‘ആ പരാമർശങ്ങൾ വേണ്ടായിരുന്നു’; മാപ്പുപറഞ്ഞ് ‘ബിഗ് ടി.വി’ അവതാരക അപർണ കുറുപ്പ് | Aparna Kurup Big TV Kanthapuram Controversy
കൊച്ചി: ടെലിവിഷൻ ചർച്ചയ്ക്കിടെ നടത്തിയ വിവാദ പരാമർശങ്ങളിൽ നിരുപാധികം ഖേദം പ്രകടിപ്പിച്ച് ബിഗ് ടിവി സീനിയർ കോ-ഓർഡിനേറ്റിങ് എഡിറ്ററും അവതാരകയുമായ അപർണ കുറുപ്പ്(Aparna Kurup Big TV Kanthapuram Controversy). സ്ത്രീകൾക്കെതിരായ ലിംഗവിവേചനവുമായി ബന്ധപ്പെട്ട് നടത്തിയ പ്രൈംടൈം ചർച്ചയിലെ പരാമർശങ്ങൾ ഏതെങ്കിലും വ്യക്തികളുടെയോ വിഭാഗങ്ങളുടെയോ മതവികാരത്തെയോ വിശ്വാസത്തെയോ വ്രണപ്പെടുത്തിയിട്ടുണ്ടെങ്കിൽ അതിൽ നിരുപാധികം ഖേദം രേഖപ്പെടുത്തുന്നതായി അവർ വ്യക്തമാക്കി. വിവാദത്തിന് വഴിവച്ച പ്രസ്തുത ചർച്ചയുടെ വിഡിയോ ചാനലിന്റെ എല്ലാ ഔദ്യോഗിക സോഷ്യൽ മീഡിയ പ്ലാറ്റ്ഫോമുകളിൽനിന്നും പൂർണമായി നീക്കം ചെയ്തതായും വാർത്താക്കുറിപ്പിലൂടെ അറിയിച്ചു.
വിവാദ ചർച്ചയിലെ ‘വിദ്വേഷ പരാമർശം’ | Aparna Kurup Big TV Kanthapuram Controversy
ബിഗ് ടിവിയുടെ പ്രൈംടൈം ചർച്ചാ പരിപാടിയായ ‘ബിഗ് ഡയലോഗി’ലായിരുന്നു വിവാദത്തിന് ആധാരമായ സംഭവം. ‘അറിവുള്ള പെണ്ണുങ്ങളെല്ലാം അൽഹറാമോ?’ എന്ന വിഷയത്തെ ആസ്പദമാക്കി നടത്തിയ ചർച്ചയ്ക്കിടെ അവതാരക നടത്തിയ ചില പ്രസ്താവനകൾ വലിയ തോതിലുള്ള വിദ്വേഷ പ്രചാരണമാണെന്ന തരത്തിൽ വിമർശനം ഉയരുകയായിരുന്നു.
മതഗ്രന്ഥങ്ങളെയും ആചാര്യന്മാരെയും മോശമായി ചിത്രീകരിക്കുന്ന തരത്തിലുള്ള വാക്കുകളാണ് ചർച്ചയ്ക്കിടെ ഉപയോഗിച്ചതെന്നായിരുന്നു സമൂഹമാധ്യമങ്ങളിൽ ഉയർന്ന പ്രധാന ആക്ഷേപം. ഒരു പ്രത്യേക സമുദായത്തിന്റെ വിശ്വാസങ്ങളെയും മതപരമായ പദങ്ങളെയും മതഗ്രന്ഥത്തെയും ലഹരിമരുന്ന് കേസുകളോടും മറ്റ് സാമൂഹിക വിരുദ്ധ പ്രവർത്തനങ്ങളോടും ചേർത്തുവച്ച് അവതാരക സംസാരിച്ചു എന്ന് ചൂണ്ടിക്കാട്ടി വിവിധ കോണുകളിൽനിന്ന് ശക്തമായ പ്രതിഷേധം ഉയർന്നു.
‘പരാമർശങ്ങൾ ഒഴിവാക്കപ്പെടേണ്ടതായിരുന്നു’ | Aparna Kurup Big TV Kanthapuram Controversy
പ്രതിഷേധം ശക്തമായ സാഹചര്യത്തിലാണ് വിശദീകരണവും മാപ്പപേക്ഷയുമായി അവതാരക അപർണ കുറുപ്പ് നേരിട്ട് രംഗത്തെത്തിയത്. സ്ത്രീകൾക്കെതിരെയുള്ള ലിംഗവിവേചനത്തിനെതിരെ സംഘടിപ്പിച്ച ചർച്ചയിലെ ചില പരാമർശങ്ങൾ ഒഴിവാക്കപ്പെടേണ്ടതായിരുന്നുവെന്ന് അവർ പറഞ്ഞു.
ഏത് മതത്തിലായാലും സ്ത്രീകൾക്ക് തുല്യപദവിയും സാമൂഹ്യനീതിയും ഉറപ്പാക്കണമെന്ന നിലപാട് ഉയർത്തിപ്പിടിക്കുമ്പോൾത്തന്നെ, പരാമർശങ്ങൾ സമൂഹത്തിൽ വലിയ രീതിയിൽ തെറ്റിദ്ധാരണകൾക്ക് വഴിവെച്ച സാഹചര്യം കണക്കിലെടുത്താണ് വിഡിയോ പിൻവലിക്കാൻ തീരുമാനിച്ചതെന്നും അപർണ കുറുപ്പ് വിശദീകരിച്ചു(Aparna Kurup Big TV Kanthapuram Controversy).
