‘ടീമിന് ലോകകപ്പ് നേടാൻ നല്ലത് എന്താണോ ആ തീരുമാനമെടുക്കൂ’; ‘ആ ഒരൊറ്റ മറുപടിയോടെ അവനോടുള്ള ബഹുമാനം ഇരട്ടിയായി’; സഞ്ജുവിൻ്റെ നിസ്വാർത്ഥതയെക്കുറിച്ച് മനസ്സ് തുറന്ന് സൂര്യകുമാർ യാദവ്

ന്യൂഡൽഹി: 2026-ലെ ഐ.സി.സി ടി20 ലോകകപ്പിൽ ഇന്ത്യയെ കിരീടത്തിലേക്ക് നയിക്കുന്നതിൽ നിർണായക പങ്കുവഹിച്ച മലയാളി വിക്കറ്റ് കീപ്പർ ബാറ്റർ സഞ്ജു സാംസന്റെ നിസ്വാർത്ഥമായ മനോഭാവത്തെക്കുറിച്ചും അസാധാരണമായ ക്ഷമയെക്കുറിച്ചും തുറന്നുപറഞ്ഞ് ഇന്ത്യൻ നായകൻ സൂര്യകുമാർ യാദവ്. മുൻ ഇന്ത്യൻ താരവും കമന്റേറ്ററുമായ ആകാശ് ചോപ്രയ്ക്ക് നൽകിയ പ്രത്യേക അഭിമുഖത്തിലാണ് ടീം സെലക്ഷനുമായി ബന്ധപ്പെട്ട് തങ്ങൾക്കിടയിൽ നടന്ന വികാരനിർഭരമായ ആ സംഭാഷണം സൂര്യകുമാർ വെളിപ്പെടുത്തിയത്.

2026 ടി20 ലോകകപ്പിൽ അഞ്ച് ഇന്നിങ്സുകളിൽ നിന്നായി 80.25 ശരാശരിയിലും 199.38 സ്ട്രൈക്ക് റേറ്റിലും 321 റൺസ് അടിച്ചുകൂട്ടി ഇന്ത്യയുടെ ടോപ് സ്കോററായ സഞ്ജു ‘പ്ലെയർ ഓഫ് ദി ടൂർണമെന്റ്’ പുരസ്കാരവും സ്വന്തമാക്കിയിരുന്നു. പാകിസ്ഥാന്റെ സാഹിബ്സാദ ഫർഹാനും ന്യൂസിലൻഡിന്റെ ടിം സീഫെർട്ടിനും പിന്നിൽ റൺവേട്ടക്കാരുടെ പട്ടികയിൽ മൂന്നാമതായിരുന്നു സഞ്ജുവെങ്കിലും നോക്കൗട്ട് മത്സരങ്ങളിൽ അദ്ദേഹം പുറത്തെടുത്ത മാച്ച് വിന്നിങ് പ്രകടനങ്ങളാണ് ഇന്ത്യയ്ക്ക് കിരീടം നേടിക്കൊടുത്തത്. വെസ്റ്റ് ഇൻഡീസിനെതിരായ വെർച്വൽ ക്വാർട്ടർ ഫൈനലിൽ 50 പന്തിൽ പുറത്താകാതെ നേടിയ 97 റൺസ്, സെമി ഫൈനലിൽ ഇംഗ്ലണ്ടിനെതിരെ 42 പന്തിൽ നേടിയ 89 റൺസ്, ന്യൂസിലൻഡിനെതിരായ ഫൈനലിൽ 46 പന്തിൽ അടിച്ചുകൂട്ടിയ 89 റൺസ് എന്നിവ ഇതിൽ നിർണായകമായിരുന്നു.

എന്നാൽ ഈ സ്വപ്നതുല്യമായ പ്രകടനത്തിന് തൊട്ടുമുമ്പ് സഞ്ജുവിന്റെ ബാറ്റിങ് ഫോമിൽ ചെറിയൊരു ഇടിവ് സംഭവിച്ചിരുന്നുവെന്നും, അതേസമയം ആഭ്യന്തര ക്രിക്കറ്റിൽ മികച്ച ഫോമിലായിരുന്ന ഇഷാൻ കിഷന്റെ കടന്നുവരവ് ടീം സെലക്ഷനെ സങ്കീർണ്ണമാക്കിയിരുന്നുവെന്നും സൂര്യകുമാർ ഓർത്തെടുക്കുന്നു. 2026-ലെ ന്യൂസിലൻഡ് പരമ്പരയിൽ സഞ്ജുവിന് റൺസ് കണ്ടെത്താൻ സാധിക്കാതിരുന്നപ്പോൾ, ആഭ്യന്തര സീസണിലെ മികവുമായി എത്തിയ ഇഷാൻ മൂന്നാം നമ്പറിൽ 5/2, 6/2 തുടങ്ങിയ തകർച്ചകളിൽപ്പോലും ആക്രമിച്ചു കളിക്കുകയായിരുന്നു.

ഇതോടെ ടീം ബസിൽ യാത്ര ചെയ്യുന്നതിനിടെയാണ് സഞ്ജുവിനോട് ടീമിലെ സ്ഥാനത്തെക്കുറിച്ച് താൻ തുറന്നു സംസാരിച്ചതെന്ന് സൂര്യ പറഞ്ഞു. “ചേട്ടാ, നിലവിലെ കാര്യങ്ങൾ വെച്ച് നോക്കുമ്പോൾ പ്ലേയിങ് ഇലവനിലേക്ക് വരുന്നത് ബുദ്ധിമുട്ടായിരിക്കുമെന്നാണ് തോന്നുന്നത്” എന്നാണ് താൻ സഞ്ജുവിനോട് പറഞ്ഞത്. എന്നാൽ തന്റെ സ്ഥാനത്തിനായി വാദിക്കുന്നതിന് പകരം തികച്ചും അപ്രതീക്ഷിതമായ മറുപടിയാണ് സഞ്ജു നൽകിയത്. “ഭാവു, ഈ ടീമിന് ലോകകപ്പ് നേടാൻ ഏതാണ് ഏറ്റവും നല്ല തീരുമാനമെങ്കിൽ അതുമായി മുന്നോട്ട് പോവുക. ടീമിന് എപ്പോഴെങ്കിലും എന്നെ ആവശ്യമുണ്ടെങ്കിൽ ഞാൻ ഇവിടെത്തന്നെയുണ്ടാകും. മത്സരത്തിൽ കളിക്കുന്നതുപോലെ തന്നെ പൂർണ്ണ സജ്ജനായി ഞാൻ എല്ലാ തയ്യാറെടുപ്പുകളും നടത്തും” എന്നായിരുന്നു സഞ്ജുവിന്റെ പ്രതികരണം.

പ്രൊഫഷണൽ കായികരംഗത്ത് അപൂർവ്വമായി മാത്രം കാണുന്ന നിസ്വാർത്ഥതയാണ് സഞ്ജു അന്ന് പ്രകടിപ്പിച്ചതെന്നും, ആ മറുപടി കേട്ടപ്പോൾ തനിക്ക് അതിയായ ആത്മവിശ്വാസമാണ് തോന്നിയതെന്നും സൂര്യകുമാർ വ്യക്തമാക്കി. താൻ ഇത്രയും കാലം നന്നായി കളിച്ചിട്ടും എന്തുകൊണ്ട് അവസരം നൽകുന്നില്ല എന്ന് മറ്റൊരു താരമായിരുന്നെങ്കിൽ തർക്കിക്കുമായിരുന്നുവെന്നും, എന്നാൽ വ്യക്തിഗത നേട്ടങ്ങളേക്കാൾ ടീമിന്റെ ലോകകപ്പ് വിജയത്തിനാണ് സഞ്ജു മുൻഗണന നൽകിയതെന്നും അദ്ദേഹം ഓർത്തു. പിന്നീട് ടൂർണമെന്റിന്റെ പകുതിയിൽ വെച്ച് ടീമിൽ തിരിച്ചെത്തിയപ്പോൾ ലഭിച്ച അവസരം പൂർണ്ണമായും വിനിയോഗിച്ച് സഞ്ജു ടീമിന്റെ നട്ടെല്ലായി മാറുകയായിരുന്നു.

പ്ലേയിങ് ഇലവനിൽ തിരിച്ചെത്തി ഫൈനൽ കളിച്ച് ഇന്ത്യയ്ക്ക് ലോകകപ്പ് നേടിത്തരികയും ടൂർണമെന്റിലെ താരമായി മാറുകയും ചെയ്തതോടെ സഞ്ജുവിനോടുള്ള തന്റെ ബഹുമാനം ഇരട്ടിയായെന്നും, നല്ല മനുഷ്യർക്ക് എപ്പോഴും നല്ലതുതന്നെ സംഭവിക്കുമെന്നും സൂര്യകുമാർ കൂട്ടിച്ചേർത്തു. വ്യക്തിഗത റെക്കോർഡുകൾക്ക് അപ്പുറം ടീമിന്റെ വിജയത്തിന് മുൻഗണന നൽകുന്ന ഇത്തരം കളിക്കാരുടെ മനോഭാവവും ഡ്രസ്സിംഗ് റൂമിലെ പരസ്പര വിശ്വാസവുമാണ് സമ്മർദ്ദഘട്ടങ്ങളിൽ വലിയ കിരീടങ്ങൾ നേടാൻ ടീമിനെ സഹായിക്കുന്നതെന്നും അദ്ദേഹം അടിവരയിട്ടു.