ആകാശപ്പോരിൽ ലോകത്തെ ഞെട്ടിച്ച് തുർക്കിയുടെ ‘കിസിലെൽമ’; പൈലറ്റില്ലാതെ ഒപ്പത്തിനൊപ്പം പറന്ന് യുദ്ധവിമാനങ്ങൾ

ഇസ്താംബുൾ: ആഗോള വ്യോമയാന ചരിത്രത്തിൽ പുതിയ നാഴികക്കല്ല് കുറിച്ചു തുർക്കി. ടർക്കിഷ് പ്രതിരോധ ഭീമനായ ബേക്കർ (Baykar) വികസിപ്പിച്ച രണ്ട് ‘കിസിലെൽമ’ (Kizilelma) ആളില്ലാ യുദ്ധവിമാനങ്ങൾ പൂർണ്ണമായും സ്വയംഭരണാധികാരത്തോടെ (Autonomous) ഒരേസമയം പറക്കൽ നടത്തി ലോകത്തെ അമ്പരപ്പിച്ചു. മനുഷ്യന്റെ യാതൊരുവിധ നിയന്ത്രണങ്ങളുമില്ലാതെ, കൃത്രിമബുദ്ധി (AI) ഉപയോഗിച്ച് രണ്ട് ജെറ്റ് പവർ ഡ്രോണുകൾ ചേർന്ന് നടത്തുന്ന ലോകത്തിലെ ആദ്യത്തെ ‘ക്ലോസ് ഫോർമേഷൻ ഫ്‌ലൈറ്റ്’ ആണിതെന്ന് കമ്പനി ഔദ്യോഗികമായി സ്ഥിരീകരിച്ചു.

കഴിഞ്ഞ ദിവസം തുർക്കി വ്യോമാതിർത്തിയിലായിരുന്നു നിർണ്ണായക പരീക്ഷണം നടന്നത്. അതിവേഗ സബ്‌സോണിക് വേഗതയിൽ സഞ്ചരിക്കുമ്പോഴും വിമാനങ്ങൾ തമ്മിലുള്ള കൃത്യമായ അകലം പാലിക്കാനും ഏകോപനത്തോടെ നീങ്ങാനും ഇവയ്ക്ക് സാധിച്ചു. ഓൺബോർഡ് സെൻസറുകൾ, തത്സമയ ഡാറ്റാ കൈമാറ്റം, നൂതന അൽഗോരിതങ്ങൾ എന്നിവ വഴിയാണ് പൈലറ്റില്ലാതെ വിമാനങ്ങൾ ആകാശത്ത് വിസ്മയം തീർത്തത്. റിമോട്ട് പൈലറ്റഡ് ഡ്രോണുകളിൽ നിന്ന് മാറി, സ്വന്തമായി ചിന്തിക്കാനും തീരുമാനമെടുക്കാനും കഴിവുള്ള സ്വതന്ത്ര യുദ്ധവിമാനങ്ങളിലേക്കുള്ള ചുവടുമാറ്റമാണിത്.

എന്താണ് കിസിലെൽമയുടെ പ്രത്യേകത?
പരമ്പരാഗത ഡ്രോണുകളിൽ നിന്ന് വ്യത്യസ്തമായി ആധുനിക അഞ്ചാം തലമുറ യുദ്ധവിമാനങ്ങളോട് കിടപിടിക്കുന്ന സവിശേഷതകളാണ് കിസിലെൽമയ്ക്കുള്ളത്. സ്‌റ്റെൽത്ത് ഷേപ്പിംഗ് (Stealth Shaping), ആന്തരിക ആയുധ സംഭരണശാല, അതിവേഗ ചടുലത എന്നിവ ഇതിന്റെ പ്രധാന പ്രത്യേകതകളാണ്. ഏകദേശം 6,000 കിലോഗ്രാം ഭാരം വഹിക്കാൻ ശേഷിയുള്ള വിമാനം കരയിൽ നിന്നും കടലിൽ നിന്നും ഒരേപോലെ പ്രവർത്തിപ്പിക്കാം. പ്രത്യേകിച്ചും, തുർക്കിയുടെ ‘ടിസിജി അനഡോലു’ (TCG Anadolu) പോലുള്ള വിമാനവാഹിനിക്കപ്പലുകളിൽ നിന്ന് കാറ്റപ്പൾട്ടുകളുടെ സഹായമില്ലാതെ തന്നെ ഇവയ്ക്ക് പറന്നുയരാനാകും എന്നത് നാവികയുദ്ധ രംഗത്ത് വലിയ മാറ്റങ്ങൾ കൊണ്ടുവരും.

അമേരിക്കയുടെ സ്‌കൈബോർഗ്, ചൈനയുടെ ലോയൽ വിംഗ്മാൻ തുടങ്ങിയ പദ്ധതികൾ വികസന ഘട്ടത്തിലായിരിക്കെയാണ് തുർക്കി ഈ നേട്ടം പരസ്യമായി പ്രദർശിപ്പിച്ചിരിക്കുന്നത്. യുദ്ധരംഗത്ത് പൈലറ്റുമാരുടെ ജീവൻ അപകടത്തിലാക്കാതെ തന്നെ ശത്രുവിന്റെ വ്യോമപ്രതിരോധം തകർക്കാനും എയർ-ടു-എയർ പോരാട്ടങ്ങൾ നടത്താനും ഈ ‘AI പൈലറ്റുമാർക്ക്’ സാധിക്കും. ഭാവിയിൽ മനുഷ്യൻ നിയന്ത്രിക്കുന്ന വിമാനങ്ങൾക്കൊപ്പം ഒരു സംഘമായി പ്രവർത്തിക്കാനും (MUM-T) സാങ്കേതികവിദ്യ സഹായിക്കും.

ഭാവി പദ്ധതികൾ
പരീക്ഷണങ്ങൾ വിജയകരമായി പൂർത്തിയാക്കിയതോടെ 2026ൽ കിസിലെൽമയുടെ വൻതോതിലുള്ള സീരിയൽ ഉത്പാദനം ആരംഭിക്കുമെന്ന് ബേക്കർ അറിയിച്ചു. അടുത്ത 18 മാസത്തിനുള്ളിൽ തുർക്കി നാവികസേനയുടെയും വ്യോമസേനയുടെയും ഭാഗമായി വിമാനങ്ങൾ ഔദ്യോഗികമായി വിന്യസിക്കപ്പെടും. വരും വർഷങ്ങളിൽ കാഴ്ചയ്ക്ക് അപ്പുറത്തുള്ള (Beyond Visual Range) പോരാട്ട മുറകളും ഈ വിമാനങ്ങൾ പരീക്ഷിക്കും. ആഗോളതലത്തിൽ പ്രതിരോധ സാങ്കേതികവിദ്യയുടെ കയറ്റുമതിയിൽ തുർക്കിയെ മുൻനിര ശക്തിയായി ഈ നേട്ടം മാറ്റുമെന്നാണ് വിദഗ്ധരുടെ വിലയിരുത്തൽ.