യുദ്ധത്തിനിടെ ഇറാനിൽ മൊസാദ് വേട്ട; ഇസ്രയേലിന് വിവരങ്ങൾ ചോർത്തിയ 20 പേരെ അറസ്റ്റ് ചെയ്തു
തെഹ്റാൻ: യുദ്ധം കൊടുമ്പിരിക്കൊണ്ടിരിക്കെ മൊസാദ് ചാരന്മാർക്കെതിരെ വൻ വേട്ടയുമായി ഇറാൻ. രാജ്യത്തെ സുപ്രധാന സൈനിക-സുരക്ഷാ വിവരങ്ങൾ ഇസ്രയേലിന് ചോർത്തി നൽകിയ 20 പേരെ ഇറാൻ രഹസ്യാന്വേഷണ വിഭാഗം അറസ്റ്റ് ചെയ്തു. പിടിയിലായവർ ഇസ്രയേലിന്റെ ചാരസംഘടനയായ മൊസാദിന്റെ ‘ഇൻഫോർമർ’മാരായി പ്രവർത്തിച്ചവരാണെന്ന് ഇറാൻ ആരോപിക്കുന്നു. ഇറാൻ വാർത്താ ഏജൻസിയായ ‘തസ്നീം’ ആണു വാർത്ത പുറത്തുവിട്ടത്.
ഇറാന്റെ മിസൈൽ കേന്ദ്രങ്ങൾ, വ്യോമപ്രതിരോധ സംവിധാനങ്ങൾ, മുതിർന്ന സൈനിക ഉദ്യോഗസ്ഥരുടെ വിവരങ്ങൾ എന്നിവ ഇസ്രയേലിന് കൈമാറിയെന്നാണ് ഇവർക്കെതിരെയുള്ള പ്രധാന ആരോപണം. പശ്ചിമേഷ്യയിൽ ഇസ്രയേലും അമേരിക്കയും നടത്തുന്ന വ്യോമാക്രമണങ്ങൾക്ക് കൃത്യമായ ലക്ഷ്യങ്ങൾ കണ്ടെത്താൻ ഇവർ നൽകിയ വിവരങ്ങൾ സഹായിച്ചിട്ടുണ്ടാകാമെന്നാണ് ഇറാൻ കരുതുന്നത്.
അറസ്റ്റിലായവർക്ക് ഇസ്രയേൽ ചാരസംഘടനയുമായി നേരിട്ട് ബന്ധമുണ്ടെന്നും വിദേശത്ത് വെച്ച് ഇവർ പരിശീലനം നേടിയിട്ടുണ്ടെന്നും ഇറാൻ ഇന്റലിജൻസ് മന്ത്രാലയം പ്രസ്താവനയിൽ പറഞ്ഞു. ഓൺലൈൻ വഴിയും മറ്റും പണം വാഗ്ദാനം ചെയ്താണ് ഇവരെ ചാരപ്രവർത്തനത്തിന് നിയോഗിച്ചതെന്നാണ് സൂചന.
യുദ്ധം നടക്കുന്ന അതീവ ഗൗരവകരമായ സാഹചര്യത്തിൽ രാജ്യത്തെ ഒറ്റിക്കൊടുക്കുന്നത് വധശിക്ഷ ലഭിക്കാവുന്ന കുറ്റമാണെന്ന് ഇറാൻ മുന്നറിയിപ്പ് നൽകി. ‘രാജ്യത്തിന്റെ സുരക്ഷയിൽ ഒരു ഒത്തുതീർപ്പുമില്ല. ശത്രുക്കൾക്ക് വിവരങ്ങൾ ചോർത്തി നൽകുന്നവർക്ക് കടുത്ത ശിക്ഷ ഉറപ്പാക്കും,’ ഇറാൻ സൈനിക വക്താവ് വ്യക്തമാക്കി.
ഫെബ്രുവരി 28-ന് തുടങ്ങിയ യുദ്ധത്തിന് ശേഷം ഇറാൻ നേരിടുന്ന ഏറ്റവും വലിയ ആഭ്യന്തര ഭീഷണിയായാണു ചാരശൃംഖലയുടെ കണ്ടെത്തലിനെ കാണുന്നത്. ഇറാൻ പരമോന്നത നേതാവ് ആയത്തുല്ല അലി ഖാംനഇയുടെ വധത്തിന് പിന്നിലും ഇത്തരം പ്രാദേശിക ചാരന്മാരുടെ സഹായം ലഭിച്ചിട്ടുണ്ടാകാമെന്ന സംശയം ഇറാൻ നേരത്തെ പ്രകടിപ്പിച്ചിരുന്നു.
പശ്ചിമേഷ്യയിൽ അമേരിക്കയും ഇസ്രയേലും നടത്തുന്ന സൈനിക നടപടി മൂന്നാം വാരത്തിലേക്ക് കടക്കുമ്പോൾ, ഇറാന്റെ ഉള്ളിൽ നിന്നുള്ള ഇത്തരം വിവരച്ചോർച്ചകൾ ഭരണകൂടത്തിന് വലിയ തലവേദനയാകുന്നുണ്ട്. പിടിയിലായവരെ കൂടുതൽ ചോദ്യം ചെയ്യുന്നതിലൂടെ ഇസ്രയേലിന്റെ കൂടുതൽ ചാരശൃംഖലകളെ കണ്ടെത്താൻ കഴിയുമെന്ന പ്രതീക്ഷയിലാണ് ഇറാൻ രഹസ്യാന്വേഷണ വിഭാഗം.
