ചുറ്റുമുള്ള കെട്ടിടങ്ങൾ പ്രളയമെടുത്തിട്ടും തകരാതെ ഉറച്ചുനിന്ന വീട്; നേപ്പാൾ ദുരന്തത്തിനിടയിൽ അത്ഭുതകരമായി രക്ഷപ്പെട്ട് ഒരു കുടുംബം

പ്രകൃതിദുരന്തങ്ങൾ പലപ്പോഴും അതിജീവനത്തിന്റെ അത്ഭുതകരമായ കഥകൾ അവശേഷിപ്പിക്കാറുണ്ട്. നേപ്പാളിൽ കനത്ത നാശം വിതച്ച മിന്നൽ പ്രളയത്തിനിടയിൽ നിന്ന് പുറത്തുവന്ന അത്തരമൊരു അതിജീവനത്തിന്റെ ദൃശ്യങ്ങളാണ് ഇപ്പോൾ സോഷ്യൽ മീഡിയയിൽ ശ്രദ്ധ നേടുന്നത്.

ചുറ്റുമുള്ള കെട്ടിടങ്ങൾ ഒന്നൊന്നായി വൻ പ്രളയജലത്തിൽ ഒഴുകിപ്പോകുമ്പോഴും, പച്ചനിറം പൂശിയ ഒരു വീട് മാത്രം ഒറ്റയ്ക്ക് തലയുയർത്തി നിന്നു. ഈ കെട്ടിടം കൂറ്റൻ വെള്ളപ്പൊക്കത്തെ അതിജീവിച്ചതിന്റെ ദൃശ്യങ്ങൾ ഇന്റർനെറ്റിൽ വൻതോതിൽ വൈറലായിരിക്കുകയാണ്.

വെള്ളപ്പൊക്കത്തിൽ വന്ന ചെളി വീടിന്റെ ചുമരുകളിൽ അതിശക്തമായി അടിച്ചെങ്കിലും ബലമേറിയ കെട്ടിടം അപകടത്തെ അതിജീവിക്കുകയായിരുന്നു.

പ്രളയജലം കെട്ടിടത്തെ വളഞ്ഞ സമയത്ത് ഒരു കുടുംബത്തിലെ കുറഞ്ഞത് മൂന്ന് അംഗങ്ങളെങ്കിലും ആ വീടിനുള്ളിൽ ഉണ്ടായിരുന്നു. സമീപത്തെ മറ്റ് നിർമ്മിതികൾ പൂർണ്ണമായും ഒലിച്ചുപോയപ്പോഴും ഈ വീടിന് ദൃശ്യമായ തകരാറുകൾ ഒന്നും സംഭവിച്ചില്ല.

വീടിന്റെ ഉറപ്പിനെയും അതിജീവനത്തെയും കുറിച്ച് സോഷ്യൽ മീഡിയയിൽ വലിയ ചർച്ചകളാണ് നടക്കുന്നത്. ചുറ്റുമുള്ള കെട്ടിടങ്ങൾ നിമിഷനേരം കൊണ്ട് പ്രളയത്തിൽ ഇല്ലാതായപ്പോൾ ഈ വീട് എങ്ങനെ തകരാതെ നിന്നുവെന്നത് ആളുകളെ അത്ഭുതപ്പെടുത്തി.

വീട്ടിലുണ്ടായിരുന്ന കുടുംബത്തിന്റെ അവസ്ഥയെക്കുറിച്ച് തുടക്കത്തിൽ ഏറെ ആശങ്ക ഉയർന്നിരുന്നു. എന്നാൽ, ആ കുടുംബം സുരക്ഷിതരാണെന്ന് വ്യക്തമാക്കുന്ന മറ്റൊരു വിഡിയോ ഒരു സോഷ്യൽ മീഡിയ ഉപയോക്താവ് പങ്കുവെച്ചതോടെയാണ് ആശങ്കകൾക്ക് പരിഹാരമായത്.

മേഖലയിലാകെ കനത്ത നാശനഷ്ടങ്ങൾ വിതച്ച ദുരന്തത്തിനിടയിലാണ് ഈ കുടുംബത്തിന്റെ അത്ഭുതകരമായ രക്ഷപ്പെടൽ. ബുധനാഴ്ച മധ്യ നേപ്പാളിൽ ഉണ്ടായ മിന്നൽ പ്രളയത്തിൽ നേപ്പാൾ, ടിബറ്റ് അതിർത്തി മേഖലകളിലായി 600-ഓളം പേർ മരണപ്പെടുകയും 1500-ഓളം പേരെ കാണാതാവുകയും ചെയ്തിട്ടുണ്ട്. അതിർത്തിക്ക് സമീപമുണ്ടായ ഹിമപാതത്തെ തുടർന്നുണ്ടായ മഞ്ഞിടിച്ചിലാണ് കടുത്ത പ്രളയത്തിന് കാരണമായത്.

രക്ഷാപ്രവർത്തനത്തിനായി എൻ.ഡി.ആർ.എഫ് സംഘത്തെ അയക്കാമെന്ന് ഇന്ത്യ നേപ്പാളിനെ അറിയിച്ചിട്ടുണ്ട്. ദുരന്തത്തിന് പിന്നാലെ തിരച്ചിൽ സംഘങ്ങളെ അയക്കാമെന്ന വിവിധ രാജ്യങ്ങളുടെ നിർദ്ദേശം കാഠ്മണ്ഡു നിരസിച്ചെന്ന റിപ്പോർട്ടുകൾക്കിടയിലാണ് ഇന്ത്യയുടെ ഈ വാഗ്ദാനം.

ബന്ധപ്പെടാൻ സാധിക്കാത്ത ഇന്ത്യൻ പൗരന്മാരെ കണ്ടെത്താനാണ് നിലവിൽ പ്രഥമ പരിഗണന നൽകുന്നതെന്ന് വെള്ളിയാഴ്ച വിദേശകാര്യ മന്ത്രാലയം വാർത്താസമ്മേളനത്തിൽ വ്യക്തമാക്കി. വിദേശകാര്യ മന്ത്രാലയത്തിന്റെ കണക്കുപ്രകാരം 320 ഇന്ത്യൻ പൗരന്മാരും ഇന്ത്യൻ വംശജരായ 100 പേരുമാണ് നിലവിൽ വിവര ലഭ്യതയില്ലാതെ തുടരുന്നത്.