‘രാഷ്ട്രീയ പ്രേരിത പ്രക്ഷോഭങ്ങൾ രാജ്യത്ത് അരാജകത്വം സൃഷ്ടിക്കും; ഭരണമാറ്റം കൊണ്ട് സാഹചര്യങ്ങൾ മാറില്ല’: മോഹൻ ഭാഗവത്
നാഗ്‌പൂർ: ഇന്ത്യയെ അസ്ഥിരപ്പെടുത്താനുള്ള ശ്രമങ്ങൾ വിലപ്പോവില്ലെന്നും, കേവലം ഭരണമാറ്റം കൊണ്ട് സാഹചര്യങ്ങൾ മാറുമെന്ന് കരുതുന്നത് തെറ്റാണെന്നും ആർ.എസ്.എസ് സർസംഘചാലക് മോഹൻ ഭാഗവത്. നാഗ്‌പൂരിൽ നടന്ന ആർ.എസ്.എസിന്റെ വിജയദശമി ആഘോഷങ്ങളെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം. രാഷ്ട്രീയ പ്രേരിതമായ പ്രക്ഷോഭങ്ങൾ രാജ്യത്ത് അരാജകത്വവും സംഘർഷവും മാത്രമേ സൃഷ്ടിക്കൂ എന്നും അദ്ദേഹം പറഞ്ഞു.
പ്രശ്നങ്ങൾക്കുള്ള പരിഹാരം പ്രക്ഷോഭങ്ങളിലൂടെയല്ല, മറിച്ച് സമൂഹത്തിനുള്ളിൽ നിന്നാണ് ഉണ്ടാകേണ്ടതെന്ന് അദ്ദേഹം അഭിപ്രായപ്പെട്ടു. അതിവേഗം പുരോഗതിയിലേക്ക് കുതിക്കുന്നതുകൊണ്ടാണ് ഇന്ത്യ പലരുടെയും പ്രധാന ലക്ഷ്യമായി മാറുന്നത്. കഴിഞ്ഞ കുറച്ചു പതിറ്റാണ്ടുകളായി രാജ്യം കൈക്കൊണ്ട നിർണ്ണായക നയങ്ങളെ നേരിടാൻ കഴിയാത്ത ചില ശക്തികൾ ഇന്ത്യയെയും സംഘത്തെയും തകർക്കാൻ ശ്രമിക്കുകയാണെന്നും മോഹൻ ഭാഗവത് ആരോപിച്ചു.
മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ വോട്ടർ പട്ടികയിലെ ക്രമക്കേടുകളുമായി ബന്ധപ്പെട്ട് പ്രതിഷേധങ്ങൾ ശക്തമാകുന്ന സാഹചര്യത്തിലാണ് ആർ.എസ്.എസ് അധ്യക്ഷന്റെ ഈ പ്രതികരണം. തെരഞ്ഞെടുപ്പ് നടപടികളിലെ ക്രമക്കേടുകൾ ആരോപിച്ച് ഡൽഹിയിൽ നടക്കുന്ന പ്രതിഷേധങ്ങൾ ഭരണമാറ്റത്തിനായുള്ള പോരാട്ടമായി മാറിയെന്ന് മുതിർന്ന സുപ്രീംകോടതി അഭിഭാഷകൻ പ്രശാന്ത് ഭൂഷൺ കഴിഞ്ഞയാഴ്ച പരാമർശിച്ചിരുന്നു. ഇതിന് പിന്നാലെയാണ് ഭരണമാറ്റത്തെക്കുറിച്ചുള്ള ഭാഗവതിന്റെ പരാമർശങ്ങൾ വരുന്നത്.
പാശ്ചാത്യ രാജ്യങ്ങളിൽ നിന്ന് വരുന്നത് രാജ്യത്തിന്റെ സംസ്കാരത്തെയും സുരക്ഷയെയും ബാധിക്കുന്ന പ്രവണതകളാണെന്ന് അദ്ദേഹം പറഞ്ഞു. ഫ്രാൻസ്, നേപ്പാൾ, ബംഗ്ലാദേശ് തുടങ്ങിയ രാജ്യങ്ങളിൽ ഭരണമാറ്റത്തിനായി നടന്ന വിദേശ ഇടപെടലുകൾ ഇതിന് ഉദാഹരണമായി അദ്ദേഹം ചൂണ്ടിക്കാട്ടി. കൂടാതെ, പരിസ്ഥിതിയും ധാർമ്മികതയും മറന്നുകൊണ്ടുള്ള വികസന കാഴ്‌ചപ്പാടല്ല രാജ്യത്തിന് ആവശ്യമെന്നും, നേപ്പാളിലെ സമീപകാല പ്രകൃതിദുരന്തങ്ങളെ ഉദാഹരണമായി ചൂണ്ടിക്കാട്ടി മോഹൻ ഭാഗവത് വ്യക്തമാക്കി.
