ബ്രിട്ടനിൽ ചരിത്രം കുറിച്ച് ഇന്ത്യൻ വംശജൻ: 23-ാം വയസ്സിൽ മേയർ പദവിയിലെത്തി തുഷാർ കുമാർ

ലണ്ടൻ: ബ്രിട്ടനിൽ ചരിത്രം കുറിച്ച് ഇന്ത്യൻ വംശജനായ തുഷാർ കുമാർ. 23 കാരനായ അദ്ദേഹം കിഴക്കൻ ഇംഗ്ലണ്ടിലെ എൽസ്ട്രീ ആൻഡ് ബോറെഹാംവുഡ് ടൗൺ കൗൺസിലിൻ്റെ മേയറായി ചുമതലയേറ്റു. ലണ്ടനിലെ കിംഗ്സ് കോളേജിൽ നിന്ന് പൊളിറ്റിക്കൽ സയൻസ് പഠിച്ചിറങ്ങിയ തുഷാർ യുണൈറ്റഡ് കിങ്‌ഡത്തിൻ്റെ ചരിത്രത്തിൽ ഈ പദവിയിലെത്തുന്ന ഏറ്റവും പ്രായം കുറഞ്ഞ ഇന്ത്യൻ വംശജനാണ്. ലേബർ പാർട്ടി അംഗമായ അദ്ദേഹം 2023-ലാണ് ഈ കൗൺസിലിൽ ചേർന്നത്. തുടർന്ന് ഡെപ്യൂട്ടി മേയറായും മികച്ച രീതിയിൽ സേവനമനുഷ്ഠിച്ചിട്ടുണ്ട്.

ചെറിയ പ്രായത്തിൽ ലഭിച്ച ഈ വലിയ പദവിയെ ഒരു വലിയ ബഹുമതിയായി കാണുന്നുവെന്ന് തുഷാർ കുമാർ പറഞ്ഞു. തന്നിൽ വിശ്വാസമർപ്പിച്ച നാട്ടുകാർക്കും സന്നദ്ധ സംഘടനകൾക്കും സഹപ്രവർത്തകർക്കും ഒപ്പം പിന്തുണ നൽകിയ കുടുംബത്തോടും സുഹൃത്തുക്കളോടും അദ്ദേഹം നന്ദി അറിയിച്ചു. മുൻ മേയർ ഡാൻ ഒസാരോവ് നൽകിയ മാർഗ്ഗനിർദ്ദേശങ്ങൾക്ക് നന്ദി പറഞ്ഞ അദ്ദേഹം പുതിയ ഡെപ്യൂട്ടി മേയർ ലിൻഡ സ്‌മിത്തിനൊപ്പം ചേർന്ന് കമ്മ്യൂണിറ്റിയുടെ പുരോഗതിക്കായി പ്രവർത്തിക്കുമെന്നും വ്യക്തമാക്കി.

കോളേജ് വിദ്യാർത്ഥിയായിരിക്കുമ്പോൾ തന്നെ തുഷാർ കൗൺസിലറായി തെരഞ്ഞെടുക്കപ്പെട്ടിരുന്നു. യഥാർത്ഥ മാറ്റങ്ങൾ എപ്പോഴും നമ്മുടെ പ്രാദേശിക സമൂഹത്തിൽ നിന്നാണ് തുടങ്ങുന്നതെന്ന് അദ്ദേഹം വിശ്വസിക്കുന്നു. ലണ്ടനിലെ പഠനകാലത്ത് സിവിക് ലീഡർഷിപ്പ് അക്കാദമി, യൂണിവേഴ്‌സിറ്റി ഓഫീസേഴ്സ് ട്രെയിനിങ് കോർപ്‌സ് എന്നിവയിൽ നിന്ന് ലഭിച്ച പരിശീലനമാണ് തന്റെ പൊതുസേവന താല്‌പര്യം രൂപപ്പെടുത്തിയതെന്നും അദ്ദേഹം കൂട്ടിച്ചേർത്തു. തന്റെ ഈ ജീവിതകഥ മറ്റ് വിദ്യാർത്ഥികൾക്കും ലീഡർഷിപ്പ് രംഗത്തേക്ക് വരാൻ വലിയൊരു പ്രചോദനമാകുമെന്ന് അദ്ദേഹം പ്രത്യാശ പ്രകടിപ്പിച്ചു.

പഠനത്തോടൊപ്പം യു.കെ സർക്കാരിൻ്റെ ഡിപ്പാർട്ട്മെൻ്റ് ഫോർ വർക്ക് ആൻഡ് പെൻഷൻസിൽ പോളിസി അഡ്വൈസറായും ദേശീയ എൽ.ജി.ബി.ടി.ക്യു പ്ലസ് (LGBTQ+) ചാരിറ്റിയിൽ റിസർച്ച് അനലിസ്റ്റായും തുഷാർ പ്രവർത്തിച്ചിട്ടുണ്ട്. കുട്ടികളുടെ വായനാശീലം വളർത്തുന്നതിനുള്ള സന്നദ്ധസേവനങ്ങളിലും അദ്ദേഹം സജീവമാണ്. തന്റെ മേയർ പദവിയുടെ കാലയളവിൽ പാവപ്പെട്ടവർക്ക് ഭക്ഷണം എത്തിക്കുന്ന ‘WD6 ഫുഡ് സപ്പോർട്ട്’ എന്ന സംഘടനക്ക് പ്രത്യേക പിന്തുണ നൽകാനാണ് അദ്ദേഹം തീരുമാനിച്ചിരിക്കുന്നത്.