അനധികൃത നിർമ്മാണമെന്നാരോപിച്ച് പാതിരാത്രി പള്ളി പൊളിച്ചുമാറ്റി; യുപിയിൽ വീണ്ടും ബുൾഡോസർ രാജ്
സംഭൽ: ഉത്തർപ്രദേശിലെ സംഭൽ ജില്ലയിൽ അനധികൃതമായി നിർമ്മിച്ചതാണെന്നാരോപിച്ച് ഭരണകൂടം രണ്ട് ബുൾഡോസറുകൾ ഉപയോഗിച്ച് പള്ളി തകർത്തു. നഖാസ പോലീസ് സ്റ്റേഷൻ പരിധിയിലുള്ള കസേർവ ഗ്രാമത്തിൽ സ്ഥിതി ചെയ്യുന്ന മുസ്തഫ ഖാദ്രി മസ്ജിദാണ് രാത്രി വൈകി പൂർണ്ണമായും പൊളിച്ചുമാറ്റിയത്. ശ്മശാനത്തിനായി മാറ്റിവെച്ചിരുന്ന ഗ്രാമസഭാ ഭൂമിയിലാണ് ഈ പള്ളി അനധികൃതമായി നിർമ്മിച്ചിരിക്കുന്നതെന്നാണ് ഉദ്യോഗസ്ഥർ നൽകുന്ന വിശദീകരണം. പള്ളിയുടെ ഒരു ഭാഗം നേരത്തെ തന്നെ പൊളിച്ചുമാറ്റിയിരുന്നുവെന്നും ബാക്കിയുള്ള ഭാഗമാണ് പുതിയ നടപടിയിൽ തകർത്തതെന്നും അധികൃതർ വ്യക്തമാക്കി.
പള്ളി തകർത്തതുമായി ബന്ധപ്പെട്ട മുൻ നടപടികൾ പരിശോധിക്കാൻ ഇന്ത്യൻ നാഷണൽ കോൺഗ്രസ് പ്രതിനിധി സംഘം ഗ്രാമത്തിലെത്തിയതിന് പിന്നാലെയാണ് രാത്രിയിലെ ഈ പൊളിച്ചുമാറ്റൽ നടന്നത്. വിഷയത്തിൽ സ്ഥിതിഗതികൾ വിലയിരുത്തിയ ശേഷം സംസ്ഥാന നേതൃത്വത്തിന് റിപ്പോർട്ട് സമർപ്പിക്കുമെന്ന് കോൺഗ്രസ് സംഘം അറിയിച്ചു. കോൺഗ്രസ് പ്രതിനിധി സംഘം മടങ്ങിയതിന് പിന്നാലെ ഭരണകൂടം നടപടികൾ വേഗത്തിലാക്കുകയും കെട്ടിടത്തിന്റെ അവശിഷ്ടങ്ങൾ നീക്കം ചെയ്യുകയും ചെയ്തു. പള്ളിയുടെ അവശേഷിക്കുന്ന ഭാഗങ്ങൾ ബുൾഡോസറുകൾ ഉപയോഗിച്ച് തകർക്കുന്നതിന്റെയും അവശിഷ്ടങ്ങൾ മാറ്റുന്നതിന്റെയും വീഡിയോകൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്.
ഭരണകൂടത്തിന്റെ ഈ നടപടിക്കെതിരെ പ്രതിപക്ഷ പാർട്ടികളായ സമാജ്വാദി പാർട്ടിയും കോൺഗ്രസും രൂക്ഷവിമർശനവുമായി രംഗത്തെത്തി. യാതൊരുവിധ നിയമനടപടികളും പാലിക്കാതെയാണ് ഭരണകൂടം ധൃതിപിടിച്ച് പള്ളി പൊളിച്ചതെന്ന് ഇരു പാർട്ടികളും ആരോപിച്ചു. പള്ളി നിന്നിരുന്ന സ്ഥലം സർക്കാരിന്റേതല്ലെന്നും അത് വഖഫ് ബോർഡിന്റെ സ്വത്താണെന്നും സമാജ്വാദി പാർട്ടി നേതാവ് സിയാ ഉർ റഹ്മാൻ ബർഖ് അവകാശപ്പെട്ടു. ഭരണകൂടത്തിന്റെ നടപടി തെറ്റാണെന്നും ഇതിനെതിരെ കോടതിയെ സമീപിക്കുമെന്നും അദ്ദേഹം വ്യക്തമാക്കി. അതേസമയം, പള്ളി പൊളിക്കുന്നതിനിടെ ‘ഐ ലവ് മുഹമ്മദ്’ എന്നെഴുതിയ പോസ്റ്ററുകൾ പള്ളിക്കുള്ളിൽ നിന്ന് കണ്ടെത്തിയതായി അധികൃതർ അറിയിച്ചു. പോലീസ് സൂപ്രണ്ടിന്റെ നിർദ്ദേശപ്രകാരം ഈ പോസ്റ്ററുകളുമായി ബന്ധപ്പെട്ട് പോലീസ് പ്രത്യേക കേസെടുത്ത് അന്വേഷണം ആരംഭിച്ചിട്ടുണ്ട്.
