”മെസ്സിയുടെ ഉള്ളിലെ ആ വന്യമൃഗത്തെ നിങ്ങൾ ഉണർത്തരുതായിരുന്നു, അയാൾ വെറുമൊരു മനുഷ്യനല്ല!’; വാനോളം വാഴ്ത്തി ഫ്രഞ്ച് ഇതിഹാസം തിയറി ഹെൻറി | Thierry Henry on Lionel Messi

അറ്റ്ലാന്റ: ഫിഫ ലോകകപ്പ് 2026-ന്റെ പ്രീക്വാർട്ടർ പോരാട്ടത്തിൽ ഈജിപ്തിനെതിരെ രണ്ട് ഗോളുകൾക്ക് പിന്നിട്ടുനിന്ന ശേഷം അർജന്റീന നടത്തിയ അവിശ്വസനീയമായ തിരിച്ചുവരവ് വിജയത്തെയും ലയണൽ മെസ്സിയുടെ അസാധാരണമായ പോരാട്ടവീര്യത്തെയും വാഴ്ത്തി ഫ്രഞ്ച് ഫുട്‌ബോൾ ഇതിഹാസം തിയറി ഹെൻറി(Thierry Henry on Lionel Messi). മത്സരത്തിന്റെ തുടക്കത്തിൽ പെനാൽറ്റി പാഴാക്കി നാണക്കേടിന്റെ റെക്കോർഡ് വഴങ്ങിയ മെസ്സിയെ കണ്ട് ഈജിപ്ത് അർജന്റീനയുടെ അന്ത്യം കുറിച്ചെന്ന് കരുതിയെങ്കിൽ അവർക്ക് തെറ്റിയെന്ന് ഹെൻറി ചൂണ്ടിക്കാട്ടി. മെസ്സിയുടെ ഉള്ളിലെ വന്യമൃഗത്തെയാണ് ഈജിപ്ഷ്യൻ നിര അറിയാതെ ഉണർത്തിയതെന്നും അയാൾ വെറുമൊരു മനുഷ്യനല്ലെന്നും അദ്ദേഹം അഭിപ്രായപ്പെട്ടു.

‘അയാൾ വെറുമൊരു സാധാരണ മനുഷ്യനല്ല’ | Thierry Henry on Lionel Messi

ബാഴ്‌സലോണയിൽ മെസ്സിക്കൊപ്പം ഒട്ടനവധി മത്സരങ്ങൾ ഒരുമിച്ച് കളിച്ചിട്ടുള്ള ഹെൻറി, പ്രമുഖ സ്‌പോർട്‌സ് ചാനലായ ‘ഫോക്‌സ് ന്യൂസി’ന്റെ ലോകകപ്പ് അവലോകന പരിപാടിയിലാണ് അർജന്റീന ഇതിഹാസത്തെ വാഴ്ത്തിപ്പാടിയത്. മത്സരത്തിന്റെ 20-ാം മിനിറ്റിൽ പെനാൽറ്റി നഷ്ടപ്പെടുത്തിയതിന് ശേഷം മെസ്സി കളിയിലേക്ക് തിരികെ വന്ന രീതിയെക്കുറിച്ച് ഹെൻറി വിശദീകരിച്ചത് ഇങ്ങനെയാണ്:

”ഫുട്‌ബോളിൽ ചില സുവർണ നിയമങ്ങളുണ്ട്. അതിലൊന്നാണ്, ലയണൽ മെസ്സിയെ നിങ്ങൾ ഒരിക്കലും ദേഷ്യം പിടിപ്പിക്കരുത് എന്നത്. അവനുള്ളിലെ ആ വന്യമൃഗത്തെ ദയവായി ആരും ഉണർത്തരുത്. കളിയിൽ 2-0 ന് ഈജിപ്ത് മുന്നിലെത്തിയപ്പോൾ, തനിക്ക് പിഴച്ച പെനാൽറ്റിയോടുള്ള ദേഷ്യവും ടീമിനെ ജയിപ്പിക്കണമെന്ന വാശിയും മെസ്സിയെ പൂർണമായും മാറ്റിമറിച്ചു. ഒരു സ്വിച്ചിട്ടത് പോലെയാണ് അവൻ പിന്നീട് കളിച്ചത്. അയാൾ വെറുമൊരു സാധാരണ മനുഷ്യനല്ല.”

മത്സരത്തിന് ശേഷം വികാരാധീനനായ മെസ്സിയെക്കുറിച്ച് ഹെൻറി പറഞ്ഞ വാക്കുകൾ ഇങ്ങനെയാണ്: ”ആദ്യം നിങ്ങൾ അവൻ കരയുന്നത് നോക്കൂ, ആ കണ്ണീര് അവനും അവന്റെ ടീമിനും എത്രത്തോളം വിലപ്പെട്ടതാണെന്ന് മനസ്സിലാക്കുക. അത് കണ്ട് നമ്മൾ ആദ്യം ഓർക്കും അവൻ വെറുമൊരു സാധാരണ മനുഷ്യനാണെന്ന്. കാരണം എട്ട് പെനാൽറ്റികളിൽ നാലെണ്ണം പാഴാക്കിയ ഒരു സാധാരണ മനുഷ്യൻ! എന്നാൽ, കളിയിലുടനീളം അയാൾ ചെയ്തത് കാണുമ്പോൾ നമ്മൾ വീണ്ടും ചിന്തിക്കും, മെസ്സി വെറുമൊരു മനുഷ്യനല്ലെന്ന്.”

ബാഴ്സലോണയിലെ ആ ട്രെയിനിങ് കഥ | Thierry Henry on Lionel Messi

മെസ്സിയുടെ ഉള്ളിലെ ദേഷ്യവും മത്സരബുദ്ധിയും എങ്ങനെയാണ് അവനെ മാറ്റുന്നതെന്ന് വിശദീകരിക്കാൻ ബാഴ്‌സലോണയിലെ ഒരു പഴയ സംഭവം ഹെൻറി ഓർത്തെടുത്തു:

”ട്രെയിനിങ് ഗ്രൗണ്ടിൽ ചിലപ്പോൾ കോച്ചുമാർ ഫൗളുകൾ വിളിക്കില്ലല്ലോ. ഒരിക്കൽ ലിയോ ഒരു ഫൗളിനായി വാദിച്ചെങ്കിലും കോച്ച് അത് തള്ളിപ്പറഞ്ഞു. പന്ത് പുറത്തുപോയിട്ടില്ല, പരാതി പറയുന്നത് നിർത്തി കളി തുടരൂ, മത്സരത്തിലും ഇത് സംഭവിക്കാമെന്ന് കോച്ച് പറഞ്ഞു. തൊട്ടടുത്ത നിമിഷം ഞാൻ ലിയോയുടെ കണ്ണുകളിലേക്ക് നോക്കി. അവൻ പൂർണമായും മാറിപ്പോയിരുന്നു!

അവൻ നേരെ പോയി പന്ത് കൈക്കലാക്കി, തുടർച്ചയായി മൂന്ന് ഗോളുകളാണ് അടിച്ചു കൂട്ടിയത്. നിങ്ങളുടെ കാലിൽനിന്ന് പന്ത് തട്ടിയെടുത്ത് അവൻ നേരെ പോയി ഗോൾ അടിക്കും. വീണ്ടും വന്ന് പന്ത് തട്ടിയെടുക്കും, വീണ്ടും ഗോൾ അടിക്കും. അത് കഴിഞ്ഞ് അവൻ തിരിഞ്ഞുനിന്ന് കോച്ചിനോട് പറഞ്ഞു: ‘അടുത്ത തവണ കൃത്യമായി ഫൗൾ വിളിക്കണം!’ അപ്പോൾ ഞങ്ങൾ എല്ലാവരും ഒരുമിച്ച് പറഞ്ഞു: ‘അയ്യോ ശരി, അടുത്ത തവണ ഞങ്ങൾ ഉറപ്പായും ഫൗൾ വിളിച്ചോളാം!’ കാരണം ആ മൂഡിൽ എത്തിയാൽ അവനെ തടയാൻ ആർക്കും കഴിയില്ല.”

സിദാനും റൊണാൾഡീഞ്ഞോയ്ക്കും മുകളിൽ മെസ്സി | Thierry Henry on Lionel Messi

ചർച്ചയിൽ ഒപ്പമുണ്ടായിരുന്ന ഇബ്രാഹിമോവിച്ചിനോട് സംസാരിക്കവെ, ഫുട്‌ബോൾ ലോകത്തെ ഏറ്റവും വലിയ വമ്പന്മാർക്കൊപ്പം കളിച്ചിട്ടുണ്ടെങ്കിലും മെസ്സി നൽകുന്ന അനുഭൂതി വേറെ തന്നെയാണെന്ന് ഹെൻറി തുറന്നുസമ്മതിച്ചു.

”ഞാൻ സിസുവിനൊപ്പവും (സിനദിൻ സിദാൻ) റൊണാൾഡീഞ്ഞോ അടക്കമുള്ള ഒട്ടനവധി മികച്ച കളിക്കാർക്കൊപ്പവും കളിച്ചിട്ടുണ്ട്. ഇത് പറയുന്നതിൽ എനിക്ക് യാതൊരു നാണക്കേടുമില്ല, ചിലപ്പോൾ മെസ്സി ഗ്രൗണ്ടിൽ അത്ഭുത ഗോളുകൾ അടിക്കുമ്പോൾ ഞാൻ ഒരു കളിക്കാരനാണെന്ന കാര്യം മറന്ന് ഒന്നോ രണ്ടോ സെക്കൻഡ് ‘വൗ’ എന്ന് അത്ഭുതത്തോടെ നോക്കി നിന്നുപോകാറുണ്ട്. പെട്ടെന്നാണ് ഓർമ വരിക, ‘ഓ നീ ഇപ്പോൾ കളിയിലാണ്, വേഗം പൊസിഷനിലേക്ക് തിരിച്ചുപോകൂ’ എന്ന്. അങ്ങനെ എന്നെ തോന്നിപ്പിച്ചിട്ടുള്ള ഏക താരം അവൻ മാത്രമാണ്.”

ലോസ് ആഞ്ചലസിലെ സ്റ്റുഡിയോയിലിരുന്ന് ഈ ലോകകപ്പ് മത്സരത്തെ ഒരു ഹോളിവുഡ് സിനിമയോടാണ് ഹെൻറി ഉപമിച്ചത്. ‘ഒരു സിനിമയുടെ തിരക്കഥാകൃത്ത് എഴുതിയാൽ പോലും ആളുകൾ വിശ്വസിക്കാത്ത അത്രയും നാടകീയമായ കഥയാണ് ഇവിടെ നടക്കുന്നത്. സംവിധായകൻ അൽപ്പം കൂട്ടിപ്പറഞ്ഞതാണെന്ന് ആളുകൾ പറയും. പക്ഷേ ഈ മനുഷ്യൻ തന്റെ കാലുകൾ കൊണ്ടാണ് ചരിത്രം എഴുതുന്നത്,’ എന്ന് പറഞ്ഞുകൊണ്ടാണ് ഹെൻറി തന്റെ വാക്കുകൾ അവസാനിപ്പിച്ചത്.