രക്ഷകനായി മ്യൂനോസ്; കോംഗോയെ വീഴ്ത്തി കൊളംബിയ റൗണ്ട് ഓഫ് 32-ൽ
ജലിസ്കോ: ലോകകപ്പ് ഫുട്ബോളിൽ ഡിആർ കോംഗോയെ എതിരില്ലാത്ത ഒരു ഗോളിന് പരാജയപ്പെടുത്തി കൊളംബിയ റൗണ്ട് ഓഫ് 32 യോഗ്യത നേടി. ഗ്രൂപ്പ് കെയിൽ തുടർച്ചയായ രണ്ടാം ജയം സ്വന്തമാക്കിയ കൊളംബിയ ആറ് പോയിന്റോടെയാണ് നോക്കൗട്ട് ഉറപ്പിച്ചത്. നാല് പോയിന്റുള്ള പോർച്ചുഗലാണ് ഗ്രൂപ്പിൽ രണ്ടാമത്.
മത്സരത്തിലുടനീളം കൊളംബിയ മികച്ച ആക്രമണങ്ങൾ അഴിച്ചുവിട്ടെങ്കിലും കോംഗോ ഗോൾകീപ്പർ ലയണൽ എംപാസിയുടെ തകർപ്പൻ സേവുകൾ അവർക്ക് തടസ്സമായി. ലൂയിസ് ഡയസ്, ജെയിംസ് റോഡ്രിഗസ് എന്നിവരുടെ ഉറച്ച ഗോൾശ്രമങ്ങളാണ് എംപാസി തട്ടിയകറ്റിയത്. എന്നാൽ, 76-ാം മിനിറ്റിൽ ജുവാൻ ഫെർണാണ്ടോ ക്വിന്റേറോയുടെ അസിസ്റ്റിൽ നിന്നും ഡാനിയൽ മ്യൂനോസ് നേടിയ ഗോൾ കൊളംബിയക്ക് വിജയം സമ്മാനിച്ചു. അവസാന മിനിറ്റുകളിൽ സമനിലയ്ക്കായി കോംഗോ പൊരുതിയെങ്കിലും കൊളംബിയൻ ഗോൾകീപ്പർ കാമിലോ വർഗാസിന്റെ മികച്ച പ്രകടനം ടീമിന്റെ വിജയം ഉറപ്പിച്ചു.
