ആ നാദം നിലച്ചു; ഗായിക ആശ ഭോസ്ലെ അന്തരിച്ചു
മുംബൈ: ഇന്ത്യൻ ചലച്ചിത്ര സംഗീത ലോകത്തെ വികാരദീപ്തമാക്കിയ സ്വപ്നഗായിക ആശാ ഭോസ്ലെ (92) അന്തരിച്ചു. ശ്വാസകോശത്തിലെ അണുബാധയെത്തുടർന്ന് മുംബൈയിലെ ബ്രീച്ച് കാൻഡി ആശുപത്രിയിൽ ചികിത്സയിലിരിക്കെയായിരുന്നു അന്ത്യം. 10-ാം വയസ്സിൽ സംഗീത ലോകത്തേക്ക് ചുവടുവെച്ച അവർ ഏഴ് പതിറ്റാണ്ടിലേറെ നീണ്ട കലാജീവിതത്തിനാണ് വിരാമമിട്ടത്. മലയാളം ഉൾപ്പെടെ 20 ഭാഷകളിലായി 11,000-ലധികം ഗാനങ്ങൾ ആലപിച്ച് ലോക റെക്കോർഡുകളിൽ ഇടംപിടിച്ച ഗായികയാണ് അവർ.
സഹോദരി ലതാ മങ്കേഷ്കറുടെ ശൈലി അനുകരിക്കാതെ തനതായ പാത വെട്ടിത്തെളിച്ച ആശാ ഭോസ്ലെ, ക്ലാസിക്കൽ മുതൽ പോപ്പ്, ഖവാലി, ഗസൽ, ഭജനുകൾ വരെ അനായാസമായി വഴങ്ങുന്ന ശബ്ദത്തിനുടമയായിരുന്നു. 1956-ൽ ഒ.പി നയ്യാർ നൽകിയ ‘സിഐഡി’ എന്ന ചിത്രത്തിലെ പാട്ടിലൂടെയാണ് അവർ വലിയൊരു ബ്രേക്ക് നേടിയത്. പിന്നീട് ആർ.ഡി ബർമ്മനുമായുള്ള സംഗീതക്കൂട്ടുകെട്ടിലൂടെ ഒട്ടനവധി പ്രണയഗാനങ്ങൾ പിറന്നു. 1977-ൽ ‘സുജാത’ എന്ന ചിത്രത്തിലെ ‘സ്വയംവരശുഭദിന’ എന്ന ഒരേയൊരു ഗാനത്തിലൂടെ മലയാളികൾക്കും അവർ സുപരിചിതയായി.
ഗ്രാമി പുരസ്കാരത്തിന് നാമനിർദേശം ചെയ്യപ്പെട്ട ആദ്യ ഇന്ത്യക്കാരിയായ ഇവർക്ക് രാജ്യം പത്മവിഭൂഷൺ, ദാദാ സാഹിബ് ഫാൽക്കെ പുരസ്കാരങ്ങൾ നൽകി ആദരിച്ചിട്ടുണ്ട്. എ.ആർ റഹ്മാൻ ഉൾപ്പെടെയുള്ള ആധുനിക സംഗീത സംവിധായകർക്കൊപ്പവും ഹിറ്റ് ഗാനങ്ങൾ സമ്മാനിച്ച അവർ, കാലത്തെ അതിജീവിക്കുന്ന സ്വരമാധുര്യം കൊണ്ടാണ് ‘മെലഡി റാണി’ എന്ന വിശേഷണം സ്വന്തമാക്കിയത്.
