ്’; മാമ്പഴം നൽകുന്ന 10 അത്ഭുത ഗുണങ്ങൾ

പഴങ്ങളുടെ രാജാവ് എന്ന വിശേഷണം മാമ്പഴത്തിന് വെറുതെ ലഭിച്ചതല്ല. രുചിയിൽ മാത്രമല്ല, പോഷകഗുണങ്ങളുടെ കാര്യത്തിലും മാമ്പഴത്തെ വെല്ലാൻ മറ്റൊരു പഴമില്ല. 4,000 വർഷങ്ങളിലേറെയായി ഇന്ത്യയുടെ ഭക്ഷണസംസ്‌കാരത്തിന്റെ ഭാഗമായ മാമ്പഴം ഒരു ‘സൂപ്പർ ഫുഡ്’ കൂടിയാണ്. മാമ്പഴം കഴിക്കുന്നതിലൂടെ ലഭിക്കുന്ന 10 പ്രധാന ആരോഗ്യ ഗുണങ്ങൾ ഇവയാണ്:

• രോഗപ്രതിരോധ ശേഷി കൂട്ടുന്നു: മാമ്പഴം വിറ്റാമിൻ സിയുടെ കലവറയാണ്. ഒരു കപ്പ് മാമ്പഴം കഴിച്ചാൽ ദിവസവും വേണ്ട വിറ്റാമിൻ സിയുടെ 67 ശതമാനവും ലഭിക്കും. ഇത് വെളുത്ത രക്താണുക്കളുടെ ഉത്പാദനം വർദ്ധിപ്പിച്ച് രോഗങ്ങളെ തടയുന്നു.
• ഹൃദയാരോഗ്യം: ഇതിലെ മഗ്‌നീഷ്യം, പൊട്ടാസ്യം എന്നിവ രക്തസമ്മർദ്ദം നിയന്ത്രിക്കാൻ സഹായിക്കുന്നു. മാംഗിഫെറിൻ എന്ന ആന്റിഓക്‌സിഡന്റ് ഹൃദയകോശങ്ങളെ സംരക്ഷിക്കുന്നു.
• ദഹനത്തിന് ഉത്തമം: മാമ്പഴത്തിലെ ‘അമിലേസ്’ (Amylase) എന്ന എൻസൈം ഭക്ഷണത്തെ എളുപ്പത്തിൽ വിഘടിപ്പിക്കാൻ സഹായിക്കുന്നു. കൂടാതെ ഇതിലെ നാരുകൾ മലബന്ധം ഒഴിവാക്കുന്നു.
• കണ്ണിന്റെ ആരോഗ്യം: കണ്ണിന് കുളിർമയേകുന്ന ലുട്ടീൻ, സിയാക്‌സാന്തിൻ എന്നിവയും വിറ്റാമിൻ എയും ഇതിൽ ധാരാളമുണ്ട്.
• ചർമ്മത്തിന് തിളക്കം: വിറ്റാമിൻ സി കൊളാജൻ ഉത്പാദനം കൂട്ടുന്നതിനാൽ ചർമ്മം തിളക്കമുള്ളതാകും.
• അർബുദത്തെ പ്രതിരോധിക്കുന്നു: ഇതിലെ പോളിഫെനോളുകൾ ചിലയിനം ക്യാൻസർ കോശങ്ങളുടെ വളർച്ച തടയാൻ സഹായിക്കും.
• ഗർഭകാല ആരോഗ്യം: ഗർഭസ്ഥ ശിശുവിന്റെ വളർച്ചയ്ക്ക് ആവശ്യമായ ഫോളേറ്റ്, കോപ്പർ എന്നിവ മാമ്പഴത്തിൽ നിന്ന് ലഭിക്കും.
• ശരീരഭാരം നിയന്ത്രിക്കാം: കലോറി സാന്ദ്രത കുറവായതിനാൽ (Low calorie density) വിശപ്പ് കുറയ്ക്കാനും അമിതഭാരം നിയന്ത്രിക്കാനും ഫ്രഷ് മാമ്പഴം സഹായിക്കും.
• വിറ്റാമിനുകളുടെ കലവറ: വിറ്റാമിൻ എ, ബി6, ഇ, കെ എന്നിവയാൽ സമ്പന്നമാണ്.
• പ്രമേഹ സാധ്യത കുറയ്ക്കുന്നു: മിതമായ അളവിൽ കഴിക്കുന്നത് രക്തത്തിലെ പഞ്ചസാരയുടെ അളവ് നിയന്ത്രിക്കാൻ സഹായിക്കുമെന്ന് ചില പഠനങ്ങൾ പറയുന്നു.
  ശ്രദ്ധിക്കാൻ:
  മാമ്പഴത്തിൽ സ്വാഭാവിക മധുരം കൂടുതലായതിനാൽ പ്രമേഹ രോഗികൾ അളവ് നിയന്ത്രിക്കണം. ദിവസവും രണ്ട് കപ്പിൽ കൂടുതൽ (330 ഗ്രാം) കഴിക്കാതിരിക്കുന്നതാണ് ഉചിതം. ഉണക്കിയ മാമ്പഴത്തേക്കാൾ (Dried Mango) എപ്പോഴും നല്ലത് ഫ്രഷ് മാമ്പഴമാണ്.