അമിത് ഷാക്കെതിരെ തുറന്നെഴുത്ത്; മുൻ സിവിൽ സർവീസ് ഉദ്യോഗസ്ഥനെ വേഷംമാറിയെത്തിയ പോലീസ് സംഘം പിടിച്ചുകൊണ്ടുപോയതായി പരാതി | Ashish Joshi Detention Over Amit Shah Post

ന്യൂഡൽഹി: കേന്ദ്ര ആഭ്യന്തര മന്ത്രി അമിത് ഷാക്കെതിരെ തുറന്നെഴുത്തുമായി സമൂഹമാധ്യമങ്ങളിൽ പോസ്റ്റുകൾ പങ്കുവച്ചതിന് പിന്നാലെ മുൻ മുതിർന്ന സിവിൽ സർവീസ് ഉദ്യോഗസ്ഥനെ കാണാതായി(Ashish Joshi Detention Over Amit Shah Post). കേന്ദ്ര വാർത്താവിനിമയ മന്ത്രാലയത്തിൽ അഡീഷണൽ സെക്രട്ടറിയായിരുന്ന ആശിഷ് ജോഷിയെയാണ് ഡൽഹിയിലെ പാർക്കിൽ പ്രഭാതസവാരിക്കിടെ വേഷംമാറിയെത്തിയ പോലീസ് സംഘം കസ്റ്റഡിയിലെടുത്തതായി പരാതി. ഇദ്ദേഹത്തെ രഹസ്യകേന്ദ്രത്തിലേക്കു കൊണ്ടുപോയതായും മണിക്കൂറുകളായി ബന്ധപ്പെടാനാകുന്നില്ലെന്നും പരാതിയുമായി കുടുംബം രംഗത്തെത്തിയിട്ടുണ്ട്. സംഭവത്തിൽ കേന്ദ്ര ആഭ്യന്ത്ര മന്ത്രാലയത്തിന്റെ വിശദീകരണം ആവശ്യപ്പെട്ട് കോൺഗ്രസ് നേതാക്കളും രംഗത്തെത്തി.

ഡൽഹിയിലെ നെഹ്‌റു പാർക്കിൽ ഇന്നു രാവിലെ നടക്കാനിറങ്ങിയപ്പോഴാണ് സിവിൽ വസ്ത്രത്തിലെത്തിയ രണ്ടുപേർ അദ്ദേഹത്തെ തടഞ്ഞുനിർത്തി അജ്ഞാത കേന്ദ്രത്തിലേക്ക് കൊണ്ടുപോയത്. സംഭവത്തിന് പിന്നാലെ അദ്ദേഹത്തിന്റെ മൊബൈൽ ഫോൺ പൂർണമായി സ്വിച്ച് ഓഫ് ചെയ്യപ്പെടുകയും മണിക്കൂറുകളോളം എവിടെയാണെന്നതിനെക്കുറിച്ച് യാതൊരു വിവരവും ലഭിക്കാതിരിക്കുകയും ചെയ്തത് കുടുംബാംഗങ്ങളെയും സുഹൃത്തുക്കളെയും വലിയ ആശങ്കയിലാക്കി. സർക്കാരിന്റെ ആഭ്യന്തര ഭിന്നതകൾ തുറന്നുകാട്ടിയ ഉദ്യോഗസ്ഥനെതിരെ ഭരണകൂടം പ്രതികാര നടപടി സ്വീകരിക്കുകയാണെന്ന് ആരോപിച്ച് കോൺഗ്രസ് ഉൾപ്പെടെയുള്ള പ്രതിപക്ഷ പാർട്ടികളും മനുഷ്യാവകാശ പ്രവർത്തകരും രംഗത്തെത്തി(Ashish Joshi Detention Over Amit Shah Post).

ഇന്ത്യൻ പോസ്റ്റ് ആൻഡ് ടെലികമ്മ്യൂണിക്കേഷൻ അക്കൗണ്ട്‌സ് ആൻഡ് ഫിനാൻസ് സർവീസ് (ഐപി ആൻഡ് ടിഎഎഫ്എസ്) 1992 ബാച്ച് ഉദ്യോഗസ്ഥനായ ആശിഷ് ജോഷി കേന്ദ്ര വാർത്താവിനിമയ മന്ത്രാലയത്തിൽ അഡീഷണൽ സെക്രട്ടറിയായാണ് സർവീസിൽനിന്ന് വിരമിച്ചത്(Ashish Joshi Detention Over Amit Shah Post). സർവീസിലിരിക്കെത്തന്നെ ഭരണകൂടങ്ങളുടെ തെറ്റായ നയങ്ങളെ പരസ്യമായി ചോദ്യം ചെയ്ത് ശ്രദ്ധേയനായ വ്യക്തിയായിരുന്നു അദ്ദേഹം. വിരമിച്ച ശേഷവും രാജ്യത്തെ സാമ്പത്തിക നയങ്ങൾ, തെരഞ്ഞെടുപ്പ് പരിഷ്‌കരണങ്ങൾ, അടിസ്ഥാന സൗകര്യ നിർമാണത്തിലെ അഴിമതികൾ, വിദ്വേഷ രാഷ്ട്രീയം എന്നിവയെക്കുറിച്ച് അദ്ദേഹം നിരന്തരം പ്രതികരിച്ചിരുന്നു. എന്നാൽ കേന്ദ്ര ആഭ്യന്തര മന്ത്രാലയത്തിലെ അതീവ രഹസ്യമായ വിഷയങ്ങളെ പരാമർശിച്ച് ദിവസങ്ങൾക്ക് മുൻപ് അദ്ദേഹം പങ്കുവച്ച കുറിപ്പാണു പുതിയ പ്രകോപനമെന്നാണ് പ്രതിപക്ഷ നേതാക്കൾ ആരോപിക്കുന്നത്.

നെഹ്‌റു പാർക്കിലെ നാടകീയ നീക്കങ്ങൾ | Ashish Joshi Detention Over Amit Shah Post

ഇന്നു രാവിലെ നെഹ്‌റു പാർക്കിൽ പതിവ് പ്രഭാതസവാരി നടത്തുന്നതിനിടെയാണ് സാധാരണ വസ്ത്രം ധരിച്ച രണ്ട് ഉദ്യോഗസ്ഥർ ആശിഷ് ജോഷിയെ സമീപിച്ചതും വാഹനത്തിൽ കയറ്റി കൊണ്ടുപോയതും. രാവിലെ പത്ത് മണിക്ക് ശേഷം അദ്ദേഹത്തെ ഫോണിൽ ബന്ധപ്പെടാൻ കുടുംബത്തിന് സാധിച്ചില്ല. ഉന്നത ഉദ്യോഗസ്ഥന്റെ പെട്ടെന്നുള്ള തിരോധാനത്തിൽ പരിഭ്രാന്തരായ കുടുംബാംഗങ്ങൾ വിവരമറിയിച്ചതിനെത്തുടർന്ന് കോൺഗ്രസ് നേതാവും മുൻ പാർലമെന്റംഗവുമായ സന്ദീപ് ദീക്ഷിത് സംഭവത്തിൽ അടിയന്തരമായി ഇടപെടുകയായിരുന്നു.

ആശിഷ് ജോഷിയുടെ ജീവൻ അപകടത്തിലാണെന്നും രാജ്യതലസ്ഥാനത്തുനിന്ന് ഒരു മുൻ ഉന്നത ഉദ്യോഗസ്ഥനെ സിവിൽ വസ്ത്രത്തിലെത്തിയ സംഘം തട്ടിക്കൊണ്ടുപോകുന്ന അവസ്ഥ ഞെട്ടിക്കുന്നതാണെന്നും സന്ദീപ് ദീക്ഷിത് പരസ്യമായി പ്രതികരിച്ചു. രാവിലെ പത്ത് മണി മുതൽ അദ്ദേഹത്തെ കണ്ടെത്താൻ എല്ലാ തലത്തിലും ശ്രമിക്കുകയാണെന്നും എന്നാൽ യാതൊരു വിവരവും ലഭ്യമായിട്ടില്ലെന്നും അദ്ദേഹം വ്യക്തമാക്കി. ഡൽഹി പോലീസും പോലീസ് കമ്മീഷണറും ഉടൻ വിഷയത്തിൽ വ്യക്തത വരുത്തണമെന്നും അദ്ദേഹത്തെ എവിടേക്കാണ് മാറ്റിയതെന്ന് കുടുംബത്തെ ഔദ്യോഗികമായി അറിയിക്കണമെന്നും ദീക്ഷിത് ശക്തമായി ആവശ്യപ്പെട്ടു.

അമിത് ഷായും ആഭ്യന്തര സെക്രട്ടറിയും തമ്മിലുള്ള ഭിന്നതയെന്ന വെളിപ്പെടുത്തൽ | Ashish Joshi Detention Over Amit Shah Post

ആശിഷ് ജോഷിക്കെതിരായ ഇപ്പോഴത്തെ അപ്രതീക്ഷിത നടപടിക്ക് ആധാരം ഏതാനും ആഴ്ചകൾക്ക് മുൻപ് അദ്ദേഹം പങ്കുവച്ച ഒരു വിവാദ പോസ്റ്റാണെന്നാണ് രാഷ്ട്രീയ വൃത്തങ്ങൾ ചൂണ്ടിക്കാട്ടുന്നത്. ഡൽഹി ജന്തർ മന്തറിൽ നടന്ന വിദ്യാർഥി സമരത്തെ അടിച്ചമർത്തുന്നതുമായി ബന്ധപ്പെട്ട് കേന്ദ്ര സർക്കാരിന്റെ ഉന്നത തലങ്ങളിൽ വലിയ ഏറ്റുമുട്ടൽ നടന്നുവെന്ന് അദ്ദേഹം സമൂഹമാധ്യമങ്ങളിൽ കുറിച്ചിരുന്നു. സിവിൽ സർവീസ് തലത്തിലെ വിശ്വസനീയ വിവരങ്ങൾ ഉദ്ധരിച്ചായിരുന്നു അദ്ദേഹത്തിന്റെ തുറന്നെഴുത്ത്.

വിദ്യാർഥികൾക്കെതിരെ അതിക്രൂരമായ പോലീസ് നടപടി പാടില്ലെന്ന് കേന്ദ്ര ആഭ്യന്തര സെക്രട്ടറി കർശന നിലപാടെടുത്തുവെന്നും എന്നാൽ ആഭ്യന്തര മന്ത്രി അമിത് ഷാ ഇതിനോട് വിയോജിച്ചുവെന്നും ജോഷി ആരോപിച്ചിരുന്നു(Ashish Joshi Detention Over Amit Shah Post). താഴേതട്ടിലുള്ള പോലീസ് ഉദ്യോഗസ്ഥർ പോലും വിദ്യാർഥികളെ അനാവശ്യമായി മർദിക്കുന്നതിനെ എതിർത്തുവെന്നും, ആഭ്യന്തര മന്ത്രിയുടെ എതിർപ്പ് മറികടന്നാണ് ആഭ്യന്തര സെക്രട്ടറിക്ക് സർവീസിൽ കാലാവധി നീട്ടി നൽകേണ്ടി വന്നതെന്നും അദ്ദേഹം കുറിച്ചു.

കേന്ദ്ര സർക്കാരിനകത്ത് വലിയ പൊട്ടിത്തെറി നടക്കുന്നതായി വാദിച്ചുകൊണ്ടുള്ള പോസ്റ്റ് വലിയ രാഷ്ട്രീയ വിവാദങ്ങൾക്ക് വഴിവച്ചു. ഇതിന് പിന്നാലെ കേന്ദ്ര സർക്കാരിന്റെ നിർദേശപ്രകാരം എക്‌സ് പ്ലാറ്റ്ഫോം ഈ പോസ്റ്റ് ഇന്ത്യയിൽ തടഞ്ഞുവയ്ക്കുകയാണുണ്ടായത്. എന്നാൽ, തന്നെ നിശബ്ദനാക്കാൻ നോക്കുന്നതിന് പകരം വിവരങ്ങൾ നിഷേധിക്കാൻ മന്ത്രാലയം തയാറാകുമോ എന്ന് ജോഷി വീണ്ടും വെല്ലുവിളിച്ചിരുന്നു.

പ്രതിപക്ഷ പ്രതിഷേധം | Ashish Joshi Detention Over Amit Shah Post

സംഭവം പുറത്തറിഞ്ഞതോടെ രൂക്ഷമായ വിമർശനവുമായി പ്രതിപക്ഷ നേതാക്കൾ രംഗത്തെത്തി. സ്വന്തം വീഴ്ചകളെയും തർക്കങ്ങളെയും തുറന്നുകാണിക്കുന്ന ഒരു മുൻ ഉദ്യോഗസ്ഥന്റെ പോസ്റ്റുകളെപ്പോലും കേന്ദ്ര ആഭ്യന്തര മന്ത്രാലയം ഇത്രയധികം ഭയപ്പെടുന്നുണ്ടോ എന്ന് കോൺഗ്രസ് ഡിജിറ്റൽ വിഭാഗം അധ്യക്ഷ സുപ്രിയ ശ്രീനാഥെ ചോദിച്ചു. കസ്റ്റഡിയിലെടുത്ത് മണിക്കൂറുകൾ കഴിഞ്ഞിട്ടും ബന്ധുക്കൾക്ക് ഒരു വിവരവും നൽകാത്ത ഡൽഹി പോലീസിന്റെ നടപടി കടുത്ത മനുഷ്യാവകാശ ലംഘനമാണെന്ന് എഐസിസി മീഡിയ കോർഡിനേറ്റർ ഹർമീത് കൗറും ചൂണ്ടിക്കാട്ടി. കേന്ദ്ര സർക്കാരിനുള്ളിലെ അധികാര തർക്കങ്ങൾ തുറന്നുപറഞ്ഞതിനാണ് ഈ പകപോക്കലെന്ന് കോൺഗ്രസ് നേതാവ് സരൾ പട്ടേലും ആരോപിച്ചു.

സ്വതന്ത്ര മാധ്യമ സ്ഥാപനമായ ദ വയറിന്റെ സ്ഥാപക എഡിറ്റർ സിദ്ധാർഥ് വരദരാജനും സംഭവത്തിൽ ശക്തമായ പ്രതിഷേധം രേഖപ്പെടുത്തി. മുൻപ് ആശിഷ് ജോഷിയുടെ പോസ്റ്റ് സെൻസർ ചെയ്യപ്പെട്ട കാര്യം താൻ ചൂണ്ടിക്കാണിച്ചിരുന്നുവെന്ന് അദ്ദേഹം ഓർമിപ്പിച്ചു. ഒരു ജനാധിപത്യ രാജ്യത്ത് ഭരണകൂട നയങ്ങളെ ചോദ്യം ചെയ്തതിന്റെ പേരിൽ ഒരു മുൻ സിവിൽ സർവീസ് ഉദ്യോഗസ്ഥനെ രഹസ്യമായി തട്ടിക്കൊണ്ടുപോയി ചോദ്യം ചെയ്യുന്ന അവസ്ഥ അങ്ങേയറ്റം ഭയാനകമാണെന്ന് വരദരാജൻ വ്യക്തമാക്കി. ഡൽഹി പോലീസിന്റെ സൈബർ വിങ് ഡിസിപിയെ ടാഗ് ചെയ്തുകൊണ്ട് അദ്ദേഹം വിശദീകരണം ആവശ്യപ്പെടുകയും ചെയ്തു.

സ്‌പെഷ്യൽ സെൽ കസ്റ്റഡിയിലെന്ന് റിപ്പോർട്ടുകൾ | Ashish Joshi Detention Over Amit Shah Post

മണിക്കൂറുകൾ നീണ്ട അനിശ്ചിതത്വങ്ങൾക്ക് ശേഷം മുതിർന്ന മാധ്യമപ്രവർത്തകൻ അതുൽ കൃഷ്ണൻ പുറത്തുവിട്ട വിവരങ്ങൾ പ്രകാരം ആശിഷ് ജോഷി ഡൽഹി പോലീസ് സ്‌പെഷ്യൽ സെല്ലിന്റെ കസ്റ്റഡിയിലാണെന്നാണു വിവരം. പഴയൊരു എഫ്‌ഐആറുമായി ബന്ധപ്പെട്ട് മൊഴി രേഖപ്പെടുത്തുന്നതിനായി അദ്ദേഹത്തെ ന്യൂ ഫ്രണ്ട്‌സ് കോളനിയിലെ സ്‌പെഷ്യൽ സെൽ ഓഫീസിലേക്ക് എത്തിച്ചതാണെന്നാണ് പ്രാഥമിക സൂചനകൾ. അദ്ദേഹത്തെ ഔദ്യോഗികമായി അറസ്റ്റ് ചെയ്യാൻ സാധ്യതയില്ലെന്നും ചോദ്യം ചെയ്യലിന് ശേഷം വിട്ടയച്ചേക്കുമെന്നും പോലീസ് വൃത്തങ്ങൾ അനൗദ്യോഗികമായി നൽകുന്ന സൂചന. എന്നാൽ, സംഭവത്തിൽ ഡൽഹി പോലീസ് ഔദ്യോഗികമായി പ്രതികരിക്കാൻ ഇതുവരെ തയാറായിട്ടില്ല.

മുൻകാലങ്ങളിലും അധികാര ദുർവിനിയോഗങ്ങൾക്കെതിരെ വിട്ടുവീഴ്ചയില്ലാത്ത നിലപാട് സ്വീകരിച്ച വ്യക്തിയാണ് ആശിഷ് ജോഷി. 2015-ൽ ഡൽഹി ഡയലോഗ് കമ്മീഷൻ അംഗ സെക്രട്ടറിയായിരിക്കെ ചട്ടവിരുദ്ധമായ രാഷ്ട്രീയ നിയമനങ്ങളെ എതിർത്തതിന് അദ്ദേഹത്തെ തൽസ്ഥാനത്തുനിന്ന് മാറ്റിയിരുന്നു. പിന്നീട് 2019-ൽ ഉത്തരാഖണ്ഡിൽ കമ്മ്യൂണിക്കേഷൻസ് കൺട്രോളറായി പ്രവർത്തിക്കവെ വിദ്വേഷ വീഡിയോ പ്രചരിപ്പിച്ച ബിജെപി നേതാവിനെതിരെ നടപടി ആവശ്യപ്പെട്ടതിന് അദ്ദേഹത്തെ കേന്ദ്ര സർക്കാർ രണ്ട് വർഷത്തിലധികം സസ്‌പെൻഡ് ചെയ്തിരുന്നു.

ഡൽഹി മന്ത്രിയായ ബിജെപി നേതാവ് കപിൽ മിശ്രയുടെ മുസ്ലിം വിരുദ്ധ വിദ്വേഷ പരാമർശങ്ങളിൽ നടപടി ആവശ്യപ്പെട്ട് പോലീസ് കമ്മീഷണർക്ക് കത്തെഴുതിയതും വിവാദമായി. വിരമിച്ച ശേഷവും ഭരണകൂടത്തിന് തലവേദനയായി മാറിയ ഈ മുൻ ഉദ്യോഗസ്ഥനെതിരെയുള്ള പോലീസ് നീക്കം വിമർശകരുടെ വായടപ്പിക്കാനുള്ള ശ്രമങ്ങളുടെ ഭാഗമാണെന്ന ആക്ഷേപം കൂടുതൽ ശക്തമാവുകയാണ്.