ദുബൈയിൽ ജുമുഅയ്ക്ക് പോയ മലയാളി യുവാവ് കാറിനുള്ളിൽ മരിച്ച നിലയിൽ
ദുബൈ: വെള്ളിയാഴ്ച ജുമുഅ പ്രാർഥനയ്ക്കായി പള്ളിയിലേക്ക് പുറപ്പെട്ട മലയാളി യുവാവിനെ കാറിനുള്ളിൽ മരിച്ച നിലയിൽ കണ്ടെത്തി. കാസർകോട് കാഞ്ഞങ്ങാട് നോർത്ത് ചിത്താരി മീത്തൽ സ്വദേശി ടി.വി ഫിറോസ് (32) ആണ് മരിച്ചത്. ഹൃദയാഘാതമാണ് മരണകാരണമെന്ന് ബന്ധുക്കൾ അറിയിച്ചു.
താമസസ്ഥലത്തുനിന്ന് ഒറ്റയ്ക്ക് കാറോടിച്ച് പള്ളിയിലേക്ക് പുറപ്പെട്ട ഫിറോസിനെ പിന്നീട് കാറിന്റെ ഡ്രൈവിങ് സീറ്റിൽ അബോധാവസ്ഥയിൽ കണ്ടെത്തുകയായിരുന്നു. ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ദുബൈയിൽ സഹോദരങ്ങൾക്കൊപ്പം സൂപ്പർമാർക്കറ്റ് നടത്തിവരികയായിരുന്നു അദ്ദേഹം.
പരേതരായ മൊയ്തീൻ ഹാജി – മറിയം ദമ്പതികളുടെ മകനാണ്. ഭാര്യ: ഹാദിയ. മൃതദേഹം നാട്ടിലെത്തിക്കാനുള്ള നിയമനടപടികൾ പുരോഗമിക്കുന്നു.
