ഗുരുവായൂരപ്പനെ തൊഴുത് മുകേഷ് അംബാനി; ദേവസ്വം ആശുപത്രി നിര്മാണത്തിന് 15 കോടി സംഭാവന ചെയ്തു
ഗുരുവായൂര്: പ്രമുഖ വ്യവസായി മുകേഷ് അംബാനി ഗുരുവായൂർ ക്ഷേത്രത്തിൽ ദർശനം നടത്തി. ഇന്ന് രാവിലെ ക്ഷേത്രത്തിൽ എത്തിയ അദ്ദേഹം ഗുരുവായൂരപ്പന് കാണിക്ക അർപ്പിച്ച് പ്രത്യേക പൂജകളിൽ പങ്കെടുത്തു. ദേവസ്വം ആശുപത്രിയുടെ നിർമ്മാണ പ്രവർത്തനങ്ങൾക്കായി 15 കോടി രൂപ സംഭാവന നൽകുകയും ചെയ്തു.
ഇന്ന് രാവിലെ 7.30നാണ് മുകേഷ് അംബാനി ഗുരുവായൂരിലെത്തിയത്. ശ്രീകൃഷ്ണ കോളേജ് മൈതാനത്ത് ഹെലികോപ്റ്ററില് വന്നിറങ്ങിയ അദ്ദേഹം റോഡ് മാര്ഗം തെക്കേ നടയില് ശ്രീവത്സം അതിഥി മന്ദിരത്തിന് മുന്നിലെത്തി. കുടുംബാംഗങ്ങളും മുകേഷ് അംബാനിക്കൊപ്പം ഉണ്ടായിരുന്നു. ക്ഷേത്രം ഭാരവാഹികളും ദേവസ്വം ചെയർമാൻ ഡോ. വി.കെ വിജയൻ അടക്കമുള്ളവരും ചേർന്നാണ് അദ്ദേഹത്തെ സ്വീകരിച്ചത്.
ഗുരുവായൂരിലെ ദർശനത്തിന് ശേഷം നടന്ന കൂടിക്കാഴ്ചയിലാണ് മുകേഷ് അംബാനി സംഭാവന ദേവസ്വം അധികൃതർക്ക് കൈമാറിയത്.
