ഇറാൻ ഭരണകൂടം തകർന്നിട്ടില്ല, കൂടുതൽ ശക്തമായി തിരിച്ചുവരും; യുഎസ് ഇന്റലിജൻസ് റിപ്പോർട്ട്

വാഷിങ്ടൺ- യുഎസ്-ഇസ്രായേലുമായുള്ള നേരിട്ടുള്ള സംഘർഷങ്ങളിലും ആഭ്യന്തര പ്രതിസന്ധികളിലും പെട്ട് ഇറാന്റെ ഭരണകൂടത്തിന് കനത്ത ആഘാതമേറ്റിട്ടുണ്ടെങ്കിലും അത് ഇപ്പോഴും സുരക്ഷിതമാണെന്ന് യുഎസ് നാഷണൽ ഇന്റലിജൻസ് ഡയറക്ടർ തുളസി ഗബ്ബാർഡ്. ഇസ്രായേൽ നടത്തിയ വ്യോമാക്രമണങ്ങളിൽ ഇറാന്റെ മിസൈൽ നിർമ്മാണ കേന്ദ്രങ്ങൾക്കും തന്ത്രപ്രധാനമായ വ്യോമ പ്രതിരോധ സംവിധാനങ്ങൾക്കും വലിയ നാശനഷ്ടങ്ങൾ സംഭവിച്ചിട്ടുണ്ട്. ഈ തിരിച്ചടികൾ ഇറാൻ ഭരണകൂടത്തെ പ്രതിരോധത്തിലാക്കിയിട്ടുണ്ടെങ്കിലും, നിലനിൽപ്പിനായുള്ള പോരാട്ടത്തിൽ അവർ പതറിയിട്ടില്ലെന്നും തകർന്ന സൈനിക ശേഷി വരും വർഷങ്ങളിൽ വീണ്ടെടുക്കാൻ ഇറാൻ പരമാവധി ശ്രമിക്കുമെന്നും അമേരിക്കൻ രഹസ്യാന്വേഷണ വിഭാഗം വിലയിരുത്തുന്നു. ഇസ്രായേലുമായുള്ള നേരിട്ടുള്ള യുദ്ധം ഒഴിവാക്കാൻ ശ്രമിക്കുമ്പോഴും, തങ്ങളുടെ പ്രതിരോധ കവചം പുനർനിർമ്മിക്കാനാണ് ഇറാൻ ഇപ്പോൾ മുൻഗണന നൽകുന്നത്.

മേഖലയിലെ തങ്ങളുടെ സ്വാധീനം നിലനിർത്താൻ ഹമാസ്, ഹിസ്ബുള്ള തുടങ്ങിയ പ്രോക്സി ഗ്രൂപ്പുകളെ ഇറാൻ തുടർന്നും പിന്തുണയ്ക്കുമെന്ന് റിപ്പോർട്ട് വ്യക്തമാക്കുന്നു. ഒക്ടോബർ ഏഴിന് ശേഷം മിഡിൽ ഈസ്റ്റിലുണ്ടായ മാറ്റങ്ങൾ തങ്ങൾക്ക് അനുകൂലമാക്കാനും മേഖലയിലെ അമേരിക്കൻ വിരുദ്ധ വികാരം മുതലെടുക്കാനും ഇറാൻ ശ്രമിക്കുന്നുണ്ട്. ഇറാന്റെ ആണവ പദ്ധതികളെക്കുറിച്ചും ഗൗരവകരമായ മുന്നറിയിപ്പുകൾ റിപ്പോർട്ടിലുണ്ട്. നിലവിൽ ഒരു ആണവായുധം നിർമ്മിക്കാനുള്ള പ്രവർത്തനങ്ങൾ ഇറാൻ നേരിട്ട് നടത്തുന്നില്ലെങ്കിലും, അതിന് ആവശ്യമായ സാങ്കേതിക വിദ്യകൾ അവർ ഇതിനോടകം വികസിപ്പിച്ചെടുത്തിട്ടുണ്ട്. ചുരുങ്ങിയ ആഴ്ചകൾക്കുള്ളിൽ ആണവായുധം നിർമ്മിക്കാൻ പാകത്തിലുള്ള യുറേനിയം സമ്പുഷ്ടീകരണ ശേഷി ഇറാൻ കൈവരിച്ചിട്ടുണ്ടെന്നും ഇത് വലിയ സുരക്ഷാ ഭീഷണിയാണെന്നും തുളസി ഗബ്ബാർഡ് ചൂണ്ടിക്കാട്ടി.

ഇറാന്റെ ആഭ്യന്തര സാഹചര്യങ്ങളെക്കുറിച്ചും റിപ്പോർട്ട് പരാമർശിക്കുന്നുണ്ട്. സാമ്പത്തിക പ്രതിസന്ധിയും ജനകീയ പ്രതിഷേധങ്ങളും ഭരണകൂടത്തിന് വെല്ലുവിളിയാകുന്നുണ്ടെങ്കിലും അധികാരം നിലനിർത്താനുള്ള കടുത്ത നടപടികളുമായി അവർ മുന്നോട്ട് പോവുകയാണ്. ഇസ്രായേലിന്റെ ആക്രമണങ്ങൾ ഇറാന്റെ ആത്മവിശ്വാസത്തെ ബാധിച്ചിട്ടുണ്ട്, എന്നാൽ തങ്ങളുടെ തന്ത്രപരമായ ലക്ഷ്യങ്ങളിൽ നിന്ന് പിന്മാറാൻ അവർ തയ്യാറല്ല. റഷ്യയുമായുള്ള വർദ്ധിച്ചുവരുന്ന സൈനിക സഹകരണം ഇറാന്റെ പ്രതിരോധ ശേഷി വർദ്ധിപ്പിക്കാൻ സഹായിക്കുമെന്നും അമേരിക്കൻ ഇന്റലിജൻസ് വിഭാഗം ആശങ്ക പ്രകടിപ്പിക്കുന്നു. വരും കാലയളവിൽ തങ്ങളുടെ തകർന്ന സൈനിക സംവിധാനങ്ങൾ ആധുനികവൽക്കരിക്കാനും മിസൈൽ സാങ്കേതികവിദ്യ കൂടുതൽ കരുത്തുറ്റതാക്കാനുമുള്ള തീവ്ര ശ്രമത്തിലായിരിക്കും ഇറാൻ ഭരണകൂടമെന്നും റിപ്പോർട്ട് പറയുന്നു.