‘ഓരോ മണിക്കൂറിലും ആറ് അറസ്റ്റ്; ഓപറേഷൻ തൂഫാൻ ജനകീയ പ്രസ്ഥാനമായി വളരുന്നു, അറസ്റ്റിലായവർ 10,000 കടന്നു’: രമേഷ് ചെന്നിത്തല
തിരുവനന്തപുരം: സംസ്ഥാനത്ത് ലഹരി മാഫിയക്കെതിരെ പൊലീസ് നടത്തിവരുന്ന ‘ഓപറേഷൻ തൂഫാൻ’ ശക്തമായ ജനകീയ പ്രസ്ഥാനമായി മാറിയെന്ന് ആഭ്യന്തര മന്ത്രി രമേഷ് ചെന്നിത്തല. വിട്ടുവീഴ്ചയില്ലാത്ത ഈ പോരാട്ടത്തിൽ നിലവിൽ ഓരോ മണിക്കൂറിലും ശരാശരി ആറ് പേർ വീതം അറസ്റ്റിലാകുന്നുണ്ടെന്നും ലഹരിവസ്തുക്കളുടെ ലഭ്യതയിൽ കാര്യമായ കുറവുണ്ടായിട്ടുണ്ടെന്നും അദ്ദേഹം വ്യക്തമാക്കി. ഫേസ്ബുക്ക് പോസ്റ്റിലൂടെയാണ് അദ്ദേഹം ഈ വിവരങ്ങൾ പങ്കുവെച്ചത്.
ലഹരി ശൃംഖല തകർക്കാൻ ലക്ഷ്യമിട്ട് ആരംഭിച്ച സ്പെഷ്യൽ ഡ്രൈവിൽ ഇതിനോടകം വലിയ പുരോഗതിയാണുണ്ടായിട്ടുള്ളത്. സംസ്ഥാനത്തുടനീളം 9,280 കേസുകൾ രജിസ്റ്റർ ചെയ്തതിൽ നിന്നായി 10,015 പേരെ പൊലീസ് അറസ്റ്റ് ചെയ്തു. പരിശോധനകളിൽ 1004 കിലോഗ്രാം കഞ്ചാവും 8.28 കിലോഗ്രാം എംഡിഎംഎയും ഉൾപ്പെടെയുള്ള വൻ ലഹരിശേഖരമാണ് പിടിച്ചെടുത്തത്.
വരാനിരിക്കുന്ന ഓണാഘോഷങ്ങളുടെ മറവിൽ സംസ്ഥാനത്തേക്ക് ലഹരി ഒഴുകുന്നത് തടയാൻ ഓപറേഷൻ തൂഫാന്റെ ഭാഗമായി പ്രത്യേക സുരക്ഷാ പരിശോധനകൾ ഊർജിതമാക്കിയിട്ടുണ്ട്. ജനങ്ങളും പൊലീസും കൈകോർത്ത് നടത്തുന്ന ഈ മുന്നേറ്റം രാജ്യത്തിനാകെ മാതൃകയാണെന്നും, ഓണക്കാലം സുരക്ഷിതമാക്കാനുള്ള സ്പെഷ്യൽ ഡ്രൈവ് തുടരുമെന്നും രമേഷ് ചെന്നിത്തല കൂട്ടിച്ചേർത്തു. ഓപറേഷൻ തൂഫാനെ ജനകീയ പ്രസ്ഥാനമാക്കി വളർത്തിയ നാടിന് നന്ദി അറിയിച്ച അദ്ദേഹം ലഹരിക്കെതിരെയുള്ള പോരാട്ടം തുടർന്നും ശക്തമായി മുന്നോട്ട് കൊണ്ടുപോകുമെന്ന് ഉറപ്പുനൽകി.
