‘ഇന്ത്യൻ ജുഡീഷ്യറിയിലെ മൂടിവെക്കപ്പെട്ട രഹസ്യം; നിരവധി വനിതാ ജഡ്ജിമാർ ലൈംഗികാതിക്രമത്തിന് ഇരയാകുന്നു’; ഞെട്ടിക്കുന്ന വെളിപ്പെടുത്തലുമായി മുതിർന്ന അഭിഭാഷക ഇന്ദിര ജയ്സിങ്
ന്യൂഡൽഹി: ഇന്ത്യൻ നീതിന്യായ വ്യവസ്ഥയ്ക്കുള്ളിലെ ഞെട്ടിക്കുന്ന വിവരങ്ങൾ വെളിപ്പെടുത്തി സുപ്രീം കോടതിയിലെ മുതിർന്ന അഭിഭാഷക ഇന്ദിര ജയ്സിങ്. രാജ്യത്തെ ജുഡീഷ്യറിക്കുള്ളിൽ ലൈംഗികാതിക്രമം എന്നത് പരസ്യമായി സംസാരിക്കാൻ ആരും തയ്യാറാകാത്ത, തികച്ചും ‘മൂടിവെക്കപ്പെട്ട ഒരു രഹസ്യമാണെന്ന്’ അവർ തുറന്നടിച്ചു. പുരുഷ സഹപ്രവർത്തകരിൽ നിന്നും നേരിടേണ്ടി വന്ന ലൈംഗികാതിക്രമങ്ങൾ ചൂണ്ടിക്കാട്ടി നിരവധി വനിതാ ജഡ്ജിമാർ തന്നെ സമീപിച്ചിട്ടുണ്ടെന്ന ഗുരുതരമായ വെളിപ്പെടുത്തലും അവർ നടത്തി. ന്യൂഡൽഹിയിൽ നടന്ന 29-ാമത് ഡി.എസ് ബോർക്കർ മെമ്മോറിയൽ ലെക്ചറിൽ സംസാരിക്കുകയായിരുന്നു അവർ.
ജുഡീഷ്യൽ സിസ്റ്റത്തിൽ നിലനിൽക്കുന്ന മേൽക്കീഴ് ബന്ധങ്ങളും ശ്രേണീബദ്ധമായ ഘടനയുമാണ് ഇത്തരം അതിക്രമങ്ങൾക്ക് പ്രധാന കാരണമെന്ന് ഇന്ദിര ജയ്സിങ് ചൂണ്ടിക്കാട്ടി. ഒരു പുരുഷ ജഡ്ജിയുടെ 25-ാം വിവാഹവാർഷിക ആഘോഷത്തിൽ പങ്കെടുക്കാനും അവിടെ ഒരു ‘ഐറ്റം നമ്പറിന്’ ഡാൻസ് ചെയ്യാനും നിർബന്ധിക്കപ്പെട്ട ഒരു വനിതാ ജഡ്ജിക്ക് വേണ്ടി താൻ ഹാജരായ സംഭവം അവർ വേദിയിൽ ഓർത്തെടുത്തു. ഈ ആവശ്യം നിരസിച്ചതിനെ തുടർന്ന് ആ വനിതാ ജഡ്ജിക്ക് സ്വന്തം ജോലി തന്നെ നഷ്ടപ്പെടുകയായിരുന്നു. 2047-ഓടെ ഇത്തരം മോശം പ്രവണതകൾ അവസാനിക്കുമെന്നാണ് താൻ കരുതുന്നതെന്നും അവർ കൂട്ടിച്ചേർത്തു.
മുതിർന്ന അഭിഭാഷകൻ ഡോ. എസ് മുരളീധറിന്റെ പ്രഭാഷണത്തിന് ശേഷമാണ് അവർ വേദിയിലെത്തിയത്. നീതിന്യായ വ്യവസ്ഥയിൽ വേരുറപ്പിച്ചിട്ടുള്ള ജന്മിത്വ രീതികൾക്കെതിരെ ഡോ. മുരളീധറും ശക്തമായി പ്രതികരിച്ചിരുന്നു. മുതിർന്ന പുരുഷ സഹപ്രവർത്തകരിൽ നിന്നും വനിതാ ജഡ്ജിമാർ നേരിടുന്ന ചൂഷണങ്ങൾ വർധിച്ചുവരുന്നതായി അദ്ദേഹവും തന്റെ പ്രഭാഷണത്തിൽ ചൂണ്ടിക്കാട്ടിയിരുന്നു.
ഇത്തരം അനീതികൾ നിറഞ്ഞ വ്യവസ്ഥിതിയിൽ ഇന്ത്യൻ ഭരണഘടനയാണ് തന്റെ ഏക പ്രതീക്ഷയെന്ന് ഇന്ദിര ജയ്സിങ് പറഞ്ഞു. ഭരണഘടന മാറ്റിയെഴുതാനുള്ള ഭരണകക്ഷിയുടെ നീക്കങ്ങളെ ചെറുക്കാൻ പൗരന്മാർക്ക് കഴിയുന്നിടത്തോളം കാലം ഇവിടെ പ്രതീക്ഷയുണ്ട്. വനിതാ സംവരണ ബില്ലിനെ മണ്ഡല പുനർനിർണയവുമായി ബന്ധിപ്പിക്കുന്നതും, ‘ഒരേ രാജ്യം ഒരേ തിരഞ്ഞെടുപ്പ്’ എന്ന ആശയവുമെല്ലാം ഭരണഘടനയെ തകർക്കാനുള്ള നീക്കങ്ങളാണെന്നും അവർ ആരോപിച്ചു. പാർലമെന്റിൽ പ്രതിപക്ഷ പ്രാതിനിധ്യം കുറയ്ക്കുന്നതിനായി രാഷ്ട്രീയ പാർട്ടികളിലെ വിമത വിഭാഗങ്ങൾക്ക് ഔദ്യോഗിക ചിഹ്നങ്ങൾ നൽകുന്ന പ്രവണതയെയും അവർ രൂക്ഷമായി വിമർശിച്ചു.
