എനിക്കെതിരെ അപവാദ പ്രചാരണം നടത്തുന്നത് മെസി തട്ടിപ്പില് ഉള്പ്പെട്ടവര്; മാധ്യമരംഗത്ത് ക്രിമിനലുകള് കടന്നുകൂടി-രാജീവ് ചന്ദ്രശേഖര്
തിരുവനന്തപുരം: ബിപിഎല് ഭൂമിയിടപാടുമായി ബന്ധപ്പെട്ട വിവാദങ്ങളില് പ്രതികരിച്ച് ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര്. ശബരിമല സ്വര്ണക്കൊള്ള സമരത്തില്നിന്നും മെസി വിവാദത്തില്നിന്നും ശ്രദ്ധതിരിക്കാനുള്ള ശ്രമമാണ് തനിക്കെതിരെയുള്ള ആരോപണമെന്ന് അദ്ദേഹം പറഞ്ഞു. മെസി തട്ടിപ്പില് ഉള്പ്പെട്ടവരാണ് തനിക്കെതിരെ പ്രചാരണം നടത്തുന്നത്. മാധ്യമരംഗത്ത് ചില ക്രിമിനലുകള് കടന്നുകൂടിയിട്ടുണ്ട്. ഇത്തരം നുണപ്രചാരണം നടത്തുന്ന ഒരാളെയും വെറുതെവിടില്ലെന്നും രാജീവ് ചന്ദ്രശേഖര് പറഞ്ഞു.
ബിപിഎല് ഭൂമിയിടപാടുമായി ബന്ധപ്പെട്ട കാര്യങ്ങളില് ബിപിഎല് തന്നെ വിശദീകരണം നല്കിയതാണ്. വിഷയത്തില് 2003ലെ കോടതി ഉത്തരവുകളടക്കം നിലവിലുണ്ട്. എന്നിട്ടും ചിലര് എനിക്കെതിരെ നുണപ്രചാരണം നടത്തുകയാണ്. ഇവര്ക്കെതിരെ നിയമനടപടികള് സ്വീകരിക്കും. തുടര്ച്ചയായി അപവാദ പ്രചാരണങ്ങള് നടത്തി വേട്ടയാടുന്ന ശീലമുണ്ട്. ഇതിലൊന്നും താന് വീഴില്ലെന്നും, സര്ക്കാരിനെതിരെയുള്ള പ്രതിഷേധ പരിപാടികളുമായി മുന്നോട്ടുപോകുമെന്നും രാജീവ് ചന്ദ്രശേഖര് പറഞ്ഞു.
