‘നിങ്ങൾ കാരണം ഞങ്ങളുടെ ഉറക്കം നഷ്ടപ്പെട്ടെന്ന് പറഞ്ഞ് തല്ലി; കഴുത്തിന് പിടിച്ച് തള്ളി, നഖം കൊണ്ട് മുഖത്ത് പോറലേൽപ്പിച്ചു’: ഡൽഹി പോലീസിനെതിരെ എൻ‌എസ്‌യു‌ഐ പ്രവർത്തകർ
ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെ നീക്കം ചെയ്യണമെന്ന് ആവശ്യപ്പെട്ട് പ്രതിഷേധിച്ച എൻ‌എസ്‌യു‌ഐ പ്രവർത്തകർക്ക് നേരെ നടന്ന പോലീസ് അതിക്രമത്തിൽ ശക്തമായ പ്രതിഷേധവുമായി ലോക്‌സഭയിലെ പ്രതിപക്ഷ നേതാവ് രാഹുൽ ഗാന്ധി. ഡൽഹി പോലീസ് ആക്രമിച്ചതായി ആരോപിച്ച എൻ‌എസ്‌യു‌ഐ പ്രവർത്തകർക്കൊപ്പം സംഘടിപ്പിച്ച പത്രസമ്മേളനത്തിലാണ് പ്രധാനമന്ത്രി നരേന്ദ്ര മോദിക്കും കേന്ദ്ര ആഭ്യന്തരമന്ത്രി അമിത് ഷായ്ക്കുമെതിരെ രാഹുൽ ഗാന്ധി ആഞ്ഞടിച്ചത്.
“ഇത് ഇന്ത്യയുടെ ശബ്ദമാണ്. ഈ ശബ്ദത്തിനെതിരെ നിലകൊള്ളാൻ അമിത് ഷാക്കോ പ്രധാനമന്ത്രിക്കോ സാധിക്കില്ല. അതിന് മുതിരരുതെന്ന് ഞാൻ നിങ്ങളോട് നിർദ്ദേശിക്കുന്നു,” രാഹുൽ ഗാന്ധി പറഞ്ഞു. പ്രതിഷേധത്തിനിടെ പോലീസുകാർ നടത്തിയ അക്രമങ്ങളുടെ വീഡിയോ റെക്കോർഡുകളും തെളിവുകളും സൂക്ഷിക്കാനും അത് പാർട്ടിയുമായി പങ്കിടാനും വിദ്യാർത്ഥികളോട് അദ്ദേഹം അഭ്യർത്ഥിച്ചു. പ്രധാനമന്ത്രി, അമിത് ഷാ, ഗ്യാനേഷ് കുമാർ എന്നിവർ മുതൽ കുട്ടികൾക്കെതിരെ കൈയുയർത്തിയ കോൺസ്റ്റബിൾ വരെ, കുറ്റക്കാരായ എല്ലാവരെയും നിയമത്തിന് മുന്നിൽ കൊണ്ടുവരുമെന്നും ശിക്ഷ ഉറപ്പാക്കുമെന്നും അദ്ദേഹം മുന്നറിയിപ്പ് നൽകി.
പത്രസമ്മേളനത്തിൽ, മർദ്ദനമേറ്റിട്ടും ഭയപ്പെടാതെ നിലകൊണ്ട ഒരു വനിതാ പ്രതിഷേധക്കാരിയെ “ഞങ്ങളുടെ ഷെർണി” എന്ന് രാഹുൽ പരിചയപ്പെടുത്തി. കസ്റ്റഡിയിലെടുക്കുന്നതിനിടെ ചഞ്ചൽ യാദവ് എന്ന വനിതാ കോൺസ്റ്റബിൾ തന്റെ കഴുത്തിന് പിടിച്ച് തള്ളുകയും മുഖത്ത് നഖം കൊണ്ട് പോറലേൽപ്പിക്കുകയും മർദ്ദിക്കുകയും ചെയ്തതായി വനിതാ പ്രവർത്തക വെളിപ്പെടുത്തി.
മറ്റൊരു പ്രതിഷേധക്കാരൻ കസ്റ്റഡിയിൽ നേരിട്ട ക്രൂരമായ പീഡനങ്ങളെക്കുറിച്ച് വെളിപ്പെടുത്തി. “പാർലമെന്റ് സ്ട്രീറ്റിൽ നിന്ന് ഡൽഹിയുടെ പ്രാന്തപ്രദേശത്തേക്കുള്ള യാത്രയിലുടനീളം കോൺസ്റ്റബിൾ അങ്കിത് കസാന എന്ന ഉദ്യോഗസ്ഥൻ ഞങ്ങളെ രണ്ടുപേരെയും മർദ്ദിച്ചുകൊണ്ടിരുന്നു. ധർമ്മേന്ദ്രയ്ക്ക് ഛർദ്ദിക്കാൻ തോന്നുന്നുവെന്ന് പറഞ്ഞപ്പോൾ, അയാൾ ബാഗ് തുറന്ന് അതിലേക്ക് ഛർദ്ദിക്കാൻ പറഞ്ഞു. ‘നിങ്ങൾ കാരണം ഞങ്ങൾക്ക് ഉറങ്ങാൻ കഴിയുന്നില്ല’ എന്ന് പോലീസ് ഉദ്യോഗസ്ഥർ ഞങ്ങളോട് പറഞ്ഞു,” അദ്ദേഹം ആരോപിച്ചു. പാർലമെന്റ് സ്ട്രീറ്റ് പോലീസ് സ്റ്റേഷനിൽ വെച്ച് ബഹാബ് സിങ് തോമർ അടക്കമുള്ള പോലീസുകാർ തങ്ങളെ ക്രൂരമായി മർദ്ദിച്ചതായും പ്രതിഷേധക്കാർ വ്യക്തമാക്കി.
നേരത്തെ, സമാധാനപരമായ പ്രതിഷേധത്തിൽ പങ്കെടുത്ത സിജെപി പ്രവർത്തകരായ സൗരവ് ദാസ്, അശുതോഷ് റാങ്ക എന്നിവരെ റിമാൻഡ് ചെയ്തതിനെയും രാഹുൽ ഗാന്ധി വിമർശിച്ചിരുന്നു. ഒക്ടോബർ 10-ലെ പോലീസ് നടപടിയിൽ സ്വതന്ത്ര അന്വേഷണം ആവശ്യപ്പെട്ട് എൻ‌എസ്‌യു‌ഐ സമർപ്പിച്ച ഹർജി ഡൽഹി ഹൈക്കോടതിയുടെ പരിഗണനയിലാണ്. കേസിലെ പ്രാഥമിക എതിർപ്പുകൾ സമർപ്പിക്കാൻ ഡൽഹി പോലീസിന് സമയം അനുവദിച്ച കോടതി, ഹർജി ഒക്ടോബർ 16-ന് വീണ്ടും പരിഗണിക്കും.
