റാങ്ക് ജേതാവിനെ അനുമോദിക്കാനെത്താൻ വഴിയില്ല; വൈദ്യുതിത്തൂൺ മാറ്റി വഴിയൊരുക്കി പഞ്ചായത്ത്
കവിയൂർ: എംജി സർവകലാശാല ബിഎ പൊളിറ്റിക്കൽ സയൻസിൽ ഒന്നാം റാങ്ക് നേടിയ ശിഖ ശിവദാസിന് അനുമോദനവുമായി എത്തിയവർക്ക് വഴിവിളക്കായി പഞ്ചായത്തും കെഎസ്ഇബിയും കവിയൂർ പഞ്ചായത്ത് അഞ്ചാം വാർഡിൽ കാഞ്ഞിരപ്പാവിൽ ശിവദാസിന്റെ വീട്ടിലേക്കുള്ള ഇടുങ്ങിയ വഴിയിൽ തടസ്സമായി നിന്ന വൈദ്യുതിത്തൂണാണ് അധികൃതർ ഇടപെട്ട് മാറ്റിസ്ഥാപിച്ചത്.
ശിഖയെ അനുമോദിക്കാൻ വീട്ടിലെത്തിയപ്പോഴാണ് അരയടിയോളം മാത്രം വീതിയുള്ള വഴിയിലെ ഈ തടസ്സം പഞ്ചായത്ത് അധികൃതരുടെ ശ്രദ്ധയിൽപ്പെടുന്നത്. തുടർന്ന് പഞ്ചായത്ത് അംഗം സി.ജി ഫിലിപ്പ് ഭരണസമിതി യോഗത്തിൽ ഈ വിഷയം ഉന്നയിക്കുകയും പ്രസിഡന്റും വൈസ് പ്രസിഡന്റും അംഗങ്ങളും ഇതിനെ പിന്തുണയ്ക്കുകയുമായിരുന്നു.
കെഎസ്ഇബി എക്സിക്യൂട്ടീവ് എൻജിനീയർ രാജേഷ് കുമാർ പിള്ള, തോട്ടഭാഗം സെക്ഷൻ അസി. എൻജിനീയർ ദിലീപ് ചാക്കോ എന്നിവരുടെ നിർദേശപ്രകാരം ഉടൻ തന്നെ തൂൺ മാറ്റാനുള്ള നടപടികൾ സ്വീകരിച്ചു. ഇതിനായി വന്ന മുഴുവൻ തുകയും ശിഖയ്ക്കുള്ള സമ്മാനമായി തോട്ടഭാഗം സെക്ഷനിലെ ജീവനക്കാർ തങ്ങളുടെ പൊതുനന്മാ ഫണ്ടിൽ നിന്നാണ് കണ്ടെത്തിയത്.
