’15 ശതമാനത്തോളം ജനങ്ങളെ വോട്ടർ പട്ടികയിൽ നിന്നും തുടച്ചുനീക്കി’; തെരഞ്ഞെടുപ്പ് കമ്മീഷനെതിരെ രൂക്ഷവിമർശനവുമായി എസ്.വൈ ഖുറൈശി
ന്യൂഡൽഹി: വോട്ടർ പട്ടിക പരിഷ്കരണത്തിലെ അപാകതകൾക്കും അനധികൃത കുടിയേറ്റക്കാരുണ്ടെന്ന രാഷ്ട്രീയ നേതാക്കളുടെ വാദങ്ങൾക്കുമെതിരെ രൂക്ഷവിമർശനവുമായി മുൻ മുഖ്യ തെരഞ്ഞെടുപ്പ് കമ്മീഷണർ എസ്.വൈ. ഖുറൈശി. രാജ്യത്തെ ജനസംഖ്യയുടെ 15 ശതമാനത്തോളം ആളുകളെ തെരഞ്ഞെടുപ്പ് കമ്മീഷൻ വോട്ടർ പട്ടികയിൽ നിന്നും പൂർണ്ണമായും ‘തുടച്ചുനീക്കി’യിരിക്കുകയാണെന്ന് അദ്ദേഹം പരിഹസിച്ചു. ഒരു ദേശീയ ദിനപത്രത്തിൽ നടന്ന ചടങ്ങിൽ സംസാരിക്കവെയാണ് തെരഞ്ഞെടുപ്പ് പ്രക്രിയയിലെ സുതാര്യതയില്ലായ്മയെക്കുറിച്ച് അദ്ദേഹം വിമർശനം ഉന്നയിച്ചത്.
രാജ്യത്ത് 18 വയസ്സ് തികഞ്ഞ കോടിക്കണക്കിന് ആളുകളുടെ പേരുകൾ ഇപ്പോഴും വോട്ടർ പട്ടികയിൽ ഇല്ലെന്ന് അദ്ദേഹം ചൂണ്ടിക്കാട്ടി. ഭരണഘടനാപരമായ അവകാശമുള്ള പൗരന്മാർ വോട്ടർ പട്ടികയ്ക്ക് പുറത്താക്കപ്പെടുന്നത് ജനാധിപത്യ പ്രക്രിയയുടെ വിശ്വാസ്യതയെ സാരമായി ബാധിക്കുമെന്നും, വോട്ടർ പട്ടിക കുറ്റമറ്റതാക്കുമെന്ന അവകാശവാദങ്ങൾക്കിടയിലും സാധാരണക്കാരായ ജനങ്ങൾ തഴയപ്പെടുകയാണെന്നും ഖുറൈശി വ്യക്തമാക്കി.
രാജ്യത്ത് കോടിക്കണക്കിന് അനധികൃത കുടിയേറ്റക്കാരുണ്ടെന്ന രാഷ്ട്രീയ നേതാക്കളുടെ വാദങ്ങളെ കണക്കുകൾ നിരത്തിയാണ് ഖുറൈശി ചോദ്യം ചെയ്തത്. കൃത്യമായ ഡാറ്റയോ ഔദ്യോഗിക രേഖകളോ ഇല്ലാതെയാണ് ഇവർ ഇത്തരം സംഖ്യകൾ പൊതുസമൂഹത്തിന് മുൻപിൽ അവതരിപ്പിക്കുന്നത്. ഇത്തരമൊരു ഭീമമായ കണക്കിന് ആഭ്യന്തര മന്ത്രാലയത്തിന്റെയോ സർക്കാരിന്റെയോ കൈവശം തെളിവുകളുണ്ടോയെന്ന് വ്യക്തമാക്കണം. രാഷ്ട്രീയ മുതലെടുപ്പുകൾ നടത്താനും ജനങ്ങൾക്കിടയിൽ ഭീതി പടർത്താനും തെറ്റായ ജനസംഖ്യാ കണക്കുകൾ ദുരുപയോഗം ചെയ്യുന്ന പ്രവണത അവസാനിപ്പിക്കണമെന്നും അദ്ദേഹം ആവശ്യപ്പെട്ടു.
രാജ്യത്ത് ഒരു പ്രത്യേക സമുദായത്തിന്റെ ജനസംഖ്യ അനിയന്ത്രിതമായി വർദ്ധിക്കുന്നു എന്ന തരത്തിലുള്ള പ്രചാരണങ്ങൾ തികച്ചും അടിസ്ഥാനരഹിതമാണെന്നും ഖുറൈശി ഓർമ്മിപ്പിച്ചു. ഔദ്യോഗിക സെൻസസ് കണക്കുകൾ പ്രകാരം എല്ലാ മതവിഭാഗങ്ങളിലും ജനനനിരക്ക് ക്രമാനുഗതമായി കുറഞ്ഞുവരികയാണ്. വിദ്യാഭ്യാസവും ജീവിതനിലവാരവും അടിസ്ഥാനമാക്കിയാണ് ഈ മാറ്റങ്ങൾ സംഭവിക്കുന്നതെന്ന ശാസ്ത്രീയ യാഥാർത്ഥ്യം നിലനിൽക്കെ, കണക്കുകളെ വളച്ചൊടിച്ച് സമൂഹത്തിൽ അവിശ്വാസവും ധ്രുവീകരണവും സൃഷ്ടിക്കാനാണ് ചിലർ ശ്രമിക്കുന്നതെന്നും അദ്ദേഹം വിമർശിച്ചു.
ജനാധിപത്യത്തിന്റെ അടിസ്ഥാനമായ തെരഞ്ഞെടുപ്പ് പ്രക്രിയയിൽ സാധാരണക്കാർക്കുള്ള വിശ്വാസം നഷ്ടപ്പെടാൻ പാടില്ലെന്ന് അദ്ദേഹം മുന്നറിയിപ്പ് നൽകി. വോട്ടർ പട്ടികയിൽ നിന്നും വ്യാപകമായി പേരുകൾ നീക്കം ചെയ്യപ്പെടുന്നുവെന്ന ആരോപണം ഉയർന്ന സാഹചര്യത്തിൽ, ഇക്കാര്യത്തിൽ കൃത്യമായ വിശദീകരണവും സുതാര്യമായ പരിശോധനയും ഉറപ്പാക്കാൻ തെരഞ്ഞെടുപ്പ് കമ്മീഷന് ബാധ്യതയുണ്ട്. സാങ്കേതികവിദ്യ ഇത്രത്തോളം വളർന്ന ഈ കാലഘട്ടത്തിലും ഒരു പൗരന് പോലും വോട്ടവകാശം നിഷേധിക്കപ്പെടുന്നില്ലെന്ന് ഉറപ്പുവരുത്താൻ രാഷ്ട്രീയ ഇടപെടലുകളില്ലാതെ കമ്മീഷൻ പ്രവർത്തിക്കണമെന്നും അദ്ദേഹം കൂട്ടിച്ചേർത്തു.
