‘ആറുമാസത്തിലൊരിക്കൽ വിദേശയാത്ര ചെയ്യേണ്ടിവരുന്ന ഒരാളിൽ നിന്ന് വ്യത്യസ്തമായി ഞാൻ ഇവിടെ ജീവിക്കുന്നു, ഇവിടെ മരിക്കും; അടുത്ത 30 വർഷത്തേക്ക് കോൺഗ്രസ് അധികാരത്തിൽ വരില്ല’: അമിത് ഷാ

ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ കോൺഗ്രസും സഖ്യകക്ഷികളും പ്രതിഷേധം ശക്തമാക്കുന്നതിനിടെ പ്രതിപക്ഷ നേതാവ് രാഹുൽ ഗാന്ധി വിദേശയാത്ര പോയതിനെ രൂക്ഷമായി വിമർശിച്ച് കേന്ദ്ര ആഭ്യന്തരമന്ത്രി അമിത് ഷാ. അടുത്ത മൂന്ന് പതിറ്റാണ്ടത്തേക്ക് കോൺഗ്രസ് അധികാരത്തിൽ നിന്ന് പുറത്തുനിൽക്കുമെന്ന് അദ്ദേഹം പ്രവചിച്ചു. ഡൽഹിയിൽ യമുനാ ശുചീകരണത്തിനായി 8,941 കോടി രൂപയുടെ പദ്ധതികൾക്ക് തുടക്കം കുറിച്ചു സംസാരിക്കുകയായിരുന്നു അദ്ദേഹം.

നാല് ദിവസത്തെ സന്ദർശനത്തിനായി രാഹുൽ ഗാന്ധി വിയറ്റ്നാമിലേക്ക് പോയെന്നാണ് റിപ്പോർട്ടുകൾ. നുണകൾ വിളിച്ചുപറഞ്ഞ് മടുത്തശേഷമാണ് രാഹുൽ ഗാന്ധി അവധിക്കാല ആഘോഷത്തിന് പോയതെന്ന് ബിജെപി ആരോപിച്ചു. വിദേശത്ത് ജോർജ്ജ് സോറോസിൽ നിന്ന് ക്ലാസുകൾ എടുക്കാനാണ് രാഹുൽ പോയതെന്ന് ബിജെപി നേതാവ് സാംബിത് പത്ര അവകാശപ്പെട്ടപ്പോൾ, തന്റെ കുഴപ്പക്കാരായ സഹകാരികളെ കാണാനാണോ യാത്രയെന്ന് ബിജെപി വക്താവ് പ്രദീപ് ഭണ്ഡാരി ചോദിച്ചു. എന്നാൽ സ്വകാര്യസമയത്ത് ഏത് സ്ഥലവും സന്ദർശിക്കാൻ രാഹുൽ ഗാന്ധിക്ക് അവകാശമുണ്ടെന്ന് കോൺഗ്രസ് വ്യക്തമാക്കി.

പ്രതിപക്ഷ പാർട്ടികൾ പതിറ്റാണ്ടുകളായി പല സംസ്ഥാനങ്ങളിലും അധികാരത്തിന് പുറത്താണെന്ന് അമിത് ഷാ ഓർമ്മിപ്പിച്ചു. ബംഗാളിൽ 54 വർഷമായും ഡൽഹിയിൽ 18 വർഷമായും കോൺഗ്രസ് തെരഞ്ഞെടുക്കപ്പെട്ടിട്ടില്ലെന്ന് അദ്ദേഹം ചൂണ്ടിക്കാട്ടി. ആറുമാസത്തിലൊരിക്കൽ വിദേശയാത്ര നടത്തുന്ന രാഹുൽ ഗാന്ധിയിൽ നിന്ന് വ്യത്യസ്തമായി താൻ ഇവിടെ ജീവിച്ച് ഇവിടെത്തന്നെ മരിക്കുമെന്നും, പ്രകടനങ്ങൾ കൊണ്ട് ഒന്നും നേടാനാകില്ലെന്നും ഷാ വ്യക്തമാക്കി.

വർഷങ്ങളായി അധികാരത്തിലിരുന്നിട്ടും ആം ആദ്പി പാർട്ടിയും കോൺഗ്രസും യമുനാ നദി വൃത്തിയാക്കുന്നതിൽ പരാജയപ്പെട്ടുവെന്ന് ആരോപിച്ച അദ്ദേഹം, ബിജെപിയുടെ ഇരട്ട എഞ്ചിൻ സർക്കാർ നദിയുടെ പൂർണ ശുചീകരണം ഉറപ്പാക്കുമെന്നും കൂട്ടിച്ചേർത്തു.