‘കോളും എസ്എംഎസും മാത്രം’; ചെറിയ തുകയ്ക്കുള്ള മൊബൈൽ പ്ലാനുകൾ നിർബന്ധമാക്കാൻ നിർദേശിച്ച് ട്രായ്
ന്യൂഡൽഹി: മൊബൈൽ റീചാർജ് പ്ലാനുകളിൽ വിപ്ലവകരമായ മാറ്റങ്ങൾ ലക്ഷ്യമിട്ട് ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്) പുതിയ നിർദേശങ്ങൾ പുറത്തിറക്കി. വോയ്സ് കോളിങ്ങിനും എസ്എംഎസ് സേവനങ്ങൾക്കും മാത്രമായി കുറഞ്ഞ നിരക്കിലുള്ള പ്രത്യേക പ്ലാനുകൾ അവതരിപ്പിക്കാൻ ടെലികോം കമ്പനികളെ നിർബന്ധിക്കുന്ന കരട് നിർദേശമാണ് ട്രായ് മുന്നോട്ട് വച്ചിരിക്കുന്നത്. നിലവിൽ ഡാറ്റ ഉൾപ്പെടുത്തിയുള്ള ബണ്ടിൽഡ് പ്ലാനുകൾ വാങ്ങാൻ ഉപഭോക്താക്കൾ നിർബന്ധിതരാകുന്ന സാഹചര്യം ഒഴിവാക്കി, ആവശ്യമില്ലാത്ത സേവനങ്ങൾക്ക് പണം നൽകുന്നത് തടയുകയാണ് ഇതിലൂടെ ലക്ഷ്യമിടുന്നത്.
2026-ലെ ടെലികോം ഉപഭോക്തൃ സംരക്ഷണ ഭേദഗതി ചട്ടങ്ങൾ പ്രകാരം, ഡാറ്റയും വോയ്സും ഉൾപ്പെടുന്ന ഓരോ സ്പെഷ്യൽ താരിഫ് വൗച്ചറിനും (STV) തുല്യമായ കാലാവധിയുള്ള വോയ്സ്-എസ്എംഎസ് പ്ലാനുകൾ കൂടി കമ്പനികൾ ലഭ്യമാക്കണം. നിലവിൽ ഇത്തരം പ്ലാനുകൾ 84 ദിവസം അല്ലെങ്കിൽ ഒരു വർഷം തുടങ്ങിയ ദീർഘകാല വാലിഡിറ്റികളിൽ മാത്രമാണ് ലഭ്യമാകുന്നതെന്നും ഇത് ഉപഭോക്താക്കളുടെ തെരഞ്ഞെടുപ്പിനെ പരിമിതപ്പെടുത്തുന്നുവെന്നും ട്രായ് നിരീക്ഷിച്ചു. പുതിയ നിയമം വരുന്നതോടെ എല്ലാ കാലയളവുകളിലും ഡാറ്റയില്ലാത്ത പ്ലാനുകൾ തെരഞ്ഞെടുക്കാൻ ഉപഭോക്താക്കൾക്ക് സാധിക്കും.
ബണ്ടിൽ ചെയ്ത പ്ലാനുകളിൽ നിന്ന് ഡാറ്റാ ആനുകൂല്യങ്ങൾ നീക്കം ചെയ്യുമ്പോൾ അതിനനുസരിച്ചുള്ള വിലക്കുറവ് വോയ്സ് പ്ലാനുകളിൽ നൽകുന്നില്ലെന്ന ഗൗരവകരമായ പ്രശ്നവും ട്രായ് ചൂണ്ടിക്കാട്ടിയിട്ടുണ്ട്. ഡാറ്റ ഒഴിവാക്കുമ്പോൾ നിരക്കിൽ ആനുപാതികമായ കുറവ് വരുത്തി പ്ലാനുകൾ കൂടുതൽ താങ്ങാനാവുന്നതാക്കണം. കുറഞ്ഞ വരുമാനമുള്ളവർ, ഗ്രാമീണ വരിക്കാർ, പ്രായമായവർ എന്നിവർക്ക് ഈ തീരുമാനം വലിയ ആശ്വാസമാകും. പുതിയ പ്ലാനുകൾ കമ്പനികൾ വെബ്സൈറ്റുകളിലും ആപ്പുകളിലും റീട്ടെയിൽ ഔട്ട്ലെറ്റുകളിലും വ്യക്തമായി പ്രസിദ്ധീകരിക്കണമെന്നും റെഗുലേറ്റർ നിർദേശിച്ചു. ഈ കരട് നിയമത്തിന്മേൽ ഏപ്രിൽ 28-നകം അഭിപ്രായങ്ങൾ സമർപ്പിക്കാൻ ബന്ധപ്പെട്ടവരോട് ട്രായ് ആവശ്യപ്പെട്ടിട്ടുണ്ട്.
