‘റീലിലൂടെ മാത്രമാണോ ക്ഷമിക്കുന്നത്, കേസുകൾ പിൻവലിക്കുമോ?’: മോദിയുടെ സെൽഫി വീഡിയോയ്ക്ക് കമന്റുമായി ദിപ്കെ
ന്യൂഡൽഹി: സിജെപി പ്രതിഷേധത്തിന് പിന്നാലെ സെൽഫി വീഡിയോ സന്ദേശങ്ങളുമായെത്തിയ പ്രധാനമന്ത്രി നരേന്ദ്ര മോദിക്കെതിരെ രൂക്ഷവിമർശനവുമായി കോക്രോച്ച് ജനതാ പാർട്ടി സ്ഥാപകൻ അഭിജീത് ദിപ്കെ. ഇൻസ്റ്റാഗ്രാം റീലിലൂടെയാണോ പ്രധാനമന്ത്രി ക്ഷമിക്കുന്നതെന്നും പ്രതിഷേധക്കാർക്കെതിരെയെടുത്ത കേസുകൾ സർക്കാർ പിൻവലിക്കുമോ എന്നും ദിപ്കെ ചോദിച്ചു.
പ്രതിഷേധത്തിനിടെ തനിക്കെതിരെ മോശം ഭാഷ ഉപയോഗിച്ച വിദ്യാർഥികളോട് ക്ഷമിക്കുന്നുവെന്ന് മോദി വീഡിയോയിൽ പറഞ്ഞിരുന്നു. ജന്തർ മന്തറിലെ വിദ്യാർഥി പ്രക്ഷോഭത്തിൽ പ്രധാനമന്ത്രിക്കെതിരെ സംസാരിച്ച കൗമാരക്കാരിക്കെതിരെ കേസെടുത്ത പശ്ചാത്തലത്തിലാണ് ദിപ്കെയുടെ പ്രതികരണം.
സമരം അവസാനിപ്പിക്കാൻ ഉറപ്പുനൽകിയിട്ടും പ്രതിഷേധക്കാർക്കെതിരായ എഫ്.ഐ.ആറുകൾ പിൻവലിക്കുന്നതിൽ സർക്കാർ മെല്ലെപ്പോക്ക് നയം സ്വീകരിക്കുകയാണെന്ന് സിജെപി ആരോപിച്ചു. കേസുകൾ പൂർണമായി പിൻവലിച്ചില്ലെങ്കിൽ വീണ്ടും വൻ പ്രക്ഷോഭവുമായി തെരുവിലിറങ്ങുമെന്നും പാർട്ടി മുന്നറിയിപ്പ് നൽകി. പ്രധാനമന്ത്രി രാജിവെച്ച് സോഷ്യൽ മീഡിയ ഇൻഫ്ലുവൻസറാകുന്നതാണ് നല്ലതെന്ന് കഴിഞ്ഞ ദിവസവും ദിപ്കെ പരിഹസിച്ചിരുന്നു.
