കാഴ്ചശക്തി മുതൽ കരൾ സംരക്ഷണം വരെ; തുടർച്ചയായി രണ്ടാഴ്ച മുട്ട കഴിച്ചാൽ ശരീരത്തിൽ സംഭവിക്കുന്ന അത്ഭുതങ്ങൾ ഇതാ!

ആരോഗ്യത്തിന് മുട്ട മികച്ചതാണ്. ശരീരത്തിന് ആവശ്യമായ ഊർജ്ജവും പോഷകങ്ങളും നൽകുന്നതിൽ പ്രോട്ടീനുകൾക്ക് വലിയ പങ്കുണ്ട്. പലപ്പോഴും നമ്മുടെ ദൈനംദിന ഭക്ഷണക്രമത്തിൽ ഏറ്റവും കൂടുതൽ അവഗണിക്കപ്പെടുന്ന മാക്രോ ന്യൂട്രിയന്റാണ് പ്രോട്ടീൻ. എന്നാൽ പേശികളുടെ വളർച്ചയ്ക്കും ഹോർമോൺ ബാലൻസിനും മറ്റ് ശാരീരിക പ്രവർത്തനങ്ങൾക്കും ഉയർന്ന നിലവാരമുള്ള പ്രോട്ടീൻ കൃത്യമായ അളവിൽ ലഭിക്കേണ്ടത് അത്യാവശ്യമാണ്. ഇന്നത്തെ കാലത്ത് സംസ്‌കരിച്ച ഭക്ഷണങ്ങളുടെ ഉപയോഗം വർദ്ധിച്ചു വരുന്നതിനാൽ ശരീരത്തിന് ഗുണമേന്മയുള്ള പോഷകങ്ങൾ ലഭിക്കുന്നത് കുറഞ്ഞു വരികയാണ്. ഈ സാഹചര്യത്തിലാണ് പോഷകങ്ങളുടെ കലവറയായ മുട്ട നമ്മുടെ ഭക്ഷണത്തിന്റെ ഒഴിച്ചുകൂടാനാവാത്ത ഭാഗമായി മാറുന്നത്.

എയിംസ്, ഹാർവാർഡ്, സ്റ്റാൻഫോർഡ് സർവകലാശാലകളിൽ നിന്ന് പരിശീലനം നേടിയ ലോകപ്രശസ്ത ഗ്യാസ്‌ട്രോഎൻട്രോളജിസ്റ്റ് ഡോക്ടർ സേഥി, അടുത്തിടെ തന്റെ ഇൻസ്റ്റാഗ്രാം പോസ്റ്റിലൂടെ മുട്ടയുടെ ഗുണങ്ങൾ വെളിപ്പെടുത്തിയിരുന്നു. വെറും രണ്ടാഴ്ച തുടർച്ചയായി മുട്ട കഴിക്കുന്നത് ശരീരത്തിൽ അത്ഭുതകരമായ മാറ്റങ്ങൾ ഉണ്ടാക്കുമെന്നാണ് അദ്ദേഹം വ്യക്തമാക്കുന്നത്. മുട്ടയുടെ അവിശ്വസനീയമായ പോഷക പ്രൊഫൈലിനെക്കുറിച്ച് അദ്ദേഹം വിശദമായ റിപ്പോർട്ടാണ് പങ്കുവെച്ചത്.

മുട്ടയുടെ വെള്ളയിലും മഞ്ഞക്കരുവിലും വ്യത്യസ്ത അളവിൽ പ്രോട്ടീൻ അടങ്ങിയിട്ടുണ്ടെന്ന് ഡോ. സേഥി ചൂണ്ടിക്കാട്ടുന്നുണ്ട്. ഒരു മുഴുവൻ മുട്ടയിൽ ഏകദേശം 6.5 ഗ്രാം പ്രോട്ടീൻ അടങ്ങിയിട്ടുണ്ട് (മഞ്ഞക്കരുവിൽ 2.5 ഗ്രാമും വെള്ളയിൽ 4 ഗ്രാമും). ഇതിനെ ഹൈ ക്വാളിറ്റി പ്രോട്ടീൻ എന്നാണ് അദ്ദേഹം വിശേഷിപ്പിക്കുന്നത്. മുട്ട നിങ്ങളുടെ നിത്യജീവിതത്തിന്റെ ഭാഗമാക്കുന്നതിലൂടെ ലഭിക്കുന്ന പ്രധാന ഗുണങ്ങൾ താഴെ പറയുന്നവയാണ്:

*കാഴ്ചശക്തി വർദ്ധിപ്പിക്കുന്നു: വാർദ്ധക്യസഹജമായ കാഴ്ച പ്രശ്‌നങ്ങളായ മാക്കുലാർ ഡീജനറേഷൻ (Macular Degeneration) , തിമിരം എന്നിവ തടയാൻ മുട്ടയിലെ പോഷകങ്ങൾ സഹായിക്കുന്നു. റെറ്റിനയുടെ മധ്യഭാഗത്തെ ബാധിക്കുന്ന അവസ്ഥയാണ് മാക്കുലാർ ഡീജനറേഷൻ. ഇത് വശങ്ങളിലെ കാഴ്ച നിലനിർത്തിക്കൊണ്ട് തന്നെ മധ്യഭാഗത്തെ കാഴ്ച മങ്ങാൻ കാരണമാകുന്നു. മുട്ടയിലെ ആന്റിഓക്‌സിഡന്റുകൾ കണ്ണിന്റെ ലെൻസുകളെ സംരക്ഷിക്കുകയും തിമിരം മൂലം കാഴ്ച മേഘാവൃതമാകുന്നത് തടയുകയും ചെയ്യുന്നു.

*തലച്ചോറിന്റെ ആരോഗ്യവും ഫാറ്റി ലിവർ പ്രതിരോധവും: തലച്ചോറിന്റെ പ്രവർത്തനങ്ങളെ സജീവമാക്കുന്ന കോളിൻ (choline) എന്ന പോഷകം മുട്ടയിൽ സമൃദ്ധമാണ്. ഇത് ഓർമ്മശക്തിയും ഏകാഗ്രതയും വർദ്ധിപ്പിക്കാൻ സഹായിക്കുന്നു. കൂടാതെ, ഇന്ന് ഇന്ത്യക്കാർക്കിടയിൽ വ്യാപകമായിക്കൊണ്ടിരിക്കുന്ന ഫാറ്റി ലിവർ തടയാനും കോളിൻ അത്യന്താപേക്ഷിതമാണ്. ഓരോ മൂന്ന് ഇന്ത്യക്കാരിൽ ഒരാൾക്ക് ഫാറ്റി ലിവർ ഉണ്ടെന്നാണ് പുതിയ കണക്കുകൾ വ്യക്തമാക്കുന്നത്. കരൾ വീക്കം കുറയ്ക്കാനും കൊഴുപ്പ് അടിയുന്നത് തടയാനും മുട്ടയിലെ പോഷകങ്ങൾ സഹായിക്കും.

*കൊളസ്‌ട്രോളും രക്തത്തിലെ പഞ്ചസാരയും: മുട്ട കഴിക്കുന്നത് കൊളസ്‌ട്രോൾ വർദ്ധിപ്പിക്കുമെന്നത് ഒരു തെറ്റിദ്ധാരണ മാത്രമാണെന്ന് ഡോക്ടർ പറയുന്നു. മുട്ട ശരീരത്തിലെ നല്ല കൊളസ്‌ട്രോൾ (HDL) വർദ്ധിപ്പിക്കുകയാണ് ചെയ്യുന്നത്. പ്രഭാതഭക്ഷണത്തിൽ മുട്ട ഉൾപ്പെടുത്തുന്നത് രക്തത്തിലെ പഞ്ചസാരയുടെ അളവ് ക്രമീകരിക്കാനും ദിവസം മുഴുവൻ ഉന്മേഷം നിലനിർത്താനും സഹായിക്കും.

മുട്ട എങ്ങനെ കഴിക്കണം?
മുട്ട കഴിക്കുന്ന രീതി അതിന്റെ ഗുണനിലവാരത്തെ ബാധിക്കും. മുട്ട പുഴുങ്ങിയോ (Boiled), പോച്ച് ചെയ്‌തോ (Poached), ചട്ടിയിൽ കുറഞ്ഞ എണ്ണയിൽ വറുത്തോ കഴിക്കുന്നതാണ് ഏറ്റവും ആരോഗ്യകരം. മുട്ടയുടെ പോഷകഗുണം വർദ്ധിപ്പിക്കാൻ ചീര, തക്കാളി, കൂൺ, ഉള്ളി തുടങ്ങിയ പച്ചക്കറികൾ ചേർത്ത് ഓംലെറ്റായോ മറ്റോ കഴിക്കാവുന്നതാണ്. എന്നാൽ ഹൃദയാരോഗ്യം നിലനിർത്താൻ, ബേക്കൺ പോലെയുള്ള സംസ്‌കരിച്ച മാംസങ്ങളുമായി (Processed meats) മുട്ട ചേർത്ത് കഴിക്കുന്നത് ഒഴിവാക്കണമെന്ന് വിദഗ്ധർ മുന്നറിയിപ്പ് നൽകുന്നുണ്ട്.

മുട്ട കഴിക്കാൻ സാധിക്കാത്ത സസ്യാഹാരികൾക്ക് ടോഫു (Tofu) മികച്ച പകരക്കാരനായി ഡോക്ടർ നിർദ്ദേശിക്കുന്നു. ആരോഗ്യകരമായ ജീവിതശൈലി ആഗ്രഹിക്കുന്നവർക്ക് ഈ ചെറിയ മാറ്റങ്ങൾ വലിയ പ്രയോജനം നൽകും.

ശ്രദ്ധിക്കുക: ഭക്ഷണക്രമത്തിൽ വലിയ മാറ്റങ്ങൾ വരുത്തുന്നതിന് മുമ്പ് നിങ്ങളുടെ ഡോക്ടറുടെയോ ഡയറ്റീഷ്യന്റെയോ നിർദ്ദേശം തേടുന്നത് ഉചിതമായിരിക്കും.