ഡൽഹിയിലെ പ്രമുഖ ഹോട്ടൽ ലക്ഷ്യമിട്ട് ഭീകരാക്രമണ പദ്ധതി: രണ്ട് പാക് ചാരൻമാർ പിടിയിൽ; പിസ്റ്റളും വെടിയുണ്ടകളും പിടിച്ചെടുത്തു
ന്യൂഡൽഹി: ദേശീയ തലസ്ഥാന മേഖലയിൽ (ഡൽഹി-എൻസിആർ) ഗ്രനേഡ് ആക്രമണങ്ങൾക്കും ലക്ഷ്യമിട്ടുള്ള കൊലപാതകങ്ങൾക്കും പദ്ധതിയിട്ട രണ്ട് ഭീകരപ്രവർത്തകരെ ഡൽഹി പോലീസ് സ്പെഷ്യൽ സെൽ അറസ്റ്റ് ചെയ്തു. മധ്യപ്രദേശിലെ ഗ്വാളിയോർ സ്വദേശികളായ രാജ്വീർ (21), വിവേക് ബഞ്ചാര (19) എന്നിവരാണ് പിടിയിലായത്. പാകിസ്ഥാൻ ആസ്ഥാനമായി പ്രവർത്തിക്കുന്ന ഗുണ്ടാസംഘവും ഐഎസ്ഐ ഏജന്റുമായ ഷഹ്സാദ് ഭട്ടിയുടെ നിർദേശപ്രകാരമാണ് ഇവർ പ്രവർത്തിച്ചിരുന്നതെന്ന് പോലീസ് അറിയിച്ചു.
ഏപ്രിൽ 16-ന് ഗ്വാളിയോറിൽ നിന്ന് വിവേകിനെയും, തുടർന്ന് ഏപ്രിൽ 18-ന് ഡൽഹിയിലെ സരായ് കാലെ ഖാനിൽ നിന്ന് രാജ്വീറിനെയും പോലീസ് പിടികൂടുകയായിരുന്നു. പ്രതികളിൽ നിന്ന് ഒരു പിസ്റ്റളും ആറ് വെടിയുണ്ടകളും ഗൂഢാലോചനയുടെ രേഖകളടങ്ങിയ മൊബൈൽ ഫോണുകളും കണ്ടെടുത്തു. ഡൽഹിയിലെ പ്രമുഖ ഹോട്ടൽ ലക്ഷ്യമിട്ട് ആക്രമണം നടത്താനായിരുന്നു ഇവരുടെ നീക്കം.
സോഷ്യൽ മീഡിയ വഴിയാണ് പ്രതികൾ ഭട്ടിയുടെ ശൃംഖലയുമായി ബന്ധപ്പെട്ടത്. എളുപ്പത്തിൽ പണം സമ്പാദിക്കാമെന്ന വാഗ്ദാനത്തിൽ ആകൃഷ്ടരായ ഇവർക്ക് ആയുധങ്ങൾ ശേഖരിക്കാനും ആക്രമണങ്ങൾ ഏകോപിപ്പിക്കാനുമുള്ള ചുമതലയാണ് നൽകിയിരുന്നത്. ഏപ്രിൽ 9-ന് അമൃത്സറിൽ നിന്ന് ആയുധങ്ങളും പണവും കൈപ്പറ്റിയ ഇവർ, പഞ്ചാബിലെ സിറക്പൂരിലുള്ള ഒരു ക്ലബ്ബിൽ വെടിയുതിർക്കാൻ ശ്രമിച്ചിരുന്നതായും അന്വേഷണത്തിൽ വ്യക്തമായി. അന്ന് തോക്കിനുണ്ടായ സാങ്കേതിക തകരാർ കാരണമാണ് ആക്രമണം പരാജയപ്പെട്ടത്. സംഭവത്തിന്റെ വീഡിയോ ദൃശ്യങ്ങൾ ഇവർ പാകിസ്ഥാനിലെ ഹാൻഡ്ലർമാർക്ക് അയച്ചുകൊടുത്തിരുന്നു.
രാജ്യതലസ്ഥാനത്ത് വലിയ തോതിലുള്ള അക്രമങ്ങൾ അഴിച്ചുവിടാനുള്ള ഭട്ടിയുടെ ഗൂഢാലോചനയാണ് ഈ അറസ്റ്റിലൂടെ തകർത്തതെന്ന് ഡെപ്യൂട്ടി പോലീസ് കമ്മീഷണർ പ്രവീൺ കുമാർ ത്രിപാഠി പറഞ്ഞു. കേസിൽ കൂടുതൽ പേർ ഉൾപ്പെട്ടിട്ടുണ്ടോ എന്നറിയാൻ പോലീസ് അന്വേഷണം ഊർജിതമാക്കി.
