ഗൃഹസമ്പർക്ക പരിപാടി പാളിയെന്ന് സിപിഎം വിലയിരുത്തൽ
തിരുവനന്തപുരം: തദ്ദേശ സ്വയംഭരണ തെരഞ്ഞെടുപ്പിന് പിന്നാലെ പാർട്ടി സംഘടിപ്പിച്ച ഗൃഹസമ്പർക്ക പരിപാടി പരാജയപ്പെട്ടതായി സിപിഎം സംസ്ഥാന കമ്മിറ്റി വിലയിരുത്തുന്നു. പാർട്ടി തീരുമാനിച്ചത് പോലെ പരിപാടി പൂർത്തിയാക്കാൻ കഴിഞ്ഞില്ലെന്ന് ചൂണ്ടിക്കാട്ടി സംസ്ഥാന കമ്മിറ്റി കീഴ്ഘടകങ്ങൾക്ക് സർക്കുലർ അയച്ചു. ജനങ്ങളുമായുള്ള ബന്ധം സ്ഥാപിക്കുന്നതിൽ പാർട്ടി സഖാക്കൾക്ക് പോരായ്മ സംഭവിച്ചതായാണ് നേതൃത്വത്തിന്റെ കണ്ടെത്തൽ. ഗൃഹസസമ്പർക്ക പരിപാടിയിലൂടെയാണ് വീഴ്ചകൾ ബോധ്യപ്പെട്ടതെന്ന് സംസ്ഥാന നേതൃത്വം വ്യക്തമാക്കുന്നു.
സംഘടനാപരമായ പോരായ്മകൾ പരിഹരിക്കുന്നതിനായി ബൂത്ത് കമ്മിറ്റികൾക്ക് പുറമേ പ്രത്യേക സഹായ കമ്മിറ്റികൾ രൂപീകരിക്കാൻ പാർട്ടി നിർദേശം നൽകി. മുൻകാല പാർട്ടി പ്രവർത്തകർ, അനുഭാവികൾ, പൊതു സമ്മതർ എന്നിവരെയാണ് സഹായ കമ്മിറ്റികളിൽ ഉൾപ്പെടുത്തേണ്ടത്. സാമുദായിക സംഘടനകളുമായി നല്ല ബന്ധം സൂക്ഷിക്കണമെന്നും സർക്കുലറിൽ പ്രത്യേകം നിർദേശിക്കുന്നുണ്ട്. സ്ത്രീകളുടെ പ്രത്യേക സ്ക്വാഡുകൾ രൂപീകരിക്കുമ്പോൾ അതിൽ ന്യൂനപക്ഷ വിഭാഗങ്ങളിൽ നിന്നുള്ളവരെ കൂടി ഉൾപ്പെടുത്തണം. താഴെത്തട്ടിൽ ജനങ്ങളുമായുള്ള സമ്പർക്കം ശക്തമാക്കി പാർട്ടിയുടെ സ്വാധീനം ഉറപ്പിക്കാനാണ് ഈ നീക്കത്തിലൂടെ ലക്ഷ്യമിടുന്നത്.
