പ്രളയ ദുരിതാശ്വാസ പ്രവര്ത്തനത്തിനെത്തിയ വാഹനത്തിന് പിഴ ചുമത്തി; എംവിഡി ഉദ്യോഗസ്ഥന് സസ്പെന്ഷന്
തിരുവനന്തപുരം: പ്രളയ ദുരിതാശ്വാസ പ്രവർത്തനങ്ങളിൽ പങ്കാളിയാകാനെത്തിയ വാഹനത്തിന് പിഴ ഈടാക്കിയ മോട്ടോർ വാഹന വകുപ്പ് ഉദ്യോഗസ്ഥനെ സർവീസിൽ നിന്ന് സസ്പെൻഡ് ചെയ്തു. അടൂർ എം.വി.ഡി സ്ക്വാഡിലെ ഉദ്യോഗസ്ഥനായ ലൈജുവിനെതിരെയാണ് നടപടി. ജീപ്പിന് മുന്നിൽ ആഡംബര ലൈറ്റുകൾ ഘടിപ്പിച്ചുവെന്നാരോപിച്ചാണ് 5,200 രൂപ പിഴ ചുമത്തിയത്.
മെഴുവേലി സ്വദേശിയുടെ ഉടമസ്ഥതയിലുള്ള വാഹനത്തിനാണ് മോട്ടോർ വാഹന വകുപ്പ് ഉദ്യോഗസ്ഥൻ പിഴ ശിക്ഷ നൽകിയത്. വെള്ളപ്പൊക്ക ദുരിതത്തിൽപ്പെട്ടവരെ സുരക്ഷിത കേന്ദ്രങ്ങളിലേക്ക് മാറ്റുന്നതിനായാണ് ഈ ഓഫ് റോഡ് വാഹനം ആറന്മുളയിലെത്തിച്ചത്. പ്രളയ ദുരിതാശ്വാസ പ്രവർത്തനങ്ങൾക്ക് എത്തിയ വാഹനത്തിന് തുക പിഴയിട്ട സംഭവം വലിയ രീതിയിലുള്ള പ്രതിഷേധങ്ങൾക്കാണ് വഴിവെച്ചത്.
വിഷയത്തിൽ അബിൻ വർക്കി എം.എൽ.എയും ഗതാഗതമന്ത്രിയോട് നേരിട്ട് പരാതിപ്പെട്ടിരുന്നു. എം.എൽ.എയുടെ നിർദ്ദേശത്തെത്തുടർന്ന് യൂത്ത് കോൺഗ്രസ് പ്രവർത്തകർ ഇടപെട്ട് പിഴത്തുക അടയ്ക്കുകയുമുണ്ടായി. എന്നാൽ ആറന്മുളയിലെ ദുരിതാശ്വാസ പ്രവർത്തനങ്ങൾക്കിടയിലല്ല, അടൂരിൽ വച്ചാണ് വാഹനത്തിന് പിഴ ചുമത്തിയതെന്ന വിശദീകരണമാണ് ഉദ്യോഗസ്ഥരുടെ ഭാഗത്തുനിന്നുണ്ടായത്.
