‘സിനിമ എനിക്ക് ഒട്ടും ഇഷ്ടമല്ല, മറ്റൊരു അവസരം കിട്ടിയാൽ വിട്ടുപോകും’: നിത്യ മേനോൻ
മലയാളികള്‍ക്ക് ഏറെ പ്രിയപ്പെട്ട നടിയാണ് നിത്യ മേനോന്‍. തെന്നിന്ത്യന്‍ സിനിമാലോകത്ത് തന്റേതായ ഇടം നേടിയ താരം, തനിക്ക് സിനിമ ഒട്ടും ഇഷ്ടമല്ലെന്നും മറ്റൊരു അവസരം ലഭിച്ചാല്‍ ഈ രംഗം വിട്ടുപോകുമെന്നും തുറന്നുപറഞ്ഞു. തമിഴ് യൂട്യൂബ് ചാനലിന് നല്‍കിയ അഭിമുഖത്തിലാണ് നിത്യ മേനോന്‍ ഇക്കാര്യം വ്യക്തമാക്കിയത്.
തന്റെ വ്യക്തിത്വത്തിന് തികച്ചും വ്യത്യസ്തമായ മേഖലയാണ് സിനിമയെന്നും, തനിക്ക് പൈലറ്റാകാനായിരുന്നു ആഗ്രഹമെന്നും താരം പറഞ്ഞു. ”എനിക്ക് ഒട്ടും ഇഷ്ടമല്ലാത്ത പ്രൊഫഷനായിരുന്നു സിനിമ. ഇപ്പോഴും അത് അങ്ങനെ തന്നെയാണ്. എനിക്ക് മറ്റൊരു ഓപ്ഷന്‍ കിട്ടിയാല്‍ ഞാന്‍ ഇത് വിട്ട് പോകും,” നിത്യ വ്യക്തമാക്കി.
2008-ല്‍ കെ.പി കുമാരന്‍ സംവിധാനം ചെയ്ത ‘ആകാശഗോപുരം’ എന്ന ചിത്രത്തിലൂടെയാണ് നിത്യ അഭിനയരംഗത്തേക്ക് കടന്നുവരുന്നത്. തുടര്‍ന്ന് ‘ഉസ്താദ് ഹോട്ടല്‍’, ‘ബാംഗ്ലൂര്‍ ഡെയ്‌സ്’ തുടങ്ങിയ ചിത്രങ്ങളിലൂടെ മലയാളി പ്രേക്ഷകരുടെ പ്രിയതാരമായി മാറി. ജേണലിസത്തില്‍ ബിരുദധാരിയായ താരം യാദൃശ്ചികമായാണ് സിനിമയിലേക്ക് എത്തിയത്. സംവിധായകന്‍ ഡി.കെ ഒരുക്കുന്ന ഫാന്റസി ഡാര്‍ക്ക് കോമഡി ചിത്രമാണ് നിത്യയുടെതായി ഇനി പുറത്തിറങ്ങാനുള്ളത്.
