‘പാർട്ടി എന്നെ തഴഞ്ഞു; ആറുമാസം ശ്രമിച്ചിട്ടും രാജീവ് ചന്ദ്രശേഖറിനെ ഫോണിൽ കിട്ടിയില്ല’; തുറന്നടിച്ച് നടൻ ദേവൻ 

തിരുവനന്തപുരം: ബിജെപി സംസ്ഥാന നേതൃത്വത്തിനെതിരെ രൂക്ഷവിമർശനവുമായി പാർട്ടി സംസ്ഥാന ഉപാധ്യക്ഷനും നടനുമായ ദേവൻ. പാർട്ടി തന്നോട് അവഗണന കാണിച്ചെന്ന് ഒരു മലയാള മാധ്യത്തോട് സംസാരിക്കവെ അദ്ദേഹം വ്യക്തമാക്കി. ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖറിനെ ഫോണിൽ ബന്ധപ്പെടാൻ ആറുമാസമായി ശ്രമിച്ചിട്ടും സാധിച്ചില്ലെന്ന് അദ്ദേഹം പറഞ്ഞു.

മൂന്ന് തെരഞ്ഞെടുപ്പുകളിൽ പാർട്ടിക്ക് വേണ്ടി പ്രചാരണത്തിനിറങ്ങിയിട്ടും തഴയപ്പെട്ട സാഹചര്യത്തിലാണ് രാജിയെന്ന് ദേവൻ കൂട്ടിച്ചേർത്തു. അതേസമയം ബിജെപി ദേശീയ നേതൃത്വത്തോടൊ നരേന്ദ്ര മോദിയോടൊ തനിക്ക് അഭിപ്രായവ്യത്യാസങ്ങളില്ല. പെട്ടെന്നുണ്ടായ തീരുമാനമല്ലിതെന്നും ഒരുവർഷമായി രാജിയെക്കുറിച്ച് ആലോചിക്കുകയായിരുന്നുവെന്നും അദ്ദേഹം വ്യക്തമാക്കി.

സീറ്റ് കിട്ടാത്തതല്ല പ്രശ്നം. എംഎൽഎയോ എംപിയോ മന്ത്രിയോ ആകാനല്ല രാഷ്ട്രീയത്തിൽ വന്നത്. പാർട്ടി തെരഞ്ഞെടുപ്പുകളിൽ ഉപയോഗിക്കുന്ന തന്ത്രങ്ങളോടുള്ള അഭിപ്രായവ്യത്യാസം അറിയിക്കാൻ ശ്രമിച്ചിട്ടും സംസ്ഥാന നേതൃത്വം കേൾക്കാൻ തയ്യാറായില്ല. മുൻപുണ്ടായിരുന്ന സ്വന്തം പാർട്ടി പുനരുജ്ജീവിപ്പിക്കാനാണ് തീരുമാനമെന്നും രാജി പ്രഖ്യാപിച്ച ശേഷമുള്ള ആദ്യ പ്രതികരണത്തിൽ ദേവൻ വ്യക്തമാക്കി.