ഇന്ത്യ ഇനി കുതി കുതിക്കും: ആദ്യ ബുള്ളറ്റ് ട്രെയിൻ 2027 ഓഗസ്റ്റ് 15ന് ഓടിത്തുടങ്ങും
ന്യൂഡൽഹി: രാജ്യത്തെ ആദ്യ ബുള്ളറ്റ് ട്രെയിൻ 2027 ഓഗസ്റ്റ് 15ന് ഓടിത്തുടങ്ങും. മുംബൈ-അഹമ്മദാബാദ് അതിവേഗ റെയിൽ ഇടനാഴിയിലെ ആദ്യഘട്ട സർവീസുകൾ സ്വാതന്ത്ര്യദിനത്തോടനുബന്ധിച്ച് ആരംഭിക്കുമെന്ന് റെയിൽവേ മന്ത്രി അശ്വിനി വൈഷ്ണവ് അറിയിച്ചു.
ഘട്ടം ഘട്ടമായുള്ള ഉദ്ഘാടനം നേരത്തെ സൂറത്തിനും ബിലിമോറയ്ക്കും ഇടയിലുള്ള 50 കിലോമീറ്റർ ദൂരത്തിൽ ആദ്യ സർവീസ് നടത്താനായിരുന്നു പദ്ധതിയെങ്കിലും, ഇപ്പോൾ സൂറത്ത് മുതൽ വാപി വരെയുള്ള 100 കിലോമീറ്റർ ദൂരത്തിലായിരിക്കും ഉദ്ഘാടന ഓട്ടം നടക്കുക. ഇതിനുശേഷം അഹമ്മദാബാദ് വരെയും, തുടർന്ന് താനെയിലേക്കും ഘട്ടം ഘട്ടമായി സർവീസുകൾ വ്യാപിപ്പിക്കും. ഒടുവിൽ മുംബൈ വരെയുള്ള മുഴുവൻ ഇടനാഴിയും പൊതുജനങ്ങൾക്കായി തുറന്നുകൊടുക്കും.
വേഗതയും സൗകര്യങ്ങളും
ദൂരം: സബർമതി മുതൽ മുംബൈ വരെ 508 കിലോമീറ്റർ.
വേഗത: മണിക്കൂറിൽ 320 കിലോമീറ്റർ.
യാത്രാസമയം: മുഴുവൻ റൂട്ടും പ്രവർത്തനസജ്ജമാകുന്നതോടെ മുംബൈയിൽ നിന്ന് അഹമ്മദാബാദിലെത്താൻ വെറും 2 മണിക്കൂർ 17 മിനിറ്റ് മതിയാകും.
2017ൽ ആരംഭിച്ച പദ്ധതി ഭൂമി ഏറ്റെടുക്കലിലെ പ്രതിസന്ധികൾ കാരണം വൈകിയെങ്കിലും, നിലവിൽ നിർമ്മാണ പ്രവർത്തനങ്ങൾ അതിവേഗം പുരോഗമിക്കുകയാണെന്ന് മന്ത്രി വ്യക്തമാക്കി. അത്യാധുനിക ജാപ്പനീസ് സാങ്കേതികവിദ്യയോടെ ഒരുങ്ങുന്ന പാത ഇന്ത്യയുടെ ഗതാഗത മേഖലയിൽ വൻ കുതിച്ചുചാട്ടമുണ്ടാക്കുമെന്നാണ് പ്രതീക്ഷിക്കുന്നത്.
