‘ലോകം മാറിയതറിയില്ല, എഴുപതുകളിൽ പഠിച്ച കിത്താബുമായി ഇപ്പോഴും ക്ലാസെടുത്ത് നടക്കുന്നു’; എം.വി ഗോവിന്ദനെ പരിഹസിച്ച് പി.കെ ശശി
പാലക്കാട്: സിപിഎം സംസ്ഥാന സെക്രട്ടറി എം വി ഗോവിന്ദനെ രൂക്ഷമായ ഭാഷയിൽ പരിഹസിച്ച് സിഎംപി നേതാവ് പി കെ ശശി. ലോകം മാറിയത് അറിയാത്ത ആളാണ് എം വി ഗോവിന്ദനെന്നും എഴുപതുകളിൽ പഠിച്ച ഓത്തുപള്ളിയിലെ കിത്താബുമായി ഇപ്പോഴും ക്ലാസ് എടുത്ത് നടക്കുകയാണെന്നും പി കെ ശശി തുറന്നടിച്ചു. പാലക്കാട് കാഞ്ഞിരപ്പുഴയിൽ സംഘടിപ്പിച്ച യുഡിഎഫ് പൊതുയോഗത്തിൽ സംസാരിക്കവേയായിരുന്നു അദ്ദേഹത്തിന്റെ ഈ പരാമർശങ്ങൾ.
സിപിഎമ്മിന്റെ പഠന ക്ലാസുകളുടെ രീതികളെയും അദ്ദേഹം ശക്തമായി വിമർശിച്ചു. പാർട്ടി പഠന ക്ലാസുകളിൽ ഇരുന്നാൽ ഫോൺ എടുക്കാൻ പറ്റില്ലെന്നും ഭാര്യക്ക് പോലും വിളിക്കാൻ സാധിക്കില്ലെന്നും അദ്ദേഹം പറഞ്ഞു. ഇത്തരത്തിൽ പഠന ക്ലാസുകളിൽ പങ്കെടുത്താണ് തന്റെ ജീവിതം തന്നെ ഇല്ലാതെ ആയതെന്നും പി കെ ശശി വെളിപ്പെടുത്തി.
