ലോകകപ്പ് ആഘോഷത്തിനിടെ ദേശീയ പതാകയോട് അനാദരവ്; ഹാർദിക് പാണ്ഡ്യക്കെതിരെ പരാതി
മുംബൈ: ടി20 ലോകകപ്പ് വിജയ ആഘോഷത്തിനിടെ ദേശീയ പതാകയെ അപമാനിച്ചുവെന്നാരോപിച്ച് ഇന്ത്യൻ ക്രിക്കറ്റ് താരം ഹാർദിക് പാണ്ഡ്യക്കെതിരെ പരാതി. അഹമ്മദാബാദിലെ സ്റ്റേഡിയത്തിൽ നടന്ന ആഘോഷങ്ങൾക്കിടെ പാണ്ഡ്യ മോശമായി പെരുമാറിയെന്ന് ചൂണ്ടിക്കാട്ടി അഭിഭാഷകനായ വാജിദ് ഖാനാണ് പുനെ പോലീസിനെ സമീപിച്ചത്. പാണ്ഡ്യക്കെതിരെ എഫ്ഐആർ രജിസ്റ്റർ ചെയ്യണമെന്നാണ് പരാതിയിലെ ആവശ്യം.
ന്യൂസിലൻഡിനെതിരായ ഫൈനൽ വിജയത്തിന് ശേഷം ശരീരത്തിൽ ത്രിവർണ്ണ പതാക പുതച്ച പാണ്ഡ്യ, മൈതാനത്ത് അശ്ലീലമായി പെരുമാറിയെന്നും ഇത് ദേശീയ പതാകയുടെ അന്തസ്സിന് വിരുദ്ധമാണെന്നും വാജിദ് ഖാൻ പരാതിയിൽ ആരോപിക്കുന്നു. ശിവാജി നഗർ പോലീസ് സ്റ്റേഷനിൽ ലഭിച്ച പരാതി അപേക്ഷ പോലീസ് സ്ഥിരീകരിച്ചിട്ടുണ്ട്. ദേശീയ പതാകയെ ബഹുമാനിക്കേണ്ടത് ഓരോ പൗരന്റെയും കടമയാണെന്നും നിയമപരമായ നടപടികൾ വേണമെന്നും പരാതിക്കാരൻ ആവശ്യപ്പെട്ടു.
അതേസമയം, തുടർച്ചയായ രണ്ടാം ടി20 ലോകകപ്പ് കിരീടനേട്ടം താൻ സ്വയം നൽകിയ വാഗ്ദാനത്തിന്റെ പൂർത്തീകരണമാണെന്ന് ഹാർദിക് പാണ്ഡ്യ പ്രതികരിച്ചു. 2024-ലെ ലോകകപ്പിന് മുമ്പ് വ്യക്തിപരമായ ഏറെ പ്രയാസങ്ങളിലൂടെയാണ് താൻ കടന്നുപോയതെന്നും, എന്നാൽ ശക്തമായ തിരിച്ചുവരവ് ലക്ഷ്യമിട്ടിരുന്നുവെന്നും അദ്ദേഹം പറഞ്ഞു.
“ബാർബഡോസിലെ വിജയത്തിന് ശേഷം, ഏത് ടൂർണമെന്റിലും ട്രോഫി ലക്ഷ്യമിട്ട് മാത്രമേ കളിക്കൂ എന്ന് ഞാൻ ഉറപ്പിച്ചിരുന്നു. അഹമ്മദാബാദിലെ വിജയം അതിന്റെ സാക്ഷ്യപ്പെടുത്തലാണ്,” പാണ്ഡ്യ പറഞ്ഞു. ടൂർണമെന്റിൽ രണ്ട് അർദ്ധസെഞ്ച്വറികളും ഒമ്പത് വിക്കറ്റുകളും താരം വീഴ്ത്തിയിരുന്നു. 2026 ലോകകപ്പിനുള്ള ഐസിസി ടീമിലും 32-കാരനായ പാണ്ഡ്യ ഇടംപിടിച്ചിട്ടുണ്ട്.
