7 വര്ഷം മുന്പ് ഓട്ടോ ഡ്രൈവർ: ഇന്ന് വിമാന കമ്പനി ഉടമ; ‘ശംഖ് എയറി’നു പിന്നിലെ അവിശ്വസനീയ ജീവിതം
ലഖ്നൗ: ഉത്തർപ്രദേശിന്റെ ആദ്യത്തെ സ്വകാര്യ വിമാനക്കമ്പനിയായ ‘ശംഖ് എയർ’ (Shankh Air) 2026 ജനുവരിയോടെ ചിറകുവിരിക്കാൻ ഒരുങ്ങുമ്പോൾ, രാജ്യം ഉറ്റുനോക്കുന്നത് അതിന്റെ അമരക്കാരനായ ശ്രാവൺ കുമാർ വിശ്വകർമയിലേക്കാണ്. വെറും ഏഴ് വർഷം മുമ്പ് കാൺപൂരിലെ തെരുവുകളിൽ ഓട്ടോയും ടെമ്പോയും ഓടിച്ചു നടന്ന ഒരു സാധാരണക്കാരൻ ഇന്ന് ഒരു എയർലൈൻ ചെയർമാനാണ് എന്നത് സിനിമാകഥകളെ വെല്ലുന്ന യാഥാർത്ഥ്യമാണ്.
അടിത്തട്ടിൽ നിന്നുള്ള വളർച്ച
ഇന്ന് 35 വയസ്സുള്ള ശ്രാവൺ കുമാർ, 2017 വരെ കാൺപൂരിൽ ഉപജീവനത്തിനായി ടെമ്പോ ഓടിക്കുകയും ലോഡറായി ജോലി ചെയ്യുകയും ചെയ്തിരുന്നു. മധ്യവർഗ കുടുംബത്തിൽ ജനിച്ച അദ്ദേഹം, ബിസിനസിൽ പരാജയങ്ങൾ രുചിച്ച ശേഷമാണ് നിർമ്മാണ മേഖലയിലേക്ക് തിരിയുന്നത്.
2014-ൽ സിമന്റ് വ്യാപാരത്തിലൂടെ തുടങ്ങിയ ബിസിനസ് പിന്നീട് ടി.എം.ടി സ്റ്റീൽ, ഖനനം എന്നീ മേഖലകളിലേക്ക് വളർന്നു. ഇന്ന് 400-ലധികം ട്രക്കുകളുള്ള വലിയൊരു ലോജിസ്റ്റിക് ശൃംഖലയുടെ ഉടമയാണ് ഇദ്ദേഹം. ഈ ബിസിനസ് സാമ്രാജ്യത്തിൽ നിന്നുള്ള കരുത്താണ് സ്വന്തമായി ഒരു വിമാനക്കമ്പനി എന്ന വലിയ സ്വപ്നത്തിലേക്ക് അദ്ദേഹത്തെ എത്തിച്ചത്.
ശംഖ് എയർ: യുപിയുടെ ആകാശസ്വപ്നം
ഉത്തർപ്രദേശ് ആസ്ഥാനമായി പ്രവർത്തിക്കുന്ന സംസ്ഥാനത്തെ ആദ്യത്തെ ഷെഡ്യൂൾഡ് എയർലൈനാണ് ശംഖ് എയർ. കേന്ദ്ര വ്യോമയാന മന്ത്രാലയത്തിൽ നിന്ന് നോ ഒബ്ജക്ഷൻ സർട്ടിഫിക്കറ്റ് (NOC) ലഭിച്ച കമ്പനി 2026 ജനുവരിയിൽ സർവീസ് ആരംഭിക്കും.
ലഖ്നൗ, നോയിഡ എന്നിവിടങ്ങൾ കേന്ദ്രീകരിച്ചായിരിക്കും പ്രവർത്തനം. ലഖ്നൗവിനെ രാജ്യത്തെ പ്രധാന മെട്രോ നഗരങ്ങളുമായി ബന്ധിപ്പിക്കും. ബോയിംഗ് 737-800NG വിമാനങ്ങൾ ഉപയോഗിച്ചായിരിക്കും സർവീസ് (തുടക്കത്തിൽ 3 വിമാനങ്ങൾ).
സാധാരണക്കാർക്ക് താങ്ങാനാവുന്ന നിരക്കിൽ വിമാനയാത്ര സാധ്യമാക്കുക. വിമാനത്തെ ഒരു ആഡംബരമായി കാണാതെ, ബസ്സിനെയും ടെമ്പോയെയും പോലെ ഒരു ഗതാഗത മാർഗ്ഗമായി മാത്രം കണ്ടാൽ മതിയെന്നാണ് ശ്രാവൺ കുമാറിന്റെ പക്ഷം.
“ഒരിക്കൽ ടെമ്പോ ഓടിച്ച എനിക്ക് ഒരു എയർലൈൻ തുടങ്ങാമെങ്കിൽ, മറ്റാർക്കും വലിയ സ്വപ്നങ്ങൾ കാണാം,” എന്നാണ് ശ്രാവൺ കുമാർ പറയുന്നത്. ഇൻഡിഗോയും എയർ ഇന്ത്യയും വാഴുന്ന ഇന്ത്യൻ ആകാശത്ത്, കുറഞ്ഞ നിരക്കും മികച്ച കണക്റ്റിവിറ്റിയുമായി ശംഖ് എയർ മാറ്റങ്ങൾ കൊണ്ടുവരുമെന്ന് പ്രതീക്ഷിക്കാം
