‘അർജന്റീന ടീം കേരളത്തെ വഞ്ചിച്ചു; നഷ്ടപരിഹാരം നൽകേണ്ടി വരും’- വി അബ്ദുറഹിമാൻ
തിരൂർ: അർജന്റീന ഫുട്ബോൾ ടീം കേരളത്തെ വഞ്ചിച്ചുവെന്നും ഇതിന് അവർ നഷ്ടപരിഹാരം നൽകേണ്ടി വരുമെന്നും മന്ത്രി വി അബ്ദുറഹിമാൻ. ലയണൽ മെസിയെയും സംഘത്തെയും കേരളത്തിലെത്തിക്കാൻ നടത്തിയ ശ്രമങ്ങൾ പരാജയപ്പെട്ട പശ്ചാത്തലത്തിലാണ് തിരൂരിലെ ഇടതു സ്ഥാനാർഥി കൂടിയായ മന്ത്രിയുടെ പ്രതികരണം.
ടീമിനെ എത്തിക്കാൻ സർക്കാർ ഫണ്ട് ഉപയോഗിച്ചിട്ടില്ലെന്നും സ്പോൺസറെ കണ്ടെത്തിയിരുന്നുവെന്നും അദ്ദേഹം വ്യക്തമാക്കി. ടീം വരാമെന്ന് ഏറ്റിരുന്നെങ്കിലും അവസാന നിമിഷം പിന്മാറുകയായിരുന്നു. ഇതിനെതിരെ സ്പോൺസർ നിയമനടപടി സ്വീകരിക്കുമെന്ന് അറിയിച്ചിട്ടുണ്ട്. അർജന്റീന അഞ്ചോളം രാജ്യങ്ങളിൽ നിന്ന് പണം വാങ്ങിയിട്ടും കളിക്കാൻ പോയില്ലെന്നാണ് അറിയാൻ കഴിഞ്ഞതെന്നും മന്ത്രി പറഞ്ഞു.
താൻ ആ ടീമിന്റെ വലിയ ആരാധകനാണെന്നും ഫുട്ബോൾ പ്രേമികൾക്കുണ്ടായ അതേ നിരാശ തനിക്കുമുണ്ടെന്നും അദ്ദേഹം കൂട്ടിചേർത്തു. നിരന്തര ചർച്ചകൾ നടത്തിയിട്ടും ടീം വഞ്ചിച്ചതിൽ ദുഃഖമുണ്ടെന്നും മന്ത്രി തിരൂരിൽ പറഞ്ഞു.
