‘ഇന്ത്യ ആഗ്രഹിക്കുന്നത് ജനാധിപത്യത്തിലൂടെയുള്ള ഭരണമാറ്റം; വിദേശങ്ങളിലെ അക്രമസ്വഭാവമുള്ള മുന്നേറ്റങ്ങളെ ഇന്ത്യയിലെ പ്രതിഷേധങ്ങളുമായി താരതമ്യം ചെയ്യാനാകില്ല’; മോഹൻ ഭാഗവതിന് മറുപടിയുമായി കപിൽ സിബൽ

ന്യൂഡൽഹി: ഇന്ത്യയിലെ ജനങ്ങൾ ആഗ്രഹിക്കുന്നത് ജനാധിപത്യ മാർഗ്ഗത്തിലൂടെയുള്ള ഭരണമാറ്റമാണെന്ന് കോൺഗ്രസ് നേതാവും രാജ്യസഭാ എം.പിയുമായ കപിൽ സിബൽ വ്യക്തമാക്കി. ആർ.എസ്.എസ് മേധാവി മോഹൻ ഭാഗവതിന്റെ വിജയദശമി പ്രസംഗത്തിലെ പരാമർശങ്ങൾക്ക് വാർത്താസമ്മേളനത്തിൽ മറുപടി പറയുകയായിരുന്നു അദ്ദേഹം.

വിദേശ രാജ്യങ്ങളിലെ അക്രമസ്വഭാവമുള്ള ഭരണമാറ്റങ്ങളെയും അശാന്തിയെയും ഇന്ത്യയിലെ സാഹചര്യങ്ങളുമായി താരതമ്യം ചെയ്യുന്നത് വെറുമൊരു ഭയപ്പെടുത്തൽ മാത്രമാണെന്ന് അദ്ദേഹം കുറ്റപ്പെടുത്തി. ബംഗ്ലാദേശ്, നേപ്പാൾ, ഫ്രാൻസ് തുടങ്ങിയ രാജ്യങ്ങളിലെ സംഭവവികാസങ്ങളുമായി ഇന്ത്യയിലെ പ്രതിഷേധങ്ങളെ താരതമ്യം ചെയ്യാനാകില്ല. ജന്തർമന്തറിൽ സമാധാനപരമായി നിരാഹാര സമരം നടത്തിയ യുവാക്കളുടെ കയ്യിൽ ആയുധങ്ങളോ കല്ലുകളോ ഉണ്ടായിരുന്നില്ല. അവിടെ എന്തെങ്കിലും തരത്തിലുള്ള അക്രമങ്ങൾ ഉണ്ടായിട്ടുണ്ടെങ്കിൽ അത് പുറത്തുനിന്നുള്ള ഏജൻസികളുടെ ഇടപെടൽ കൊണ്ടാണെന്നും കപിൽ സിബൽ ആരോപിച്ചു.

കല്ലുകളുമായി വന്ന ഒരു ട്രക്ക് അവിടെ കണ്ടെത്തിയിട്ടും അതിൽ യാതൊരു അന്വേഷണവും നടന്നിട്ടില്ല. ഡൽഹിയിലെ ക്രമസമാധാന ചുമതല കേന്ദ്ര സർക്കാരിന്റെയും ലഫ്റ്റനന്റ് ഗവർണറുടെയും കീഴിലാണെന്ന കാര്യവും അദ്ദേഹം ഓർമ്മിപ്പിച്ചു. ഇതിനൊപ്പം ഐ.ടി.ബി.പി ഡയറക്ടർ ജനറലിന്റെ പ്രസ്താവനയും യു.എസ് സ്റ്റേറ്റ് സെക്രട്ടറി മാർക്കോ റൂബിയോയുടെ സന്ദർശനവും അദ്ദേഹം ചോദ്യം ചെയ്തു.

കഴിഞ്ഞകാലങ്ങളിൽ ആർ.എസ്.എസും അധികാരമാറ്റത്തിൽ സജീവമായി ഇടപെട്ടിട്ടുണ്ടെന്ന് കപിൽ സിബൽ ചൂണ്ടിക്കാട്ടി. അന്ന് അരവിന്ദ് കെജ്രിവാളിനെ പിന്തുണച്ചുകൊണ്ട് യു.പി.എ സർക്കാരിനെ താഴെയിറക്കാൻ ആർ.എസ്.എസ് കളമൊരുക്കിയിരുന്നു. എന്നാൽ കൃത്യമായ നിയമപ്രക്രിയയിലൂടെയാണ് യു.പി.എ സർക്കാർ അധികാരത്തിൽ നിന്ന് മാറിയത്. നരേന്ദ്ര മോദി അധികാരത്തിൽ വന്നതിനു ശേഷമുള്ള കഴിഞ്ഞ പന്ത്രണ്ട് വർഷമായി രാജ്യം വലിയ പ്രതിസന്ധികളിലൂടെയാണ് കടന്നുപോകുന്നതെന്ന് അദ്ദേഹം പറഞ്ഞു.

2014-ന് ശേഷം ഭരണരീതികളിൽ വലിയ മാറ്റങ്ങളുണ്ടായി. പ്രതിപക്ഷ നേതാക്കളെയും യുവാക്കളെയും അറസ്റ്റ് ചെയ്യുക, ഗവർണർമാരെ ഉപയോഗിച്ച് ഭരണം നിയന്ത്രിക്കുക, തെരഞ്ഞെടുക്കപ്പെട്ട സർക്കാരുകളെ അട്ടിമറിക്കുക എന്നിവയാണ് ഇപ്പോഴത്തെ രീതി. എന്നാൽ രാജ്യത്തെ രൂക്ഷമായ തൊഴിലില്ലായ്മ, വിദ്യാഭ്യാസ മേഖലയിലെ പ്രതിസന്ധികൾ തുടങ്ങിയ അടിസ്ഥാന പ്രശ്നങ്ങളെ സർക്കാർ പൂർണ്ണമായും അവഗണിക്കുകയാണെന്നും അദ്ദേഹം കുറ്റപ്പെടുത്തി.

അരുണാചൽ പ്രദേശിലെ ചൈനീസ് കടന്നുകയറ്റങ്ങളെക്കുറിച്ച് ഐ.ടി.ബി.പി മേധാവി നടത്തിയ പ്രസ്താവന യൂട്യൂബിൽ നിന്ന് നീക്കം ചെയ്ത നടപടിയെയും സിബൽ രൂക്ഷമായി വിമർശിച്ചു. പ്രസ്താവനകൾ യൂട്യൂബിൽ നിന്ന് നീക്കം ചെയ്യാൻ സർക്കാരിന് കഴിഞ്ഞേക്കും, എന്നാൽ നമ്മുടെ ഭൂമി കയ്യേറിയവരെ അവിടെ നിന്നും മാറ്റാൻ കഴിയുമോ എന്ന് അദ്ദേഹം ചോദിച്ചു. അരുണാചൽ പ്രദേശിലെയും കിഴക്കൻ ലഡാക്കിലെയും ചൈനീസ് അധിനിവേശത്തിൽ ആർ.എസ്.എസ് എന്തിനാണ് മൗനം പാലിക്കുന്നതെന്നും അദ്ദേഹം ചോദിച്ചു.

ഒക്ടോബർ രണ്ട് മുതൽ ഇരുപത്തിമൂന്ന് വരെ രജിസ്റ്റർ ചെയ്ത് ക്രൈംബ്രാഞ്ചിന് കൈമാറിയ 57 എഫ്.ഐ.ആറുകളെക്കുറിച്ചും സിബൽ ആശങ്ക പ്രകടിപ്പിച്ചു. പ്രതിപക്ഷത്തെ ഭയപ്പെടുത്താൻ പോലീസ് പഴയ തന്ത്രങ്ങൾ തന്നെയാണ് ഇപ്പോഴും പയറ്റുന്നത്. തുടക്കത്തിൽ പ്രതികളുടെ പേരില്ലാതെ എഫ്.ഐ.ആർ രജിസ്റ്റർ ചെയ്യുകയും, പിന്നീട് വ്യാജ മൊഴികൾ ഉണ്ടാക്കി ലക്ഷ്യമിടുന്ന പ്രതിപക്ഷ നേതാക്കളുടെ പേരുകൾ അതിലേക്ക് ചേർക്കുകയുമാണ് ചെയ്യുന്നത്. ഇത്തരം വേട്ടയാടലുകൾ നടക്കുന്നുണ്ടെങ്കിലും രാജ്യത്തെ കോടതികളിൽ പൂർണ്ണ വിശ്വാസമുണ്ടെന്നും നീതി ലഭിക്കുമെന്നാണ് പ്രതീക്ഷയെന്നും കപിൽ സിബൽ വ്യക്തമാക്കി.