ഇറാൻ ആക്രമണം: ഖത്തറിന്റെ ഗ്യാസ് കയറ്റുമതിയിൽ വൻ ഇടിവ്; അറ്റകുറ്റപ്പണികൾ പൂർത്തിയാക്കാൻ അഞ്ച് വർഷം
ദോഹ: ഗൾഫ് മേഖലയിൽ ഇറാൻ നടത്തിയ മിസൈൽ ആക്രമണങ്ങളെത്തുടർന്ന് ഖത്തറിന്റെ ദ്രവീകൃത പ്രകൃതിവാതക (LNG) കയറ്റുമതിയിൽ വൻ ഇടിവ്. ഖത്തറിന്റെ ആകെ കയറ്റുമതി ശേഷിയുടെ 17 ശതമാനത്തോളം തടസ്സപ്പെട്ടതായും ഇത് വാർഷിക വരുമാനത്തിൽ ഏകദേശം 20 ബില്യൺ ഡോളറിന്റെ നഷ്ടമുണ്ടാക്കിയെന്നും ഖത്തർ ഊർജ്ജമന്ത്രി സാദ് അൽ-കാബി അറിയിച്ചു. റമദാൻ മാസത്തിൽ ഒരു മുസ്ലീം രാജ്യത്തിന് നേരെ ഇറാൻ നടത്തിയ ഈ നീക്കം അപ്രതീക്ഷിതമാണെന്നും അദ്ദേഹം കൂട്ടിച്ചേർത്തു.
ആക്രമണത്തിൽ ഖത്തറിലെ പ്രധാനപ്പെട്ട രണ്ട് എൽഎൻജി ട്രെയിനുകൾക്കും ഗ്യാസ്-ടു-ലിക്വിഡ് (GTL) പ്ലാന്റിനും കേടുപാടുകൾ സംഭവിച്ചു. ഇവയുടെ അറ്റകുറ്റപ്പണികൾ പൂർത്തിയാക്കാൻ മൂന്ന് മുതൽ അഞ്ച് വർഷം വരെ എടുത്തേക്കാം. ഇതോടെ ഇന്ത്യ, ചൈന, ദക്ഷിണ കൊറിയ, ഇറ്റലി തുടങ്ങിയ രാജ്യങ്ങളിലേക്കുള്ള വാതക വിതരണത്തിൽ ഖത്തർ ‘ഫോഴ്സ് മജ്യൂർ’ (Force Majeure) പ്രഖ്യാപിച്ചു. ഇന്ത്യക്കാവശ്യമായ പ്രകൃതിവാതകത്തിന്റെ 20 ശതമാനത്തോളം ഖത്തറിൽ നിന്നാണ് എത്തുന്നത് എന്നതിനാൽ, ആഭ്യന്തര വിപണിയിൽ എൽപിജി വില വർദ്ധിക്കാനും വിതരണം തടസ്സപ്പെടാനും ഇത് കാരണമായേക്കാം.
അമേരിക്കൻ കമ്പനിയായ എക്സോൺ മൊബീൽ, ഷെൽ എന്നിവർക്ക് പങ്കാളിത്തമുള്ള പ്ലാന്റുകളാണ് തകർക്കപ്പെട്ടത്. ഇസ്രയേലും ഇറാനും തമ്മിലുള്ള തർക്കത്തിലേക്ക് ഗൾഫ് രാജ്യങ്ങളിലെ ഊർജ്ജ സ്രോതസ്സുകളെ വലിച്ചിഴയ്ക്കരുതെന്ന് ഖത്തർ മുന്നറിയിപ്പ് നൽകി. മേഖലയിലെ സുരക്ഷിത താവളമെന്ന ഖത്തറിന്റെ പ്രതിച്ഛായയ്ക്ക് ആക്രമണം മങ്ങലേൽപ്പിച്ചതായും സാദ് അൽ-കാബി വ്യക്തമാക്കി.
