പേരയ്ക്ക പ്രിയരാണോ? ഈ 4 കൂട്ടര് ശ്രദ്ധിച്ചില്ലെങ്കില് ‘പണികിട്ടും’
വിറ്റാമിന് സിയും നാരുകളും ആവോളം അടങ്ങിയ പേരയ്ക്ക മലയാളികളുടെ ഇഷ്ടപ്പെട്ട പഴങ്ങളിലൊന്നാണ്. പ്രതിരോധശേഷി വര്ധിപ്പിക്കാനും ദഹനം മെച്ചപ്പെടുത്താനും പേരയ്ക്ക ഉത്തമമാണെന്ന് നമുക്കറിയാം. എന്നാല് ‘അമൃതും വിഷമാക്കാം’ എന്ന് പറയുന്നതുപോലെ, ചില ശാരീരികാവസ്ഥകളുള്ളവര് പേരയ്ക്ക കഴിക്കുമ്പോള് അല്പം ജാഗ്രത പാലിക്കേണ്ടതുണ്ട്.
പേരയ്ക്കയിലെ ചില ഘടകങ്ങള് വിപരീത ഫലമുണ്ടാക്കാന് സാധ്യതയുള്ള 4 വിഭാഗം ആളുകളെക്കുറിച്ചാണ് ആരോഗ്യവിദഗ്ധര് മുന്നറിയിപ്പ് നല്കുന്നത്.
- വയറു വീര്ക്കല് (Bloating), ഗ്യാസ് ട്രബിള് എന്നിവയുള്ളവര് പേരയ്ക്കയില് ഫ്രക്ടോസും (Fructose) വിറ്റാമിന് സിയും ഉയര്ന്ന അളവില് അടങ്ങിയിട്ടുണ്ട്. ദഹനസംബന്ധമായ പ്രശ്നങ്ങളുള്ളവരില് ഇവ വയറു വീര്ക്കാനും ഗ്യാസ് നിറയാനും കാരണമായേക്കാം. ഫ്രക്ടോസ് ശരീരം വലിച്ചെടുക്കുന്നതില് തടസ്സം നേരിടുമ്പോഴാണ് വയറുവേദനയും അസ്വസ്ഥതയും ഉണ്ടാകുന്നത്. പ്രത്യേകിച്ച് രാത്രി വൈകിയുള്ള സമയങ്ങളില് പേരയ്ക്ക കഴിക്കുന്നത് ഇക്കൂട്ടര് ഒഴിവാക്കുന്നതാണ് ഉചിതം.
- ഇറിറ്റബിള് ബവല് സിന്ഡ്രോം (IBS) ഉള്ളവര് മലബന്ധം, വയറിളക്കം, വയറുവേദന തുടങ്ങിയ ലക്ഷണങ്ങളുള്ള ‘ഇറിറ്റബിള് ബവല് സിന്ഡ്രോം’ (IBS) ഉള്ളവര് പേരയ്ക്ക മിതമായി മാത്രം ഉപയോഗിക്കുക. പേരയ്ക്കയിലെ അമിതമായ നാരുകള് (Fiber) ദുര്ബലമായ ദഹനവ്യവസ്ഥയുള്ളവരില് ദഹനം വേഗത്തിലാക്കാനും അതുവഴി വയറിളക്കം പോലുള്ള പ്രശ്നങ്ങള് വഷളാക്കാനും സാധ്യതയുണ്ട്.
- പ്രമേഹ രോഗികള് കുറഞ്ഞ ഗ്ലൈസെമിക് ഇന്ഡക്സ് (Low GI) ഉള്ള പഴമായതിനാല് പേരയ്ക്ക പ്രമേഹ രോഗികള്ക്ക് നല്ലതാണെന്ന് പറയാറുണ്ട്. എന്നാല് ഇതില് സ്വാഭാവിക പഞ്ചസാര അടങ്ങിയിട്ടുള്ളതിനാല് അമിതമായി കഴിക്കുന്നത് രക്തത്തിലെ പഞ്ചസാരയുടെ അളവ് വര്ധിക്കാന് ഇടയാക്കും. 100 ഗ്രാം പേരയ്ക്കയില് ഏകദേശം 9 ഗ്രാം പഞ്ചസാര അടങ്ങിയിട്ടുണ്ട്. അതിനാല് പ്രമേഹ രോഗികള് അളവ് നിയന്ത്രിച്ച് മാത്രം ഇത് കഴിക്കാന് ശ്രദ്ധിക്കണം.
- എക്സിമ (Eczema) പോലുള്ള ചര്മ്മരോഗമുള്ളവര് പേരയ്ക്കയിലും അതിന്റെ ഇലയിലും അടങ്ങിയിരിക്കുന്ന ചില രാസസംയുക്തങ്ങള് സെന്സിറ്റീവ് ചര്മ്മമുള്ളവരില് അലര്ജിക്ക് കാരണമാകാം. എക്സിമ പോലുള്ള ചര്മ്മരോഗമുള്ളവരില് ഇത് ചൊറിച്ചിലും ചുവന്ന പാടുകളും ഉണ്ടാക്കാന് സാധ്യതയുണ്ടെന്ന് ചില പഠനങ്ങള് സൂചിപ്പിക്കുന്നു. ഇത്തരം ബുദ്ധിമുട്ടുകള് അനുഭവപ്പെടുന്നുണ്ടെങ്കില് പേരയ്ക്കയുടെ ഉപയോഗം നിര്ത്തിവയ്ക്കണം.
ആരോഗ്യത്തിന് ഏറെ ഗുണകരമാണെങ്കിലും, നിലവില് എന്തെങ്കിലും തരത്തിലുള്ള ആരോഗ്യപ്രശ്നങ്ങള് അനുഭവിക്കുന്നവര് ഡയറ്റില് മാറ്റം വരുത്തുന്നതിന് മുമ്പ് ഡോക്ടറുടെയോ ന്യൂട്രീഷ്യനിസ്റ്റിന്റെയോ ഉപദേശം തേടുന്നത് നന്നായിരിക്കും.
