‘നിങ്ങളുടെ പേര് നരേന്ദർ, പരിശീലകനും നരേന്ദ്രൻ, പ്രധാനമന്ത്രിയുടെ പേരും നരേന്ദ്രൻ; എനിക്കീ പേരിനോട് തന്നെ വെറുപ്പാണ്’; പാക് ബോക്സറുടെ വാക്കുകൾ പങ്കുവെച്ച് നരേന്ദർ ബെർവാൾ; പൊട്ടിച്ചിരിച്ച് മോദി
ന്യൂഡൽഹി: 2026-ലെ കോമൺവെൽത്ത് ഗെയിംസിൽ മെഡലുകൾ വാരിക്കൂട്ടിയ ഇന്ത്യൻ കായിക താരങ്ങളുമായി സംവദിച്ച് പ്രധാനമന്ത്രി നരേന്ദ്ര മോദി. ഇന്നലെ ഡൽഹിയിലെ 7 ലോക് കല്യാൺ മാർഗിലുള്ള പ്രധാനമന്ത്രിയുടെ ഔദ്യോഗിക വസതിയിലായിരുന്നു താരങ്ങൾക്ക് ആദരമർപ്പിച്ചുകൊണ്ടുള്ള ഈ പ്രത്യേക കൂടിക്കാഴ്ച നടന്നത്. ചടങ്ങിനിടെ ഹെവിവെയ്റ്റ് ബോക്സിങ് താരവും വെള്ളി മെഡൽ ജേതാവുമായ നരേന്ദർ ബെർവാൾ പ്രധാനമന്ത്രിയുമായി പങ്കുവെച്ച ഒരു രസകരമായ അനുഭവമാണ് ഇപ്പോൾ ശ്രദ്ധ നേടുന്നത്.
2015-ലെ വേൾഡ് മിലിട്ടറി ഗെയിംസിൽ ഒരു പാകിസ്താൻ ബോക്സറെ പരാജയപ്പെടുത്തിയതിന് ശേഷം അദ്ദേഹവുമായി നടത്തിയ സംഭാഷണമാണ് നരേന്ദർ ബെർവാൾ പ്രധാനമന്ത്രിയോട് വിവരിച്ചത്. മത്സരത്തിലെ കനത്ത തോൽവിക്ക് പിന്നാലെ പാകിസ്താൻ താരം തന്നോട് പറഞ്ഞ വാക്കുകൾ നരേന്ദർ സദസ്സിന് മുന്നിൽ ഓർത്തെടുത്തു. “നിങ്ങളുടെ പേര് നരേന്ദർ എന്നാണ്, നിങ്ങളുടെ കോച്ചിന്റെ പേരും നരേന്ദർ എന്ന് തന്നെയാണ്, നിങ്ങളുടെ രാജ്യത്തെ പ്രധാനമന്ത്രിയുടെ പേരും നരേന്ദ്രൻ എന്നാണ്. ഇപ്പോൾ എനിക്ക് നരേന്ദർ എന്ന പേരിനോട് തന്നെ കടുത്ത വെറുപ്പായിരിക്കുകയാണ്” എന്നായിരുന്നു പാക് ബോക്സറുടെ രസകരമായ പ്രതികരണം. ഇത് കേട്ട മോദി പൊട്ടിച്ചിരിക്കുന്നതും വീഡിയോ ദൃശ്യങ്ങളിൽ കാണാം.
വാർത്താ ഏജൻസിയായ എ.എൻ.ഐ തങ്ങളുടെ എക്സ് അക്കൗണ്ടിലൂടെയാണ് നരേന്ദർ ബെർവാൾ പ്രധാനമന്ത്രിയോട് സംസാരിക്കുന്നതിന്റെ ദൃശ്യങ്ങളും വിവരങ്ങളും പുറത്തുവിട്ടത്. കോമൺവെൽത്ത് ഗെയിംസിൽ രാജ്യത്തിന്റെ അഭിമാനം വാനോളമുയർത്തിയ കായിക താരങ്ങളെ നേരിട്ട് അഭിനന്ദിക്കാനും അവരുടെ നേട്ടങ്ങളെ പ്രകീർത്തിക്കാനുമാണ് പ്രധാനമന്ത്രി തന്റെ വസതിയിൽ പ്രത്യേക വിരുന്ന് സംഘടിപ്പിച്ചത്. ഈ ഹൃദ്യമായ കൂടിക്കാഴ്ചയ്ക്കിടെയാണ് ഏവരിലും ചിരി പടർത്തിക്കൊണ്ട് ഇന്ത്യൻ ബോക്സിങ് താരം തന്റെ ഈ പഴയകാല അനുഭവം വേദിയിൽ പങ്കുവെച്ചത്.
