കൂറുമാറാൻ സിപിഎം വാഗ്ദാനം ചെയ്തത് 50 ലക്ഷം: വടക്കാഞ്ചേരിയിൽ ലീഗ് സ്വതന്ത്രന്റെ ശബ്ദരേഖ പുറത്ത്; വിജിലൻസ് അന്വേഷണം
തൃശ്ശൂർ: വടക്കാഞ്ചേരി ബ്ലോക്ക് പഞ്ചായത്ത് ഭരണം പിടിക്കാൻ സിപിഎം 50 ലക്ഷം രൂപ കോഴ വാഗ്ദാനം ചെയ്തെന്ന ആരോപണത്തിന് ബലമേകി നിർണ്ണായക ശബ്ദരേഖ പുറത്ത്. ലീഗ് പിന്തുണയുള്ള സ്വതന്ത്ര അംഗമായി വിജയിച്ച ഇ.യു ജാഫറും കോൺഗ്രസ് മണ്ഡലം പ്രസിഡന്റും തമ്മിലുള്ള ഫോൺ സംഭാഷണമാണ് പുറത്തുവന്നിരിക്കുന്നത്. സംഭവത്തിൽ വിജിലൻസ് അന്വേഷണം ആരംഭിച്ചു.
ശബ്ദരേഖയിലെ ഉള്ളടക്കം:
വടക്കാഞ്ചേരി ബ്ലോക്ക് തളി ഡിവിഷനിൽ നിന്നും വിജയിച്ച ഇ.യു ജാഫർ, കോൺഗ്രസ് വരവൂർ മണ്ഡലം പ്രസിഡന്റ് എ.എ മുസ്തഫയോട് സംസാരിക്കുന്നതിന്റെ ശബ്ദരേഖയാണ് പുറത്തുവന്നത്. പ്രസിഡന്റ് തെരഞ്ഞെടുപ്പിന്റെ തലേദിവസമായിരുന്നു ഈ സംഭാഷണം.
”സിപിഎം എനിക്ക് രണ്ട് ഓപ്ഷനുകളാണ് നൽകിയിരിക്കുന്നത്. ഒന്നുകിൽ ബ്ലോക്ക് പഞ്ചായത്ത് പ്രസിഡന്റ് ആകാം. അല്ലെങ്കിൽ 50 ലക്ഷം രൂപ കൈപ്പറ്റി സിപിഎം സ്ഥാനാർത്ഥിക്ക് വോട്ട് ചെയ്യാം,” എന്ന് ജാഫർ പറയുന്നത് ഓഡിയോയിൽ വ്യക്തമാണ്.
പണം വാങ്ങി രാഷ്ട്രീയ ജീവിതം അവസാനിപ്പിക്കാനാണ് തന്റെ തീരുമാനമെന്നും, യുഡിഎഫിനൊപ്പം നിന്നാൽ സമനില (7-7) ആകുകയേ ഉള്ളൂവെന്നും തനിക്ക് പ്രത്യേകിച്ച് നേട്ടമൊന്നും ഉണ്ടാകില്ലെന്നും ജാഫർ പറയുന്നുണ്ട്.
എൽഡിഎഫിനും യുഡിഎഫിനും ഏഴ് അംഗങ്ങൾ വീതമുണ്ടായിരുന്ന വടക്കാഞ്ചേരി ബ്ലോക്ക് പഞ്ചായത്തിൽ, ജാഫർ കൂറുമാറി വോട്ട് ചെയ്തതോടെയാണ് എൽഡിഎഫ് ഭരണം പിടിച്ചത്. പ്രസിഡന്റ് തെരഞ്ഞെടുപ്പിൽ എൽഡിഎഫിനെ സഹായിച്ച ജാഫർ, വൈസ് പ്രസിഡന്റ് തെരഞ്ഞെടുപ്പിൽ പങ്കെടുക്കാതെ വിട്ടുനിന്നു. ഇതോടെ വൈസ് പ്രസിഡന്റ് സ്ഥാനവും എൽഡിഎഫിന് ലഭിച്ചു. തെരഞ്ഞെടുപ്പിന് തൊട്ടടുത്ത ദിവസം തന്നെ ജാഫർ മെമ്പർ സ്ഥാനം രാജിവെക്കുകയും ചെയ്തിരുന്ന
കോൺഗ്രസ് നൽകിയ പരാതിയുടെ അടിസ്ഥാനത്തിലാണ് ഇപ്പോൾ വിജിലൻസ് അന്വേഷണം നടക്കുന്നത്. ജനാധിപത്യത്തെ അട്ടിമറിക്കാൻ സിപിഎം പണക്കൊഴുപ്പ് ഉപയോഗിച്ചുവെന്ന ഗുരുതര ആരോപണമാണ് യുഡിഎഫ് ഉന്നയിക്കുന്നത്.
